Eksistuje serbska aktowa fotografija?
Něhdźe dwaceći zajimcow je sej wčera w Budyskim Serbskim muzeju we wotewrjenym rozmołwnym kole ze simultanym přełožkom k temje „Fotografija jako dokument a dopomnjenka“ nazhonjenja wuměnjało a wo wuznamje fota tež w dźensnišim času diskutowało.
Fryco Kitlaŕ
Wo spomóžnym žiwjenju a wuhlu
Choćebuz (SN/CoR). Mjeztym hižo štwórty raz přeprošatej Braniborska techniska uniwersita (BTU) Choćebuz-Zły Komorow a Serbski institut 26. nowembra na konferencu, na kotrejž „spomóžne (serbske) žiwjenje“ w srjedźišću steji. Kaž loni podpěruje ju tež lětsa Załožba Rosy Luxemburg. Tónraz chcedźa so pod hesłom „Wuwiwanske perspektiwy za Łužicu“ na senatowej žurli Choćebuskeje BTU přichodej kónčiny – wosebje po wuhlu – wěnować. „Wšudźe hladaja na hospodarske spěchowanje – chcemy krok wróćo stupić a kulturne potenciale Łužicy do srjedźišća stajić“, rěka w přeprošenju.
Po zahajenskim čitanju Róže Domašcyneje přednošuje dr. Lutz Laschewski z katedry za socialnowědomostne prašenja za wobswět BTU wo kulturnej identiće jako problem abo potencial za regionalne wuwiće. Dr. Fabian Jacobs přinošuje Slepjanske wobkedźbowanja, Dagmar Schmidt z towarstwa Łužiske perspektiwy rozmysluje wo planje B za Łužicu a dr. Měrćin Wałda předstaji aktualne wuwiće iniciatiwy Serbski sejm.
Hłownych wójnskich złóstnikow zasudźili
W oktobru 1946 skónči so w Nürnbergu z wuwjedźenjom smjertnych wusudow prěni proces přećiwo němskim hłownym wójnskim złóstnikam. Knježerstwa USA, Sowjetskeho zwjazka, Wulkeje Britaniskeje a Francoskeje běchu 8. awgusta 1945 rozsudźili, mjezynarodne sudnistwo z wobskóržbnikami a wosom sudnikami štyrjoch dobyćerskich krajow wutworić. Wone je 218 dnjow přećiwo 22 hłownym wójnskim złóstnikam jednało, štož dokumentowaše w 42 zwjazkach.
Hłowny złóstnik čisło 1. wjednik NSDAP a němskeho stata Adolf Hitler, kaž tež reichski šef SS Heinrich Himmler, propagandowy minister a bohot Berlina dr. Joseph Goebbels njeběchu mjez wobskorženymi, dokelž běchu sej žiwjenje wzali. Krótko do zahajenja procesa w awgusće 1945 je so tež reichski organizatoriski nawoda NSDAP a šef nacistiskeho winowatostneho dźěłarnistwa Robert Ley sam morił. Hłowny reprezentant wójnskeje industrije Gustav Krupp von Bohlen und Halbach njebu ćežkeho schorjenja dla wobskorženy.
Žiwjenske dopomnjenki chutnje a lóštnje předstajił
Budyšin (CS/SN). Nowa sezona woblubowaneho rjadu zarjadowanjow Němsko-Serbskeho ludoweho dźiwadła „Łužiske litararne dopołdnjo“ je so zawčerawšim, njedźelu, z małej sensaciju zahajiła: Składnostnje 80. narodnin čitaše Jurij Koch ze swojeje runje wušłeje knihi „Windrad auf dem Dach“. Do toho bě intendant dźiwadła Lutz Hillmann Kocha, kiž je zdobom čestny čłon domu, jako najčasćišo hrateho žiweho awtora wuzběhnył. Bjez jeho kruchow njemóhł sej Hillmann repertoire dźiwadła předstajić.
