Aus der aktuellen Ausgabe vom Freitag, 03 Juli 2020

Čaporowe wiki na twjerdźiznje

Mortkow. Jutře a njedźelu wot 8 do 18 hodź. wotměja so na Mortkowskej Ja­bubec twjerdźiznje antikne a čaporowe wiki. Jónu wob lěto móža wopytowarjo woblubowaneje twjerdźizny tajke zarjadowanje dožiwić. Wšako je cyłk zběrarjow a měnjerjow čapora wulki, a nimo toho wabi mnohich wosebita srjedźo­wěkowa atmosfera.

Prěni kreatiwny hermank

Jiłocy. Wustajerjo ze Sakskeje, Braniborskeje, Durinskeje, Pólskeje a Čěskeje prezentuja jutře a njedźelu, 4. a 5. praž­nika, w Jiłočanskej (Eulowitz) „Herbskej grychće“ na prěnim kreatiwnym her­man­ku swoje ručne rjemjesło a dekora­cije. Trendy za lěćo móža sej zajimcy prěni­ dźeń wot 8 do 17 a zajutřišim wot 8 do 17 hodź. wobhladać. Paralelnje k tomu budu wšelake akcije za dźěći. Korony dla pak maja wopytowarjo wěstotne postajenja dodźeržeć.

Openairkino w młynje

Bičwolejbul na přibrjohu

Při Bjerwałdskim jězoru přewjedu jutře a njedźelu tak mjenowany Beachcup. Wosomnaće cyłkow smě sobu hrać, 22 je so přizjewiło, kóžde mustwo hraje přećiwo kóždemu a w kóždym ma jedna holca na hrajnišću stać. Přihladowarjo dowoleni njejsu a kóždy wobdźělnik ma škitny nahubnik sobu měć. Dalše informacije pod www.sportfreunde-baerwalder-see.de

Zaso po Čornej horje kolesować

Přichodne soboty a njedźele je zaso móžno po Halštrowskej Čornej horje na ča­rje Black Mountain Bikepark kolesować. Wotewrjenski čas je kóždy dźeń wot 10 do 18 hodź. Prjed pak hač sej do Hal­štrowa dojědźeće, pohladajće na www.black-mountain-bikepark.de, hač tam wotewrjenska ampla zelenu swěcu pokazuje. Nimo toho je hišće wažne, zo trjebaja njepołnolětne dźěći dowolnosć staršeju, chcedźa-li tam jězdźić.

Dohraja pokalne koło

Zamołwići Zapadołužiskeho koparskeho zwjazka su w swojim online-wudaću terminaj za połfinalnej hrě wo wokrjesny pokal sezony 2019/2020 wozjewili. Tak přewjedu partiji předposledni kónc tydźenja lětnich prózdnin.

22.08. 15.00 TSV Wachau –

  ST Horni kraj Sprjewja

Wodorunje: 3 europske horiny, 5 sportowc, 6 zapal, 7 italske město, 10 serbski spisowaćel (Anton), 13 dopis, 14 muske předmjeno (Strittmater), 15 přitok rěki Mosel

Padorunje: 1 kartyplacanje, 2 nócny wotpočink, 3 wubědźowanišćo, 4 dźeń tydźenja, 8 zwjazk, 9 koparski klub w Mailandźe, 11 družina žita, 12 łaćonsce: w lěće

Łužiski jězorinowy klinikum we Wojerecach ma noweho nawodu nuzoweje přijimarnje. Šeflěkar, Serb Cyril Hančik, je tam srjedu­ dźěłać započał. Radworčan je do toho w Běłowodźanskej wokrjesnej chorowni skutkował. Cyril Hančik, kiž je zdobom ­paliatiwny a intensiwny medicinar, je fachowy lěkar za anesteziju a ma ­fachowu wědu jako nawodny nuzowy lěkar. We Wojerowskej nuzowej přijimarni staraja so wob lěto wo něhdźe 25 000 pacientow. Foto: LSK/Gernot Schweitzer

Wojerowski měšćanski zarjad začuwa dobru rezonancu na iniciatiwu „Bulwar stare město“. Wo tym swědči rozprawa Dietmara Wolfa na njedawnym posedźenju měšćanskeje rady.

Wojerecy (AK/SN). Lětuši Wojerowski „bulwar stare město“ jako iniciatiwa cityjoweho managementa, cyłka Přichod města z.t. a domjacych rjemjeslnikow a přemysłownikow, je derje zaběžał. To potwjerdźi Dietmar Wolf, nawoda fachoweho wobłuka twarstwo, na njedawnym posedźenju měšćanskeje rady.

Wot 4. junija hač do 22. awgusta tam akciju znowa wotměja. Wokoło torhošća, Cyrkwinskeje a Měroweje maja meble, přeprošace z napisami w němskej a serbskej rěči k posydnjenju. Sudobja z kwětkami wšitko wobrubjeja. Schneiderec frizerski salon zawjesela z přibrjóžnej baru. Rěznistwo Sinapius je piwowu zahrodu wotewrěło. Po wječorach wabi lounge. „Chcemy, zo wobydlerjo hasy a naměsto takrjec nazhonja a dožiwja“, Dietmar Wolf rozjasni.

