Karlsruhe (dpa/SN). Zwjazkowe wustawowe sudnistwo je wjacore chwatne próstwy přećiwo nócnemu zakazej, dom wopušćić, wotpokazało. „Z tym njeje rozsudźene, hač nócny zakaz Zakładny zakoń rani abo nic“, sudnistwo w Karlsruhe wčera zdźěli. Wo tym ma so we hłownym sudniskim jednanju rozsudźić. Wjacori skóržbnicy běchu sej žadali, zo sudnistwo z hnydomnym wukazom nócne wobmjezowanje swobodneho pohibowanja najprjedy raz zběhnje.

Knježerstwo ma wukaz za srědk, zo by dotal we wječornych hodźinach wotměwace so priwatne zetkanja wobmjezowało. „Zakaz słuži tak zasadnje legitimnemu zaměrej“, we wobzamknjenju rěka. Zdobom sudnicy zwěsćeja, zo fachowcy na tym dwěluja, hač je nócny zakaz kmany tutón zaměr docpěć. Na tamnym boku njemóža sudnicy spóznać, zo je naprawa „wočiwidnje přehnata“.

Po wšej Němskej zawjazowace rjadowanje płaći wot 24. apryla. We wokrjesach z incidencu nad sto njesmědźa ludźo mjez 22 a 5 hodź. dom wopušćić.

Apel turistiskich předewzaćow na zwjazkowe kraje nastupajo wotewrjenja

Berlin (dpa/SN). Nuza mnohich turistiskich předewzaćow z kóždym dnjom napołoženeje přestawki koronakrizy dla přiběra. Po najnowšim naprašowanju mjeztym kóždy štwórty přenajer dowolowych domow w Němskej wo tym rozmysluje, swój dom zawrěć. Dyrbjał-li turizm hakle wot junija zaso móžny być, by to dalšim 36,9 procentam ćežke brěmjo było, kaž z wčera wozjewjeneho naprašowanja Němskeho zwjazka wobsedźerjow dowolowych domow a Němskeho turistiskeho zwjazka wuchadźa. Runočasnje liča pućowanske běrowy a zarjadowarjo druhe lěto za sobu z masiwnymi hospodarskimi stratami.

Debata wo tym, mjenje klimje škodźacych maćiznow wužiwać, ma za mnje mjeztym něšto hysteriske a njerealistiske. Zeleni sej žadaja njezawrěć brunicowe milinarnje hakle w lěće 2038, ale hižo 2030. Zwotkel budźemy potom milinu brać, pak njemóža rjec. Pólska je připowědźiła, zo chce brunicowu jamu Turów pola Žitawy znajmjeńša hač do lěta 2044 dale wjesć. Je Pólsku hižo raz něchtó na to skedźbnił, zo to klimowym zaměram njewotpowěduje? Bórze budźemy wšitcy z elektroawtom jězdźić. Zo dyrbja maćiznu za baterije dźěći we Łaćonskej Americe kaž njewólnicy ze zemje škrabać, nikoho njezajimuje. Hłowna wěc, zo je awto klimje napřećo neutralne. A hdyž so takle rozhladuju: Wšitcy sobu činja. Bayerski ministerski prezident Markus Söder je naraz jedyn z najwjetšich škitarjow klimy. To móže ći Zelenych žel być, a hibanje Fridays for future móže doma wostać. A kajke kołwrótne ideje Zeleni wupjeku, hdyž na­zymu móc přewozmu, nochcu sej docyła ­wumolować. Marko Wjeńka

Budyšin (AD/SN). Zastupjerjo sakskich krajnych kołow, kotrež so w SPD, Lěwicy a Zelenych serbskim temam wěnuja, zetkachu so wčera k dalšej rozmołwje z wyšim měšćanostu Alexanderom Ahrensom (SPD) w Budyskej radnicy. Wospjet wobjednachu skutkownišu komunikaciju mjez zarjadnistwom a dźěłowym kruhom za serbske naležnosće města. Jeho rěčnik Benjamin Wirth poda ćežišća, kotrež měli najwšelakoriši zamołwići Budyšina w přichodnych měsacach rozjimać a rozsudnym gremijam k zwoprawdźenju poručić. Na přikład je w blišim času tajki dialog ze zamołwitej za kulturu kaž tež z wikowarjemi a turistiskimi přede­wzaćemi města planowany. Wažne je dale prašenje, kak móhli we wšitkich Budyskich kubłanišćach wjace wědy wo Serbach, wo serbsko-němskich poćahach a stawiznach młodym a młódšim wobydlerjam posrědkować.

Rozmołwni partnerojo běchu sej pře­zjedni, zo dyrbja zamołwići serbske naležnosće wobstajnje na wšěch runinach a při wšěch přiležnosćach w měšćanskim žiwjenju wobjednawać.