Wjace wotpokazanych ludźi

Dienstag, 09. August 2016 geschrieben von:

Berlin (dpa/SN). Němska dźeń a wjace ludźom na mjezy zapowědźa, do kraja přińć. Jeničce w prěnich šěsć měsacach lěta su 13 324 wosobow na namjeznych přechodach abo lětanišćach wotpokazali. To je 50 procentow wjace hač 2015. Tole wuchadźa z wotmołwy zwjazkoweho knježerstwa na naprašowanje Lěwicy. Tež ličba wotsunjenych ćěkancow přiběra: Wot januara hač do junija su 13 743 migrantow do domizny wróćo pósłali, loni bě jich cyłe lěto 20 888.

Sto demonstrantow zatřělili

Addis Abeba (dpa/SN). Na demonstracijach přećiwo etiopiskemu knježerstwu je po informacijach organizacije Amnesty International něhdźe sto demonstrantow žiwjenje přisadźiło. Wěstotne mocy su njedaloko stolicy Addis Abeba z wótrej municiju na nich třěleli, kaž Amnesty International piše. Sta ludźi su so při protestach minjeny kónc tydźenja zra­nili. Demonstranća běchu sej politiske reformy žadali.

Žane pjenježne chłostanje

W japanskim Nagasakiju su dźensa 71. róčnicu zničenja města přez amerisku atomowu bombu wopominali. Při jeje rozbuchnjenju 9. awgusta 1945 běchu dźesaćitysacy ludźi zahinyli. Při měrowym pomniku dachu tradicionalnje hołbjam jako symbol měra wotlećeć (hlej wobraz). Minjenu sobotu běchu w Hiroshimje na prěnju atomowu bombu spominali. Foto: dpa/Ma Ping

Wuznamne zetkanje

Dienstag, 09. August 2016 geschrieben von:
Pětrohród (dpa/K/SN). W historiskej metropoli kraja je prezident Wladimir Putin dźensa hłowu Turkowskeje Recepa Tayyipa Erdoğana přijał. Po wottřělenju ruskeho bombowca přez turkowske wójsko loni w nowembru je to prěnje jeju zetkanje. W jednanjach dźěše mjez druhim wo miliardowy projekt płunowoda Turkstream a wo natwar atomoweje milinarnje w Turkowskej z pomocu Ruskeje.

Forum zahajeny

Dienstag, 09. August 2016 geschrieben von:
Montreal (dpa/K/SN). W kanadiskim Montrealu zahajichu dźensa 13. swětowy socialny forum. Na njón wočakuja 50 000 ludźi. Na zetkanju wobdźěla so wjac hač 1 000 organizacijow, předewšěm nje­knježerstwoweho razu. Předwidźanych je na wšě 1 200 jednotliwych zarjadowanjow, na kotrychž wobjednawaja temy kaž změnu klimy, šansy młodźiny a dawkowu sprawnosć.

Zastupnika pósłał

Dienstag, 09. August 2016 geschrieben von:
Berlin (dpa/K/SN). Na rozmołwy z Turkowskej po zwrěšćenym pospyće puča je wonkowny minister Frank-Walter Steinmeier (SPD) swojeho statneho sekretara do Ankary pósłał. Z kruhow turkowskeho knježerstwa je wšak njespokojnosć słyšeć, zo šef němskeje diplomatije tajkich wažnych wěcow dla wosobinsce njepřijědźe, je dźě wón hewak za direktne kontakty z Turkowskej.

Lubjenja Trumpa

Dienstag, 09. August 2016 geschrieben von:
Detroit (dpa/K/SN). Wuzwola-li wobydlerjo USA w nowembru Donalda Trumpa za prezidenta, přilubja jim kandidat republikanow nahladne dawkowe woló­ženja. „Amerikanizowanje, nic globalizowanje budźe naše nowe kredo“, Trump měni. Mjeztym je 50 wěstotnych ekspertow strony republikanow před tym warnowało, njekwalifikowaneho Trumpa za prezidenta wuzwolić.

