Aus der aktuellen Ausgabe vom Mittwoch, 25 April 2018

Harig kandidaturu wobkrućił

Budyšin. Budyski krajny rada Michael Harig (CDU) kandiduje dale za zastojnstwo prezidenta wuchodoněmskeho zwjazka lutowarnjow (OSV). To wobkrući wón najebać wčerawše wozjewjenje, zo namjetuja komunalne načolne zwjazki Sakskeje, Saksko-Anhaltskeje, Braniborskeje a Mecklenburgsko-Předpomorskeje Lipšćanskeho wyšeho měšćanostu Burkharda Junga (SPD) za tule funkciju.

Zajim za stejnišćo Siemens

Zhorjelc. Lübeckske předewzaće za medicinsku techniku Euroimmun ma zajim stejnišćo koncerna Siemens w Zhorjelcu přewzać. Nimo ležownosće na Lutherowej chce mějićel Euroimmun Winfried Stöcker tež hale a sobudźěłaćerjow krok po kroku přewzać, zdźěli wón wčera němskej powěsćerni dpa.

Filipinjenjo do Čěskeje

Chrósćicy (SN/JaW). Mjeztym 5. dźěłarničku pod hesłom „Serbska narodna drasta“ je Kamjenska župa „Michał Hórnik“ wčera na Chróšćanskej farje přewjedła. Kaž zdźěli regionalna rěčnica za Ka­mjen­ski teritorij Katharina Jurkowa, wěnuja so na nich stajnje rozdźělnym dźěłam na narodnej drasće – tónraz zhotowjenju a rjedźenju čěpcow a bantow. Předstajiła je dźěła něhdźe 20 zajimčam wěcywustojna hotowańča Hanka Kubašowa z Pančic-Kukowa. Jej po boku bě Katrin Matkec z Łusča. Dalša hotowańča bě chrosće dla zadźěwana. „Z nazhonitej a młódšej žonu mějachmy dobru měšeńcu. Tak móžachmy sej nazhonjenja a měnjenja tež generacije přesahujo wuměnjeć“, tak regionalna rěčnica.

Retomas zarjadowanjow w jubilejnym lěće

Budyšin (SN/bn). We wobłuku projekta „1 000 lět Budyski měr“ su wjacori akterojo na wčerawšej nowinskej konferency w Budyskim Kamjentnym domje tuchwilny staw rozjimali a přichodne za­rjadowanja předstajili.

Budyšin/Choćebuz (SN/JaW). Twarske dźěła na Choćebuskim Serbskim muzeju budu dróše hač wobličene. Nimo toho bě so přetwar dlijił. Tole zdźěli direktor Załožby za serbski lud Jan Budar. Jako přičiny mjenowaše wón „njewočakowane komplikacije na twarskej substancy domu“. Kelko přetwar dokładnje wjac płaći, zamołwići nochcychu rjec. Po njewobkrućenych informacijach pak jedna so wo něhdźe 400 000 eurow wjac. Přidatne wudawki Załožbje za serbski lud lětsa z toho njenastanu, dokelž běchu hižo loni 151 000 eurow do etata 2018 zaplanowali. To je rada Załožby za serbski lud tež wobzamknyła. Na zašłym posedźenju gre­mija srjedź apryla w Drježdźanach su so čłonojo wo aktualnym stawje přetwara a zatwara noweje stajneje wustajeńcy wobhonili a jón „na wědomje brali“. „Město Cho­ćebuz jako nošer kulturneho zarjadnišća je mjeztym zdźěliło, zo so na wjac kóštach za přetwar wobdźěli“, wuswětli Budar. Tež kraj Braniborska je signalizował něšto přinošować a je njemjenowanu sumu do lětušeho etata zapisał. Jón pak ma krajny sejm hišće wobzamknyć.

Łužiska hospodarska iniciatiwa (WiL) je wčera wědomostne transferne myto spožčiła. Z mytom WiL wusahowace kooperacije mjez wědmosću a hospodarstwom hódnoća.

Carny Gózd (SN/BŠe). „Dźakuju so wšitkim wobdźělnikam, kotřiž su swoje projekty Łužiskej hospodarskej iniciatiwje zapodali. Kóždy jednotliwy projekt je dobry přikład za kooperaciju mjez wě­domosću a hospodarstwom we Łužicy. Wuběrneje kwality dla njebě rozsud jury jednory“, wuswětli jednaćel WiL Michael Schulz w Carnym Gózdźe (Schwarzheide), hdźež su wčera sedmy raz wědomostne transferne myto spožčili. Wšelakore wobsahi projektow pokazuja na wosebitu kwalitu kooperacijow.

Dobyćerjo su poprawom wšitcy, wšako předewzaća ze zhromadnym dźěłom z wědomostnymi institucijemi swoju kmanosć wubědźowanja skruća. Praktiske nazhonjenja w zawodach pak wobohaćeja wučbu uniwersitow a napjelnjeja wědomosć ze žiwjenjom.

