Drježdźany (dpa/SN). Sakska FDP je wuhibki za nawrót do krajneho sejma stajiła. Na krajnym zjězdźe w Drježdźanach su liberalni wčera jednohłósnje swój wólbny program schwalili. Tón předwidźi mjez druhim sylnjenje wyšich šulow, zjednoćenje pjeć zjawnowobchadnych zaměrowych zwjazkow na cyłosakski zwjazk ­a zniženje wólbneje staroby wot 18 na 16 lět.

Sobotu bě strona swoje předsydstwo znowa wuzwoliła. Při tym zepěrachu so na nazhonity personal. Wjelelětny předsyda Holger Zastrow wostanje krajny šef strony. Načolneho kandidata za wólby sakskeho sejma su delegaća 50. krajneho zjězda znowa za předsydu wuzwolili, byrnjež wón poměrnje zdźeržliwe přihłosowanje žnjał. 139 delegatow (64,4 procenty) hłosowaše za noweho stareho předsydu, 73 delegatow hłosowaše z „ně“, štyrjo so hłosa wzdachu. Napřećiwneho kandidata Zastrow žanoho njeměješe. Generalny sekretar wostanje Torsten Herbst ze 74,9 procentami.

Komisija EU nowe jednanje přećiwo Pólskej a Rumunskej zahajiła

Brüssel (dpa/SN). W zwadźe wo zachowanje njewotwisneje justicy w Pólskej a Rumunskej komisija Europskeje unije ćišć dale zesylnja. Brüsselska instanca je minjeny tydźeń dalše přepytowanja přećiwo Pólskej systematiskeho politiskeho wobwliwowanja sudnikow přez knježerstwo dla zahajiła. Nimo toho hrozy komisija EU Rumunskej z naprawami, dyrbjał-li kraj korupcije dla zasudźenemu politikarjej chłostanje spušćić.

Prawnostatnosć we wšitkich čłonskich statach Europskeje unije je rozsudna za dalewobstaće­ zhromadźenstwa, rjekny wiceprezident komisije EU Frans Timmermans. Nažel ma unija na tym polu dźeń a wjetše problemy. Tu dyrbjało so wjace činić. W komisiji debatuja tuchwilu wo raznišich naprawach přećiwo krajam, kotrež zakładne hódnoty a prawidła ranja. Konkretne namjety chcedźa pak hakle w juniju předpołožić.

Zwada mjez dźěćimi na hrajkanišću před hosćencom w badensko-württembergskim Lottstettenje je w bijeńcy mjez dorosćenymi z wjacorymi zranjenymi wuwjercholiła. Po tym zo běchu so starši do zwady dźěći měšeli, so nalada mjez nimi přiwótři. W hosćencu so dale wurěčowachu a so skónčnje bijachu. Šesćo so zranichu, třo dyrbjachu samo do chorownje. W hosćencu bičcy tójšto rozbichu. Policija je z wjacorymi zastojnikami zapřimnyła.

Kurioznu wurěč měješe smaler w Awstriskej, jako jeho policisća přespěšneho jězdźenja dla zadźeržachu. Zastojnikam 27lětny rozłoži, zo chcyše awto sušić, po tym zo bě je runje wumył. Wón bě na dróze ze 118 km/h po puću, na kotrejž je 60 km/h dowolenych. „Awto bě woprawdźe mokre“, zastojnicy wobkrućichu. Přiwšěm dyrbi šofer pokutu płaćić a jězbnu dowolnosć na dwaj tydźenjej wotedać.

London (dpa/SN). Britiska premierministerka Theresa May wo to prosy, wustup kraja z Europskeje unije na 30. junij přestorčić. To pisa wona w dźensa wozjewjenym lisće prezidentej rady EU Donaldej Tuskej. Poprawom měješe Wulka Britaniska hižo 12. apryla Europsku uniju wopušćić. May je přesłapjena, zo njeje brexit hišće „wuspěšny a rjadowany“. Tusk je so mjeztym za to wuprajił, jón wo cyłe lěto přestorčić.

Chcedźa Tripolis zdobyć

Tripolis (dpa/SN). Wliwapołny libyski general Chalifa Haftar je swojim jednotkam přikazał, stolicu Tripolis zdobyć. We widejowym poselstwje rěčeše wón wo „operaciji k wuswobodźenju Tripolisa“. W stolicy sedźi mjezynarodnje připóznate knježerstwo, kotrež z Haftarom wo móc w kraju wojuje. Toho jednotki su minjeny čas wulke dźěle Libyskeje zdobyli a steja 30 kilometrow před Tripolisom.

Za spěšniši twar milinowodow