Dialog wo prawicarstwje

Dienstag, 09. August 2016 geschrieben von:

Drježdźany (SN). „Prawicarstwo a prawicarski radikalizm w Sakskej“ je nowa tema, wo kotrejž na internetnej dialogowej platformje Sakskeje krajneje centrale za politiske kubłanje (SLpB) wot wčerawšeho diskutuja. Pod hesłom „Dajće nam so rozestajeć“ su wšitcy zajimcy přeprošeni, sej hač do 2. septembra argumenty wuměnjeć. „Trjebamy diskusijne městna, hdźež móža so wšitcy wobdźěleni škitani, ale kontrowersnje a kritisce rozestajeć. Na dialogowej platformje zaběramy so wědomje z kontrowersnymi temami aktualneho časa“, rozłožuje iniciatorka dialogoweho poskitka dr. Annette Rehfeld-Staudt.

Štyrjom zakładnym tezam wo prawicarskim radikalizmje móžeš na internetnej stronje přihłosować abo je wotpokazać kaž tež so k nim wuprajić. Pozadkowe informacije tohorunja dóstanješ.

Hižo w aprylu bě SLpB internetnu diskusiju na temu „towaršnostna kriza – ćěkańca“ přewjedła. Tehdy su 2 300 přinoškow zwěsćili, internetna strona bu 18 000 króć wužiwana.

To a tamne (09.08.16)

Dienstag, 09. August 2016 geschrieben von:

Z ćěkancom stał je so chinski turist w Němskej. Muž, kiž měješe jenož nachribjetnik sobu, bě po přizemjenju na Stuttgartskim­ lětanišću móšeń zhubił. Pytajo za policiju pak narěča wón sobudźěłaćerjow­, kotřiž so wo ćěkancow staraja. Předpołožichu jemu próstwowy formular a zapokazachu jeho do domu požadarjow azyla w münsterlandskim Dülmenje. Z pomocu tołmačerja móžeše wón po tydźenjomaj skónčnje swoje poło­ženje rozjasnić a dale jěć.

Dospołnje pjany hladar starownje ma nětko mjerzanje z policiju. Muž bě w schleswigsko-holsteinskim Oststeinbeku z 83lětnej wobydlerku hladarnju wopušćił. Při tym koleskaty stoł staruški powróći. Pěšk wobkedźbowaše, kak so hladar podarmo prócuje stoł zaso stajić­. Policisća naměrichu w jeho kreji­ štyri promile alkohola.

Zasudźenych wotškódnić

Montag, 08. August 2016 geschrieben von:

Berlin (dpa/SN). Zeleni žadaja sej po informacijach medijow spěšne wotškódnjenje homoseksualnych muži, kotrychž běchu w Němskej něhdy po paragrafje 175 zasudźili. Tole wuchadźa z naćiska, zdźěłaneho wot frakcije Zelenych w zwjazkowym sejmje, kaž powěsćernja dpa rozprawja. W zwjazkowej republice běchu splažne akwitity mjez mužemi hač do lěta 1994 chłostajomne. Wjacore tysacy muži běchu zdźěla k wjacelětnemu jastwu zasudźili. NDR bě paragraf 175 hižo lěta 1968 šmórnyła.

Iniciatiwa přećiwo reformje

Podstupim (dpa/SN). Ludowu iniciatiwu přećiwo planowanej wokrjesnej reformje w Braniborskej chcedźa hišće lětsa nazymu přewjesć. Tole je rěčnica frakcije CDU w krajnym sejmje připowědźiła. „Njebudźe problem, trěbne 20 000 podpismow za prěnju kročel znosyć“, zdźěli krajny předsyda CDU Ingo Senftleben medijam. Wón je přeswědčeny, zo so Braniborčenjo jasnje přećiwo planowanej reformje wupraja. CDU bě ludowu iniciatiwu před tydźenjomaj připowědźiła. Knježerstwo SPD a Lěwicy bě reformu wokrjesow srjedź julija wobzamknyło.

Ludźom dawki spušćić

Štyri tydźenje do wólbow krajneho sejma w Mecklenburgsko-Předpomorskej zahaji ministerski prezident Erwin Sellering (SPD, nalěwo) dźensa swoju tři tydźenje trajacu wólbnobojowu jězbu. W Tessinje je so wón w kupnicy z wobydlerjemi rozmołwjał. Lěta 2011 bě SPD wólby z 35,6 procentami jasnje před CDU dobyła. Tuchwilu by strona 22 procentow a tak mjenje hač CDU žnjała. Foto: dpa/Jens Büttner

Serbska debata

Neuheiten LND