Kulow/Spale (SN/BŠe). Wjetši dźěl pjenjez za ponowjenje bywšeje kapałki w Spalach je zaručeny. Dźensa je sakski ministerski prezident Stanisław Tilich (CDU) zamołwitym spěchowansku zdźělenku we wysokosći 269 000 eurow přepodał. „To je wuraz, zo na wjesne dźěle njezabywaja“, zwurazni Kulowski měšćanosta Markus Posch (CDU). Přichodnje chcedźa Spalsku kapałku jako žarowansku halu a sociokulturne zetkawanišćo wužiwać. Tež ewangelske Bože słužby chcedźa tam wotměwać. Tak zwjazuja wjacore funkcije w jednym domje. Tuchwilu pak je dom hišće w špatnym twarskim stawje. Cyłkownje 400 000 eurow je za ponowjenje pod škitom pomnikow stejaceje kapałki trěbnych.

Dalšu spěchowansku zdźělenku stej zapósłanča zwjazkoweho sejma Marja Michałkowa (CDU) a Stanisław Tilich Kulowskemu městu přepodałoj, zo móhli tamnišu wjacezaměrowu halu pod energetiskimi saněrowanskimi zaměrami ponowić. Tak dóstanu z programa „Mosty do přichoda“ 121 313 eurow.

Düsseldorf (dpa/K/SN). Z wulkoraciju w dźesać zwjazkowych krajach přećiwo pozdatnym podpěraćelam teroristiskeje milicy Islamski stat (IS) su policisća wjace hač 30 bydlenjow a wobchodow přepytali. Jedne z ćežišćow zasahnjenja běše Pulheim (wokrjes Rhein-Erft), hdźež tukachu na centralny skład radikalno-islamistiskeho zjednoćenstwa Wěrna nabožina. Zwjazkowy nutřkowny minister Thomas de Maizière (CDU) bě zjednoćenstwo Wěrna nabožina a wot njeho organizowane rozdźělowanje korana zakazał.

Obama hišće raz do Němskeje

Washington (dpa/K/SN). Krótko do swojeho wusłuženja 30. januara přileći prezident USA Barack Obama hišće raz do Europy. Dźensa wopyta wón Grjeksku. Jutře wječor wočakuja jeho w Berlinje. Do wotlěta bě wón europskim partneram wědźeć dał, zo je nadźije na kontinuitu w NATO. Jeho designowany naslědnik Donald Trump bě jemu w rozmołwje wulki zajim na zdźerženju strategiskich jadrowych poćahow wopokazał.

Konferency wo změnje klimy

Moskwa (dpa/K/SN). Hłowa Ruskeje federacije Wladimir Putin a nowy prezident USA Donald Trump staj prěni raz hromadźe telefonowałoj a při tym so naležnje za lěpše poćahi mjez swojimaj krajomaj wuprajiłoj. Wobě stronje stej sej wo tym přezjednej byłoj, zo je nětčiši staw njespokojacy. Putin wupraji so zwólniwy, z nowej administraciju USA wjesć přećelski dialog na zakładźe runoprawosće, mjezsobneho respektowanja a njeměšenja so do nutřkownych naležnosćow. W telefonaće rěčeštaj tež wo wójnje w Syriskej a wo boju přećiwo mjezynarodnemu terorizmej, Krjeml po telefonaće zdźěli. Putin a Trump dojednaštaj so, prawidłownje telefonować a so prawje bórze wosobinsce zetkać. We wólbnym boju bě so Putin za kandidata republikanow Trumpa wuprajił a po jeho njewočakowanym wólbnym dobyću jemu scyła jako jedyn z prěnich gratulował. Trump bě we wólbnym boju připowědźił, poměr k Ruskej zasadnje znowa zrjadować. Při tym njezataji, zo sej prezidenta Putina a toho politiku waži. Wuprajenja Trumpa běchu tež mjez republikanami njezrozumjenje zbudźili.

Moskwa (dpa/SN). Ruskeho ministra za hospodarstwo Alekseja Uljukajewa su zajeli, dokelž je pječa dwaj milionaj dolarow wobtykanskeho pjenjeza brał. Tole zdźěli statny wotkrywanski komitej, kotryž je prezidentej Putinej direktnje podstajeny. Uljukajew (60) je pjenjezy w zwisku ze spriwatizowanjom jednoho z ruskich wolijowych koncernow přiwzał. Zastojnicy běchu přepodaće pjenjez wčera wobkedźbowali, powěscernja Interfax zdźěli. Něhdyši naměstnik šefa narodneje banki Uljukajew je wot lěta 2013 mi­nister za hospodarske wuwiće. Jemu je so dotal poradźiło, zo ruske hospodarstwo při wšej krizy dale funguje.