Aus der aktuellen Ausgabe vom Donnerstag, 17 August 2017

Praha (ČŽ/K/SN). 32 stronow, hibanjow a zeskupjenjow by chcyło do přichodneho čěskeho sejma. Sydom wjac hač lěta 2013 a cyłkownje telko kaž hišće ženje po zesamostatnjenju kraja 1991 nastupi 20. a 21. oktobra ze swojimi kandidatami k wuzwolenju do delnjeje komory. Po­dłožki zapodachu wšitke w sejmje zastupjene strony kaž ČSSD, ANO, KSČM, ODS, TOP 09, KDU-ČSL a dalše. Ale tež Sta­rosća, Zeleni a Piraća chcyli skónčnje do njeho­ zaćahnyć.

Mjez nowonastatymi zeskupjenjemi rěka jedne Radostne Česko a tamne Dobrá volba, produkt něhdyšeho městopředsydy TOP 09 Pavola Lukše. Wuhlady na wuspěšne wobstaće maja dźiwajo na tuchwilne­ woprašowanja dotalne strony koaliciskeho knježerstwa a strony opozicije. Přemóžaca wjetšina wo zastupnistwo w sejmje so prócowacych hibanjow a zeskupjenjow budźe pak za­wěsće „do měsačka“ hladać, zwrěšćiwši na zadźěwku w podobje pjeć procentow. Hinak hač 2013 pokazuje pak přeco hišće wšo na to, zo tónkróć ANO dobudźe.

Washington (dpa/K/SN). Po raznej kritice, kotruž běchu na prezidenta USA Donalda Trumpa sypali jeho „miłeho“ nastajenja k rasistiskej namocy w Charlottesvillu dla, je wón wčera nablaku dwaj teamaj poradźowarjow w Běłym domje rozpušćił. Krótko do toho bě wšak so hižo šukotało, zo je jedyn z woneju gremijow bjeztoho z dźěławosću přestać chcył. Z tamneho bě w minjenych dnjach hižo cyły rjad ludźi z prezidentom njespokojom wotešoł, mjez nimi šef Intela Brian Krzanich. Spomnjenej gremijej stej so dotal zrědka schadźowałoj. Rozsudźeć njejstej ničo móhłoj. Trump bě jej bóle za to zasadźił, zo byštej za medije skutkownje jeho bliskosć k hospodarstwu demonstrowałoj. Něhdyšej prezidentaj George H. W. Bush a George W. Bush Trumpa tohorunja šwikataj. USA dyrbja „rasistiski fanatizm, antisemitizm a hidu wotpokazać“, wonaj zhromadnje wozjewištaj. Při namócnosćach w Charlottesvillu bě žona žiwjenje přisadźiła.

Twarja zepěranišćo w Očakowje njedaloko połkupy Krim

Kijew (SN). Ukrainscy a ameriscy wojacy twarja zhromadnje z ciwilnymi firmami na juhu Ukrainy nowe wojerske zepěranišćo. Pječa je twarska brigada wójska USA hižo w aprylu započała w Očakowje tak mjenowany operaciski centrum twarić, kotryž maja ukrainscy a ameriscy wojacy zhromadnje wužiwać.

Očakow je małe přistawne město, 120 kilometrow wot mjeztym ruskeje połkupy Krim zdalene. Twar wotměwa so we wobłuku wojerskeje pomocy USA swojim zwjazkarjam pod mjenom Foreign Military Construction Sales.

Po informacijach wjacorych medijow je twarska brigada Seabees zepěranišćo „Očakow Naval Base“ 25. julija oficialnje twarić započała. W stejišću mariny USA rěka: „Nowe zepěranišćo je nam wulki wuspěch. Naše prócowanja, pomoc zapada na Ukrainje zaručić, su wažny faktor za narodnu wěstotu a zakitowansku infrastrukturu.“ To rjekny nawoda twar­skeje jednotki Jason McGee.

Słyšiš-li powěsć wo zahajenym insolwencnym jednanju, mysliš awtomatisce na rozbiće potrjecheneho předewzaća a na pušćenje njeličomnych ludźi. Fakt je, tajkich budźe w Budyskej Łužiskej ćišćerni nahladnje mjenje. Přiwšěm to boli, dokelž zwisuje z kóždym tež wosobinski dóńt. Ale kaž tak husto w žiwjenju njeje tež tu swět jenož čornoběły. Je šansa, zo ćišćernja w Budyšinje wostanje – nic kaž w Zhorjelcu, hdźež po konkursu ćišćernje Maxroi žana wjace njeje. Nowa etapa w insolwency Łužiskeje ćišćernje ma tomu słužić, telko ćišćerskeje posłužby kaž móžno w sprjewinym měsće zdźeržeć. To rěka, saněrowanscy fachowcy prócuja so hromadźe z jednaćelstwom wo to, tež tradi­ciju serbskeho nowinyćišća tu zachować. Wězo je to jeno přilubjene. Wšako nichtó tuchwilu njewě, što pruwowanje třoch wariantow móžneje perspektiwy na kóncu wunjese. Axel Arlt

