Lammerta na wopyt přeprosył
Serbja na swjatočnosćach dnja jednoty w Drježdźanach zastupjeni byli
Drježdźany (SN/MkWj). Na swjatočnosće składnostnje Dnja němskeje jednoty běchu tež Serbja oficialnje do Drježdźan přeprošeni. Jich zastupowaštaj lětsa předsyda Domowiny Dawid Statnik a nawodnica Budyskeho Serbskeho muzeja Christina Boguszowa, kaž Dawid Statnik Serbskim Nowinam zdźěli. Tak wobdźělištaj so wobaj na ekumeniskej Božej słužbje a na swjedźenskim zarjadowanju w Semperowej operje. Po tym pobyštaj tež na přijeću zwjazkoweho prezidenta Joachima Gaucka w kongresowym centrumje w susodstwje Sakskeho krajneho sejma. Tam měješe předsyda Domowiny składnosć, z prezidentom zwjazkoweho sejma Norbertom Lammertom porěčeć, kiž bě swjedźensku narěč dźeržał. Statnik přeprosy Lammerta w tym zwisku na wopyt do Budyšina, kaž našemu wječornikej rjekny. Serbsku kulturu prezentowachu w sakskej krajnej stolicy wjacore folklorne skupiny, mjez druhim z Brětnje, Ćiska a Choćebuza.
Wo nadpadach na serbskich młodostnych njewědźała
Budyšin (CS/SN). Wiceprezidentka zwjazkoweho sejma Claudia Roth (Zeleni) je we wobłuku swjatka němskeje jednoty njedźelu Budyšin wopytała. W tamnišim „zelenym wobchodźe“ zetka so wona ze Svenom Scheidemantelom z towarstwa Budyšin wostanje pisany, z wokrjesnym předsydu Zelenych Jensom Bitzku, ze sakskim krajnym předsydu strony Jürgenom Kasekom a z bywšim předsydu Domowiny Janom Nukom. Kaž Roth rjekny, chcyše wona wědźeć: „Što so poprawom w Sakskej stawa?“ Předewšěm pak so prašeše, čehodla sej sakske knježerstwo tak ćežko čini přiznać, zo su problemy z prawicarskim radikalizmom. Politikarka chcyše zdobom wědźeć, kak móhło zwjazkowe knježerstwo pomhać. K tomu měještaj Scheidemantel a Kasek konkretne próstwy. Tak je wjac podpěry za čestnohamtske skutkowanje trjeba. Projekty měli wobstajnje spěchowane być. Žadali su sej wjac politiskeho kubłanja na šulach. Kritizowali su přitomni tež, zo je policija podwobsadźena a přešpatnje wuhotowana.
To a tamne (04.10.16)
Z nowym rekordom doby plahowar z Hessenskeje wubědźowanje wo najćeši kirbs: Z 901 kilogram ćežkim eksemplarom je so Matthias Würsching z Einhausena njedźelu w badensko-württembergskim Ludwigsburgu jasnje přećiwo konkurency přesadźił. Dotalny rekord 812 kilogramow z lěta 2015 je wón tak wo nimale sto kilogramow přetrjechił. Cyłkownje 25 plahowarjow ze wšeje Němskeje bě so wubědźowało. Druhe a třeće městno wobsadźištaj plahowarjej z Badensko-Württembergskeje a Sakskeje: Jeju kirbsaj pak wažeštej „jenož“ 512 a 502 kg.
Z hubu połnej 50-eurowkow su paducha na Mnichowskim oktoberskim swjedźenju lepili. Pjenjezy bě 28lětny dalšemu wopytowarjej ze zaka wućahnył. Jako pytny, zo jeho wobkedźbuja, chcyše wón pjenjezy spóžěrać. Policija pak pakostnika přiwšěm zaja.
Bombowu atrapu našli
Drježdźany (dpa/SN). Fachowcy policije dale pruwuja, hač wobsteji zwisk mjez wčera namakanej atrapu a bombowymaj nadpadomaj spočatk tydźenja w Drježdźanach. „Kolegojo dźěłaja z wotmachom, hladajo na bližace so swjatočnosće k Dnjej němskeje jednoty“, rjekny Wolfgang Klein z Drježdźanskeho generalneho statneho rěčnistwa. Sobudźěłaćerjo priwatneje wěstotneje firmy běchu wčera při jednym z Drježdźanskich mostow ze škleńcow a groćikow wobstejacu bombowu atrapu našli.
