Dokelž njebě wot staršeju nowy handy dóstał, je 13lětny w Lindauwje nad Bodamskim jězorom přiwuznych, přećelow a susodow ze 180 křiwdźacymi e-mailkami a internetnymi skazankami smartphonow a samo meblow w hódnoće wjac hač 5 000 eurow „bombardował“. Kaž přepytowanja kompjutera wunjesechu, bě 13lětny za to zamołwity, štož drje spočatnje prěješe, ale skónčnje přizna. Z ju­ri­stiskim chłostanjom wšak ličić njetrjeba.

Dokelž běchu wjacori wobdźělnicy demonstracije na kromje swjedźenja němskeje jednoty w Drježdźanach SNM-košlu woblečeni, změja so po zdaću před sudnistwom wusprawnić. Kaž wopomnišćo stasi w Hohenschönhausenje zdźěli, su ludźo w košlach bywšeje młodźinskeje organizacije­ NDR zakoń zhromadźowanja ranili. Nawoda wopomnišća Hubertus Knabe je njeskutk přizjewił.

Budyšin (dpa/SN). Zarjadniske sudnistwo w Budyšinje je wčera 38lětneho šefa wěstotneje firmy k pokuće 1 400 eurow zasudźiło. Muž bě w komentarje na Facebooku wobžarował, zo so hišće přemało domow za požadarjow azyla pali. Prěnjotnje běchu přećiwo 38lětnemu pokutu 6 000 eurow našćuwanja ludu dla wukazali, čemuž pak wón znapřećiwi. Dźensniši wukaz je hižo prawomócny.

Wojowanja traja

Kundus (dpa/SN). Rozestajenja wo sewjeroafghaniske město Kundus dale traja. Kaž dźensa policajski rěčnik Mahfosullah Akbari medijam zdźěli, tam přeco hišće rumowanska operacija běži. Město je w dalokej měrje pod kontrolu knježerstwa. Dotal je 14 wojakow a policistow kaž tež 120 talibanow žiwjenje přisadźiło. Wobydlerjo wěstotnym jednotkam wumjetuja, zo łža. Twjerdźenje, zo knježerstwo město kontroluje, po jich měnjenju nje- trjechi. Wone kontroluje jenož někotre dypki kaž policajski hłowny kwartěr.

Kritizuja brojenje dawkow