Berlin (dpa/SN). Kóždy dźesaty wólbo­kmany Europjan je po swójskim podaću kruće rozsudźeny, při Europskich wólbach 26. meje za prawicarskopopulistisku abo prawicarskoekstremnu stronu hłosować. To je wuslědk přepytowanja w nadawku Bertelsmannoweje załožby, kotrež su dźensa w Berlinje předstajili.

Po tym wučini podźěl tychle wolerjow 10,3 procenty. Na druhim boku podaštej 6,2 procentaj woprašanych, zo wěsće lěwicarskoekstremne abo lěwicarskopopulistiske strony wola. Nimale 52 procentow rjekny, zo njebychu swój hłós ženje stronam z tohole spektruma dawali. Prawicarske strony su za krótki čas stabilnu bazu wolerjow docpěli. Institut YouGov je so za studiju w januarje w dwanaće statach EU 23 725 wólbokmanych woprašał.

Drježdźany (dpa/SN). Z wosebitym ćahom po Němskej, Pólskej a Čěskej chce SPD hladajo na bližace so wólby Europskeho parlamenta za wjace mjezy přesahowace zhromadne dźěło a za europsku ideju wabić. „Ekspres Krkonoš“ wotjědźe jutře, sobotu, w Berlinje a zastanje hač do njedźele mjez druhim w Choćebuzu, Běłej Wodźe, w pólskej Jeleniej Górje a w čěskim Liberecu. Nimo europskich kandidatow SPD z Berlina a Drježdźan budu tež pólscy, čěscy a francoscy kandidaća w ćahu, cyłkownje něhdźe 130 ludźi. „Chcemy mjezy přesahowacy signal wusyłać“, rjekny Matthias Ecke, kandidat sakskeje SPD za Europarlament. Z jězbu po třoch krajach chcedźa wosebje na mjezy přesahowacy železniski wobchad skedźbnić. „Moderne železniske zwiski mjez wuchodom a zapadom su wuraz hromadu rosćaceje Europy. Tak sylnimy kulturnu wuměnu, škit klimy a wikowanje“, praji Ecke. Mjez druhim dźe wo elektrifikowanje čary mjez Berlinom a Wrócławjom, aktualne wuwiće železniskeje čary mjez Liberecom a Žitawu kaž tež wo podpěru EU za wot wuhla potrjechene kónčiny. Wólby Europarlamenta su 26. meje.

Najskerje najsławniši Wuchodny Friza swěta dóstanje bórze swójsku amplu. Město Emden chce swojeho čestneho wobydlerja Otta Waalkesa z wosebitymi amplowymi symbolemi počesćić. Jako motiwy za čerwjenu a zelenu fazu amplow planuja sławne „ottifanty“, kotrež bě Waalkes sam wunamakał. Hač móža plan přesadźić, njeje hišće jasne. Před lětom bě podobny pospyt města wobchadnych zakonjow dla zwrěšćił.

Kenguru na awtodróze namakała je policija na A3 njedaloko Würzburga. Ně­hdźe 50 centimetrow wulki bennett-kenguru bě zhromadnje ze sowami, husami a kačkami w awće skótneho lěkarja. 62lětny šofer twjerdźeše, zo je zwěrjata w Belgiskej kupił zo je po puću do Čěskeje. Dokelž muž žane dokumenty za zwěrjata njeměješe, je zastojnicy na awtodróhowym parkowanišću sćazachu.

Berlin (dpa/SN). „Zhubjena srjedźizna – njepřećelske poměry“, to je titul najnowšeho přepytowanja w nadawku SPD bliskeje Załožby Friedricha Eberta k aktualnemu stawej rozšěrjenja prawicarskoekstremistiskeho nastajenja w Němskej. Awtorojo zwěsćeja „skrućenje a normalizowanje prawicarskeho nastajenja wo­srjedź towaršnosće“. Tak je ličba ludźi, kotřiž so negatiwnje k požadarjam azyla wuprajeja wot 49,5 procentow w lěće 2016 na nětko 54 procentow rozrostła.

Wobaraja so wumjetowanjam

Karlsruhe (dpa/SN). Němska wobswětowa pomoc (DUH) dyrbi so wumjetowanju wobarać, zo swój status jako přetrjebarjow škitacy zwjazk znjewužiwa, zo by sej pjenježne lěpšiny zdobyła. Zwjazkowe sudnistwo w Karlsruhe je so dźensa z tutym prašenjom zaběrał. Wobsedźer awtoweho domu přećiwo organizaciji skorži. Ta je hižo we wjacorych městach zakazy dieselowych awtow přesadźiła. Tole čini wona z ryzy wobswětoškitnych přičin, kaž sama twjerdźi.

Ruski pas Ukrainjanam