Chorownja so paliła
Bochum (dpa/SN). Po zahubnym wohenju w Bochumskej chorowni nima wohnjowa wobora hišće žane pokiwy na přičiny katastrofy, při kotrejž běštaj pacientaj žiwjenje přisadźiłoj. Płomjenja běchu so minjenu nóc w běhu mjeńšin přez wjacore etaže rozšěrili a tež třěchu docpěli. Cyłkownje 15 wosobow so při tym zrani, třo ćežko. Něhdźe 165 wohnjowych wobornikow bě zasadźenych. Wjacorych pacientow dyrbjachu wobornicy z balkonow wuchować, na kotrež běchu sej před płomjenjemi wućekli.
Ćah znjezbožił
Bywšeho israelskeho statneho prezidenta Shimona Peresa su dźensa w ...
Gauck: Za čłowjeske prawa jednać
Zaleži na Ruskej a Syriskej
To a tamne (30.09.16)
Tójšto wćipnych ludźi na pózdnim wječoru před wukładnym woknom apoteki w starym měsće – to bě ciwilnym zastojnikam Mnichowskeje policije podhladne. Stajnje zaso wostachu ludźo stejo a fotografowachu. Kaž zastojnicy zwěsćichu, běžeše na třoch monitorach erotiski film. Mějićelka apoteki pak njebě docpějomna. Hakle po hodźinomaj su monitory hasnyli. Nětko slědźa rozšěrjenja pornografiskeho materiala dla.
Chětro fatalnje skónčił je so nadpad rubježnika na jednu z Berlinskich korčmow. Minjenu nóc wokoło 2 hodź. bě maskěrowany muž do korčmy w Neuköllnje zastupił. Žadajo sej pjenjezy třěleše wón z trašawku do špundowanja. 50lětna korčmarka wza sej baseballowy bič a stupi so njeznatemu do puća. Jako jej tamni hosćo na pomoc přińdźechu, so rubježnik nastróži a so zminy.
Ludźi dočasnje njezasudźić
Němčan dr. Christoph Wowtscherk je w swojim doktorskim dźěle wukročenja přećiwo wukrajnikam w septembrje 1991 we Wojerecach jako socialny protest wopisał. Kak daloko so tehdyše połoženje we Wojerecach wot aktualneho na přikład w Budyšinje rozeznawa, wo tym je so Axel Arlt z nim rozmołwjał.
Hodźi so teza wo socialnym protesće tež na wukročenja přećiwo ćěkancam loni a lětsa w Sakskej nałožować?
Ch. Wowtscherk: Sym podawki w septembrje 1991 we Wojerecach jako socialny protest definował před pozadkom, zo zwuraznichu protestowacy swoju socialnu njespokojnosć. Na prašenje, hač móžeš tež druhe fenomeny generelnje tak posudźować, je ćežko wotmołwić. Njejsym přirunowanske přepytowanje přewjedł, tohodla sym z wuprajenjom kedźbliwy. Při njepřećelskej namocy přećiwo cuzym w 1990tych lětach běchu zawěsće tež na druhich městnach motiwy, kotrež su podobnu rólu hrali.
Mjenujeće mjez druhim wutworjenje skupin a alkohol jako katalyzatoraj tehdyšeho njepřećelskeho zadźerženja cuzym napřećo. Chowa so w nimaj wuchadźišćo nastawaceje namocy?
Maturanća wo skutkowanju stasi mjez Serbami tójšto noweho zhonili
Kak bě ministerstwo za statnu bjezstrašnosć za čas NDR ze Serbami wobchadźało a kak Serbow samych za čušlenje wužiwało? Wo tym je dr. Timo Meškank knihu napisał.
Budyšin (SN/MkWj). Dosć zajimawu a nazornu stawiznisku hodźinu su šulerjo 12. lětnika Budyskeho Serbskeho gymnazija minjeny tydźeń dožiwić móhli. Timo Meškank, priwatny docent na Lipšćanskej uniwersiće, předstaji jim swoju nowu knihu „Sorben im Blick der Staatssicherheit“.
Wo skutkowanju stasi, kaž ministerstwo w NDR mjenowachu, běchu serbscy młodostni we wobłuku wučby hižo słyšeli. Tónle specielny wid pak bě jim nowy a zdobom dobre wudospołnjenje, kaž po zarjadowanju rjeknychu.