„Łužica ma stawizny, kulturu a tradicije, kotrež měli ludźi zeznać“, zwurazni Sladana Stamenkovski. Minjeny tydźeń je sej Słowjenka wosebitosće łužiskeho Krabatoweho regiona bliže wobhladała, štož ma wězo swoju přičinu. Přichodnje budźe wona hłowna zamołwita za jězby po slědach Krabata alias Jana Šadowica nowozałoženeho pućowanskeho běrowa z mjenom Šadovic w Słowjenskej. Wot Chorwatskeje, přez Słowjensku, dale do Drježdźan a Łužicy móža zajimcy jeho žiwjen­ske stacije a region zeznać. „Tež wupućowarjow z Ameriki chcemy za jězby zdobyć. Na wosebite wašnje móža so ze swojim pochadom zaběrać“, Sladana Stamenkovski powěda. Wězo su tež jězby w napřećiwnym směrje móžne. Logistisce stej lětanišći w Berlinje a Zagrebje cilej za zahajenje jězbow. Krok po krok chce wona poskitki zdźěłać. Wiziju, zo docpěja pućowanja po slědach Krabata runinu wuznamnych europskich jězbow kaž na přikład do Barcelony wona z wočow njezhubi. Aktiwnje chce turistikarka přichodnje w socialnych syćach za poskitki wabić.

Lubnjow/Choćebuz (SN/at). Prěnje rozmołwy wo aktualizowanju zrěčenja wo přesydlenju Miłoraza su so minjeny pjatk a sobotu w Lubnjowje wotměli. Wo tym je hórnistwowe předewzaće LEAG wčera informowało. Wobdźěleni běchu zastupjerjo gmejny Trjebin z wjesnym dźělom Miłorazom, gmejny Slepoho jako přichodne přesydlenišćo a LEAG. Komunalny poradźowar Trjebina a Slepoho, bywši sakski minister nutřkowneho Klaus Hardraht je rozmołwy přewodźał.

Kaž bě dźensa z Miłoraza zhonić, su wjesnjenjo zazběh nowych jednanjow witali. Wochožanskeje jamy dla, kotraž wjes mjeztym k třom třećinam wobdawa, je so tam žiwjenski niwow jara pohubjeńšił. Po woprašowanju je so wjetšina wjesnjanow za přesydlenje wuprajiła.

Zakład rozmołwow je lěta 2013 dowujednane zrěčenje, tehdy z Vattenfallom, kotrež pak njebu podpisane. W Lubnjowje su wo wotškódnjenju za mějićelow a wotnajerjow kaž tež wo wotškódnjenju za přemysłowe a ratarske zawody rěčeli. Doskónčny wuslědk dotal docpěli njejsu, tohodla je dalše zetkanje předwidźane, po wšěm zdaću 4. a 5. meje.

Berlin (dpa/SN). Zwjazkowe knježerstwo je dźensa jasne zwyšenje rentow wobzamknyło. Tak zwyša so renty za něhdźe 21 milionow rentnarjow 1. julija w zapadnych zwjazkowych krajach wo 3,22 a we wuchodnych krajach wo 3,37 procentow. Nimo toho su wobzamknyli, we wobłuku „narodneho reformoweho programa“ zjawne zarjadnistwa digitalizować a młodych předewzaćelow podpěrować.

Jadrowe milinarnje njewěste

Berlin (dpa/SN). Němske jadrowe milinarnje njejsu po přepytowanju přirodoškitneje organizacije BUND wěste dosć. Njedostatki wobsteja dale w škiće před wulkej wodu, zemjerženjom abo teroristiskimi nadpadami, kaž z wčera wozjewjeneje publikacije wuchadźa. „Tuchwilu nichtó wo atomowych milinarnjach njerěči. Přiwšěm je wohroženje za ludźi minjene lěta přiběrało“, předsyda BUND Hubert Weiger zdźěli. „Hladajo na to, zo dyrbja jadrowe milinarnje tak a tak w lěće 2022 wotšaltować, mějićeljo ničo wjace do wěstoty objektow njeinwestuja.“

Rozdźělneho měnjenja byłoj

W armenskej stolicy Jerewanje su wobydlerjo wčera a dźensa 103. róčnicu ludomordarstwa přez wojakow Osmaniskeho mócnarstwa wopominali a so při pomniku ­genocida zhromadźili. Turkowscy wojacy běchu lěta 1915 něhdźe 1,5 milionow křesćanskich Armenjanow morili. Turkowska hač do dźensnišeho zamołwitosć za to prěje a sej tež wuraz „ludomordarstwo“ zakazuje. Foto: dpa/Gevorg Ghazaryan

Brüssel (dpa/SN). Němska přewostaji přidatnu miliardu eurow na dobro nuzu ćerpjacych ludźi w Syriskej a wójnskich ćěkancow w susodnych krajach. Tole je wonkowny minister Heiko Maas (SPD) dźensa w Brüsselu připowědźił. Tam wotměwa so tuchwilu konferenca darićelow za Syrisku. Na wot UNO organizowanym zarjadowanju wobdźěleja so zastupnicy z 80 krajow. Na lońšej konferency samsneho razu bě Němska najwjetši darićel. Wot spočatka wobydlerskeje wójny w Syriskej je Němska hižo 4,5 miliardow eurow přepokazała. „Najwažniši je škit ciwilneje ludnosće“, rjekny Maas. Zdobom wón potwjerdźi, zo chcyła so Němska z wotmachom za to zasadźeć, zo so politiski proces k skónčenju krawneho konflikta zaso wožiwi.