Kijew (dpa/K/SN). Na wuchodźe Ukrainy knježi nowy přiměr, najprjedy na tydźeń. Tak staj to němski wonkowny minister Frank-Walter Steinmeier a jeho francoski kolega Jean-Marc Ayrault na wopyće Kijewa wujednałoj. Do toho běchu proruske mocy hižo zdźělili, zo štwórtk wojować přestanu. Ruska strona to podpěruje. Němska a Francoska so hižo dlěje prócujetej, mjez Kijewom a separatistami po­srědkować. A tłóčitej na to, spjelnić dojednanja, kotrež běchu před połdra lětom w běłoruskim Minsku docpěli. Steinmeier a Ayrault pobyštaj dźensa we wuchodoukrainskim­ Kramatorsku, ležacym w konfliktnym teritoriju, ale kontrolowanym wot wójska knježerstwa.

Strasbourg (dpa/K/SN). Z eksistencneje krizy, w kotrejž Europska unija po su­dźenju prezidenta jeje komisije Jeana-Claudea Junckera tči, chce so zhromadźenstwo wudrapać. Inwestuje něhdźe 600 miliardow eurow přećiwo flawće hospodarstwa a přilubja, wěstotu znutřka a zwonka polěpšić. Juncker sprezentowa Europskemu parlamentej wčera cyły paket konkretnych projektow – wot swobodneho WLANa na zjawnych naměstach hač k planej pomocy za Afriku. Wurjadny­ wjeršk šefow statow a knje­žerstwow EU jutře, pjatk, w słowakskej stolicy Bratislavje ma w tym nastupanju widźomne wuslědki wunjesć a ludźi za zhromadźenstwo zaso bóle zahorić.

Wbohe to zahrodkowe palčiki! Přehusto so wone politisce, rasistisce a samo seksistisce znjewužiwaja, štož ma so nuznje změnić! Tole měnja přiwisnicy wosebiteje specije, kotřiž chcedźa so kónc tydźenja w durinskim Trusetalu na palči­kowym kongresu schadźować. Přećiwo znjewu­žiwanju mužikow z módrej abo čerwjenej čapku ma so zakročić, woni praja. Tak lěta 2006 załožena Mjezynarodna palčikowa strona z něhdźe 100 sobustawami pla­nuje, nastajić rezoluciju Zwjazkowej antidiskriminaciskej instancy.

Za trochu njeradźeny postrow policistam bu 26lětny wodźer awta w Ludwigshafenje pochłostany. Tak je wón zastojnikow nimojěducy z piwom w ruce strowił a sej samo hišće lunk popřał. Zastojnicy muža hnydom zadźeržachu a zwěsćichu 0,7 promilow alkohola w jeho kreji, za čož ma nětko pokutu płaćić.

Tel Aviv (dpa/SN). USA a Israel su so na rekordny­ wojerski pomocny paket 38 miliardow dolarow dojednali. Płaćenja wot USA měli so w lěće 2019 započeć a so potom­ po dźesać lětach zakónčić. Tole zdźěli dźensa israelski rozhłós. Amerika je najwažniši partner Israela. Zastupjerjo wobeju krajow su přez mě­sacy wo jednotliwych dypkach wura­dźowali. Pjenježna pomoc je najwyša jednotliwa podpěra w stawiznach USA.

Serbiska chce płoty twarić

Běłohród (dpa/SN). Kandidat za přistup k Europskej uniji Serbiska chce tysacy nowych ćěkancow wot swojeho teritorija wotdźeržeć a na mjezy k Makedonskej a Bołharskej płoty nastajeć. Kaž minister za dźěło Aleksandar Vulin dźensa w Běłohrodźe informowaše, je nětko načasu drastiske naprawy zahajić. W Serbiskej přebywa něhdźe 5 000 migrantow.

Kóždy pjaty z listom woli