Hilversum (dpa/SN). Nižozemska poli­cija je dźensa muža zajała, kiž bě rano w twarjenju zjawnoprawniskeho rozhłosoweho sćelaka w Hilversumje pola Amsterdama žonu jako zastajenču wzał. Specialna jednotka akciju njekrawnje skónči. Wot skućićela z nožom wohrožena žona wosta njezranjena. Najebać to so lěkarjo wo nju staraja. Muž bě žonu z nožom nuzował,­ z nim do twarjenja hić. Tam sej wón žadaše, ze zastupnikom ameriskeho sćelaka CNN rěčeć móc.

Irmgard Kulejowa, jedna z najwuznamnišich serbskich ludowych wuměłčow, swjeći dźensa w Bukowje pola Grodka 90. narodniny.

Rodźena 17. awgusta 1927 w Berlinje wopytowaše wona často swoju wowku w jeje Bukowskim domje při jězoru. Tam słušeštej serbska rěč a kultura k wšědnemu dnjej. Po tym zo bě so 1938 ze swojej maćerju doskónčnje do Bukowa přesy­dliła, ju jeje tehdyši wučer za serbstwo zahori.

Čas žiwjenja je Irmgard Kulejowa w swojich njeličomnych mólbach serbske wjesne žiwjenje a wosebje ludźi zwobrazniła a tak za přichodne generacije zwěčniła. Wo jeje žiwjenskim skutku eksistuja­ mjeztym film, kniha, hoberski muzealny skład a njeličomne nowinske publikacije. Wobdźěliła je so na wšěch Festiwalach serbskeje kultury a 1986 na Dnjach ludoweje kultury Choćebuskeho wobwoda w Berlinje. Po politiskim přewróće móžeše wuměłča w Spěchowanskim kruhu za serbsku ludowu kulturu a we Łužiskim domizniskim towarstwje dalše akcenty serbskeje ludoweje kultury sadźeć.

Sydom stejnišćow sakskich powołanskich akademijow dóstanje jednotne wonkowne mjezwočo. Serbski narok Budyskeje akademije njebu dotal dosć wobkedźbowany.

Budyšin (CK/SN). Diana Karbe a Paul Schuster staj mjezypruwowanja złožiłoj. Wonaj studujetaj financny management na Budyskej studijnej akademiji. Prak­tiski dźěl wukonjataj we Wojerecach. Diana­ Karbe z Pančic-Kukowa skutkuje w Dźěłaćerskim dobroćelstwje Łužica, Radworčan Paul Schuster we Łužiskim centrumje za technologiju. Hdyž so za něšto tydźenjow, po semesterskich prózdninach, na wukubłanišćo wróćitaj, njebudźe wone hižo tajke kaž tón dźeń, jako běštaj so do praksy podałoj.

Hodźij (AK/SN). Wjeselo a njesćerpnosć začuwachu Lara Hanusch a Alexander Natusch z rjadownje 3A kaž tež Aaron Niklas­ z rjadownje 4 B Zakładneje šule Hodźij. Z dalšimi šulerjemi serbšćiny sadźichu­ woni zańdźeny pjatk na nutřkownym dworje šule jabłučinu družiny złotak (Goldparmäne).

20.8.  15:00  ST 1922 Radwor

   – SZ Großnaundorf

26.8.  17:00  Zeleno-běli Bukecy

   – ST 1922 Radwor

3.9.  15:00  ST 1922 Radwor

   – SZ Wjelećin

17.9.  10:30  LSV Hory 1990

   – ST 1922 Radwor

24.9.  15:00  ST 1922 Radwor

   – Wojerowski FC

30.9.  15:00  Póst Germania Budyšin

    – ST 1922 Radwor

8.10.  15:00  ST 1922 Radwor

   – Módro-běli Kulow

22.10.  15:00  ST 1922 Radwor

  – Rakečanske ST

28.10.  14:00  Motor Kumwałd

  – ST 1922 Radwor SN

Drohotka Ramnow – ST Radwor 2:1 (1:1)

Zestawa hosći: Kral – Henka, Šěrak, Omran, Hančik, Nuk, Schild (77. Wjeńka), von Karwin, Bejmak, Schulze, Kurjat (73. Mark)

W prěnjej hrě we wokrjesnej wyšej koparskej lize dyrbješe nowačk ST Radwor w Ramnowje nastupić. Chowancy trenarja Pětra Bejmaka chcychu sej z angažowanym hraćom dobry start do noweje sezony zawěsćić. Faworit pak běchu cyle jasnje domjacy. Přez nimale cyłu hru mějachu woni pólnu přewahu a wjace šansow. Radworčenjo spytachu z wulkej koncentraciju a z wěsteho škita hru Drohotki dalokož móžno haćić.