Aus der aktuellen Ausgabe vom Mittwoch, 25 April 2018

Nimale so dótknyłoj

Budyšin. Lědma chutnje brał je dotal njeznaty šofer zawčerawšim rano na awtodróze A 4 při wotbóčce Budyšin-wuchod wěstotny wotstawk k před nim jěducym awtam. Wón tak smaleše, zo so jeho storkawa nimale teje před nim jěduceho dótkny. Agresiwneho zadźerženja dla čuješe so 29lětna wodźerka awta nuzowana a přizjewi tole policiji. Tež dalši šoferojo běchu potrjecheni. Pokiwy přijimuja pod telefonowym čisłom 03591/ 36 70.

Na železnym zwonje z wěže Róžeńčanskeje putniskeje cyrkwje, kotryž steji blisko putniskeje łuki, je Wojerowska firma R&S w nadawku klóštra Marijineje hwězdy tele dny z wosebitej techniku zerzawc wotstroniła. Potom su zwón znowa wobarbili, tak zo so wón nětko w nowym šaće prezentuje. Zwón bu hižo za čas poslednjeho administratora patera Ubalda Kansyja wuměnjeny. Nětko ma čestne městno při putniskej łuce pod lipami, kotrež su w formje křiža wosadźene. Foto: Jan Kral

Dwuskokowa reja wopřijima dwaj skokaj w jednym pohibje. Čłonojo Smjerdźečanskeje rejwanskeje skupiny hnydom cyłu reju z tym pjelnja a su ju kaž tež tamne naročne reje njedawno w Čěskej nastudowali a wufilowali. Pjatk popołdnju podachu so z busom, w kotrymž chowachu so mjez rejwarjemi tež tójšto rekwizitow, do čěskeho Janova nad Nisou. Pod nawodom Dietera Wendischa započinachu hnydom po wječeri z prěnjej pót ćěrjacej probu.

Wosebite wjeselo mějachu młodźi rejwarjo při sćoplenju. Při tym zaklinčachu mjenujcy spěwy Měrćina Weclicha, štož wubudźi dobru naladu, byrnjež jara napinace było. Sobotu rano hnydom po snědani startowachu do dalšeho treningoweho dnja, kotryž traješe hač do pózdnjeho wječora. Wječork dachu hišće zhromadnje wuklinčeć a tež tam wězo rejwachu a zhromadnje spěwachu. Treningowe lěhwo bě idealny přihot na nowu rejwansku sezonu, za kotruž je tójšto wustupow planowanych. Tak doleća sej Smjerdźečenjo mjez druhim na festiwal do dalokeho Peru. Chětro wučerpani, ale přewšo spokojni z wuslědkom lěhwa so wšitcy do domizny nawróćichu.

Cityjowy management prócuje so wo atraktiwniše stare město

Wojerecy (AK/SN). Z wosom projektami chcedźa Wojerecy lětsa swoje stare město atraktiwniše sčinić. „Za to mamy etat 50 000 eurow“, rozłoži architektka Dorit Baumeister na wčerawšim posedźenju měšćanskeje rady. Hromadźe z Frankom Graumüllerom wona we wobłuku cityjoweho managementa projekty přewodźuje. Su to zarjadowanje „Staroměšćanske kuzło“ wot 1. do 3. junija, dźiwadło we wobydlerskim centrumje Piwarska haska 1, testowy wobchod, wozelenjenje hrodu, wuhotowanje Teschenskich wikow a parkowanišća za kolesa při Janskej cyrkwi kaž tež projektaj „Aktiwne wukładne wokno“ Röthigec předawarnje zakuskow a „Bulwar Cyrkwinska hasa“.

Worklecy. Z tradicionalnym nalětnim rjedźenjom chce Worklečanski zwjazk CDU kupowy park wurjedźić a tak k porjeńšenju wsy přinošować. Wšitcy wjesnjenjo, předewšěm wobydlerjo nowo­twarskeho sydlišća při kupowym haće, su namołwjeni, so sobotu, 28. apryla, na nalětnim rjedźenju wobdźělić. Woni zetkaja so w 9 hodź. při pomniku Michała Hórnika. Njech sej kóždy hrabje abo motyku sobu přinjese.

Předewzaće Missale stara so nimo transportow tež wo wotpadki

Wot lěta 2003, jako załoži Mat­thias Missale małe transportowe předewzaće, firma njepřestawajcy rosće. W minjenych lětach je so zawod w Miłoćicach wuwił na při­pó­znate a wuspěšne transportowe pře­de­wzaće. Nimo toho, zo woža nakładne awta­ firmy najwšelakoriše twory, wěnuja so wot lěta 2011 dźeń a bóle tomu, wotpadki składować a předźěłować. We wosebitej formje su so Missalic wusměrili na to, drjewowe wotpadki zběrać, wobdźěłować a dale dawać, zo bychu hišće wužitk žnjeli.

SJ Chrósćicy

– Drježdźanski SC 2:2 (1:0)

Zestawa domjacych: Stein – Cyž, Sen­tivan, Hrdlitschka, Šiman, Henčel, G. Zahrodnik, Runt, Młynk, J. Bogusz (76. L. Zahrodnik), Žur

Prěnje mustwo SJ Chrósćicy je minjenu njedźelu doma přećiwo poslednjemu tabulki Drježdźanskemu SC hrało. Josef Nemec a Petr Králíček čerwjeneje karty dla hrać njesmědźeštaj a Maksimilian Zahrodnik dyrbješe po pjatej žołtej karće přihladować. Nimo toho su wjacori hrajerjo zranjeni, tak zo maja tuchwilu wosebje w ofensiwje personalne problemy.

W poslednjej dypkowej hrě w blido­teni­sowej wobwodnej klasy dyrbješe prěnje­ mustwo DJK Kulow/Hózk pola ST Porchow nastupić. Z dobyćom bychu druhe městno w tabulce skrućili, štož by rěkało postup do druheje wobwodneje ligi.

Po hrě móžachu so Kulowčenjo radować, dokelž duel jasnje z 12:3 dobychu. Jeničce dwójka Matthias Barth/Pětr Měškank a pola jednotliwcow Pětr a Křesćan Měškank dyrbjachu so swojim přećiw­nikam kłonić. Ći tamni, Michał Měškank, Matijas Bart, Jens-Pětr Meier a Křesćan Domaška, běchu w hrach jednotliwcow njepřewinjomni. Z tutoho městna wutrobnu gratulaciju k postupej.