Premjera poradźena była
Kufa chcyła přichodnje kóžde lěto nazymski koncert sobu wuhotować
Wojerecy (SN/JaW). Prěni nazymski koncert w nowym Wojerowskim wobydlerskim centrumje Piwarska hasa 1 je so poradźił. To je facit, kotryž sćahnychu hišće wčera sobudźěłaćerka Załožby za serbski lud a zamołwita za nazymske koncerty Marija Swierczekowa, regionalna rěčnica Domowiny za Wojerowski region Christina Šołćina kaž tež wjacori hosćo. Muska spěwna skupina Přezpólni a hudźbnicy su ze swojimi poskićenjemi publikum w poprawnym zmysle słowa zahorili.
Nowinka dźěćom
Tež serbšćina prezentna była
Frankfurt nad Mohanom (SN/CoR). Na wčera zakónčacenych Frankfurtskich knižnych wikach bě tež serbšćina prezentna. Tak je Benedikt Dyrlich na prezentaciji swojeje zběrki „Surreale Umarmung“ při čitanju nakładnistwa Pop-Verlag Ludwigsburg na wustajenišću kulturneho ministerstwa Rumunskeje tež serbski tekst z runje w LND wušłeje knihi „Zlět zelenych wuchačkow“ přednjesł. Hižo sobotu prezentowaše serbski basnik zhromadnje z Mićom Cvijetićom z Běłohroda nowu serbsko-serbisku zběrku „Janske nocy“ na wustajenišću kulturneho ministerstwa Serbiskeje.
Serbšćina bě tež na wustajeńcy knihow z Ruskeje dožiwjomna. Tam předstaji Załožba Howanskeho z města Woronježa knihu aforizmow znateho spisowaćela Arkadija Dawidowiča, a to w třinaće słowjanskich rěčach, mjez druhim w hornjo- a delnjoserbšćinje. Projekt nasta jako wosebita edicija składnostnje 150. róčnicy pansłowjanskeje zhromadźizny 1867 w Pětrohrodźe, a to w kooperaciji wjacorych słowjanskich akademiskich institucijow.
„Zlět zelenych wuchačkow“ w Smolerjec kniharni
Budyšin (smi/SN). „Lyrika Benedikta Dyrlicha je zawěrno jara naročna,“ praji lektor Pětr Thiemann, jako zawjedźe wčera wječor něhdźe 25 hosći Smolerjec kniharnje do knižneje nowostki Ludoweho nakładnistwa Domowina. „Šěrokosć zmysła, kiž w słowach tči, sej žada, so hłuboko do wobrotow zanurić, zo by dimensiju spóznał, kotruž w sebi noša.“
Podźakowawši so za wunošne dźěło z awtorom pak Thiemann přitomnych njewottraši. Skerje zbudźi wćipnotu na premjerne čitanje ze serbskorěčneje zběrki basnika a publicista, kotruž je Drježdźanska wuměłča Fee Vogler ilustrowała. Jednaćelka nakładnistwa Marka Maćijowa přepoda Benediktej Dyrlichej awtorski eksemplar publikacije a wupraji jemu jako swěrnemu awtorej nakładnistwa kaž tež Thiemannej jako lektorej swój dźak.
Serbske teksty a spěwy ludźi w stolicy zahorili
Berlin (AW/SN). Holči chór Berlinskeje Uniwersity wuměłstwow (UdK) je w stolicy zhromadnje z publikumom na třoch předstajenjach kónc tydźenja w cyrkwi swjateje Hilžbjety do předstajenja Ottfrieda Preußleroweje opery „Krabat“ zaspěwał spěwy w serbskej rěči. Nimale 200 ludźi so na kóždym wupředatym zarjadowanju za sobuspěwanje spěwow „Wulkeho Słowjanow splaha“, „Běži woda“ a „Rjana Łužica“ zahori.
