Apenrade/Brüssel (SN/MkWj). Iniciatiwa narodnych mjeńšin Minority SafePack je dalši wuspěch docpěła. Europski parlament přilubja so problemam narodnych mjeńšin wěnować a poskića so w tymle prašenju jako partner.

Tydźenja běchu so wodźacy zastupnicy iniciatiwy, kotraž žada sej zakótwjenje prawa mjeńšin we wustawkach Europskeje unije, z wodźacymi wosobinami Europskeho parlamenta zetkali a wo dalšim postupowanju wuradźowali. Iniciatiwa dyrbi nětko milion podpismow ze­zběrać, zo by žadanje Europskemu parlamentej jako zakonski naćisk předpołožić móhła.

Předsyda iniciatiwy Hans Heinrich Hansen ze Sewjerneje Schleswigskeje w Danskej, bywši předsyda Federalistiskeje unije europskich narodnych mjeńšin, móžeše přewšo pozitiwny rezimej swojeje rozmołwy z prezidentom Europskeho parlamenta Antonijom Tajanijom a toho kabinetnym kolegu Markusom Warasinom sćahnyć. Warasin přisłuša sam němskej mjeńšinje w Južnym Tirolu. Tajani bě Warasina za społnomóc­njeneho za narodne mjeńšiny powołał. To je Hansenej „jasne a dobre znamjo“.

Budyšin (CS/SN). „Młody być w NDR“ rěka tema lětušeho 28. Budyskeho foruma, wuhotowaneho wot Friedricha Ebertoweje załožby. Hač do jutřišeho je tam tójšto rozprawow wo wosobinskich dožiwjenjach słyšeć. Forum w Budyskej piwarni zahajachu dźensa z wědomostnje podkładźenym přednoškom dr. Ilka-Sasche Kowalczuka, sobudźěłaćerja zarjada za podłožki stasi. 1969 narodźenemu synej komformneje swójby, kiž započa so jako 15lětny statej NDR spřećiwjeć, bě lěto 1989 kaž wuswobodźenje a samowuswobodźenje. Wón rjekny, zo su w stawiznach a w přitomnosći přeco młodźi ludźo, kotřiž protestuja. Woni njejsu so hišće podali, ale maja ideale. Oponowacy pak běchu w diktaturomaj 20. lětstotka stajnje jenož nakromne skupiny, wjetšina dźě je sobu činiła. Hrana mjez pasiwnym přiměrjenjom a aktiwnej podpěru knježacych pak bě přewšo wuska.

Zabłudźeneho ptačka w cockpiće pasažěrskeho lětadła „Dreamliner“ dla je předewzaće British Airways lět z Londona do USA wotprajiło. Kós bě dźiwje lětajo cockpit blokował. Sobudźěłaćerjo na to hodźiny dołho spytachu jeho wućěrić. Tón pak so stajnje zaso chowaše. Pasažěrojo dyrbjachu do druheje mašiny přelězć, zo móhli dale lećeć. Što je so z ptačkom stało, předewzaće njezdźěli.

Pokład dźesać slěbornakow ze 16. lětstotka su ruscy archeologojo w šachowej figurje namakali. Kaž z Moskwy rěkaše, běchu fachowcy při twarskich dźěłach njedaloko katedrale Chrystusa-Wumóžnika w centrumje stolicy na drohotny pokład storčili. Pjenjezy běchu wokoło lěta 1540 w Moskwje a Twjeru zhotowili a za čas carja Iwana Złeho wužiwali.