Habrachćicy-Nowe Jěžercy (SN). Załožba Chěža ze stołom wupisa lětsa wospjet myta za ludźi, kotřiž so za tajke domy angažuja. 7 000 eurow móže załožba za to nałožić. Pjenjezy přewostajitej jej mjeztym dwanaty króć Lutowarnja Hornja Łužica-Delnja Šleska a Budyska wokrjesna lutowarnja.

Wo pjenježne myto prócować móža so zajimcy z Němskeje, Pólskeje a Čěskeje. Wšojedne při tym je, w kotrym kraju jich chěža steji, abo hač su so za zachowanje tajkich zasadźeli. Wšitcy su přeprošeni so na wubědźowanju wobdźělić. Požadać móža so wobsedźerjo, kotřiž su z wulkej prócu swój dom pod měritkami pomnikoškita saněrowali. Namołwjene su tež wosoby a towarstwa, kotrež so za zdźerženje chěžow ze stołom angažuja.

Kónc zapodaća próstwow je 8. julij. Trěbne podłožki namakaja zajimcy na internetnej stronje www.stiftung-umgebindehaus.de.

Po tym zo je přiwzaće próstwow zakónčene, budźe je fachowa jury pruwować. Hakle po tym fachowa rada dobyćerjow postaji. Swjatočne přepodaće mytow budźe 13. septembra w muzeju „Alte Mangel“ w Habrachćicach-Nowych Jěžercach (Ebersbach-Neugersdorf).

Zajimy Njebjelčanskeje gmejny w regionalnym planowanju wobkedźbowane

Pěskecy (JK/SN/JaW). Po rotaciskim planje wotmě Njebjelčanska gmejnska rada swoje wčerawše posedźenje w Pěskecach. Tak skića wjesnjanam móžnosć, so konkretnje na swojich zastupjerjow wobroćić móc. Zajim Pěskečanow wšak njebě přewulki, tak zo wostachu radźićeljo wčera skerje mjez sobu.

Budyšink (SN). Wokrjes Budyšin je dóstał připrajenje, zo budźe wutwar dróhi přez Budyšink (Kleinbautzen) spěchowany, a to we wobjimje 2,4 milionow eurow. Suma wotpowěduje 80 procentam wšěch kóštow. Srědki přewostaji wokrjesej sakske ministerstwo za hospodarstwo, dźěło a wobchad, zo móhł komunalnu infrastrukturu polěpšić.

Twarski staw wokrjesneje dróhi je jara špatny a wutwar nuznje trěbny. Wotrězk je 1,6 kilometrow dołhi, započina so při mosće nad awtodróhu A 4 a kónči ­na započatku Přiwćic (Preititz). Jězdnja budźe šěsć metrow šěroka, chódnik połdra metra šěroki. Zwonka wsy budźe ­dróha 6,50 metrow a nabočna čara meter šě­roka.

Z nowotwarom chcedźa haru w sydlišću jasnje pomjeńšić. Tež woda z jězdnje ma potom lěpje wotběžeć, štož zaso wjetšej wobchadnej wěstoće słuži. Naprawu financuje Sakska z dawkowych srědkow na zakładźe wobzamknjeneho etata.

Kamjenc. Muzej zapadneje Łužicy w Kamjencu přeproša w juliju a awgusće stajnje njedźelu w 11 hodź. na wodźenja. Přeprošene su swójby, kaž tež dźědojo a wowki z wnučkami. Pod wěcywu­stojnym nawodom móža sej zajimcy tak eksponaty we wosebitej wustajeńcy wo kamjentnym času kaž tež swět kamjenjow a zwěrjatow spřistupnić. Dalše swójbne wodźenja přewjeduja wutoru a pjatk, tohorunja w 11 hodź., wodźenja su do zastupneho pjenjeza zapřijate.

Jubilej bjez swjedźenja

Budyšin. Před 70 lětami, 5. julija 1950 běchu po wobzamknjenju Budyskeje měšćanskeje rady Sewjerna dróha na Hasu Dr. Marje Grólmusec přemjenowali. ­Dana Dubil, jednaćelka Němskeho dźěłarniskeho zwjazka za region, chce na přemjenowanje dopominać a wobkrućić, zo „bě prawje jednu dróhu na česć Marje Grólmusec pomjenować. Dóńt serbskeje pedagogowki a křesćansko-socialnje kaž tež politisce aktiwneje žurnalistki dyrbi wostać prezentny.“ Spjećowarka nacionalsocialistiskeho režima je 1944 w koncentraciskim lěhwje Ravensbrück zahinyła.

Posledni króć „Greta“

Mortwy w Čornym Halštrowje

Wojerecy. We Wojerecach je pasant srjedu wječor w Čornym Halštrowje při Alberta Einsteinowej mortwu wosobu wuhladał. Zawołani zastojnicy wuchowanskeje słužby, wohnjoweje wobory a policije ju z wody wućahnychu. Jedna so wo 36lětneho. Pod kotrymi wobstejnosćemi je wón žiwjenje přisadźił, dotal nichtó njewě. Přikazali su tuž obdukciju ćěła.

Twochnjena zaso doma

Gersdorf. 13lětna holca, kotruž su srjedu we wjesnym dźělu Haselbachtala Gersdorfje pytali, je zaso doma. Kameradojo wohnjoweje wobory běchu twochnjenu holcu hišće samsny wječor w lěsu blisko Gersdorfa nadešli.

Paducha lepili

Kamjenc. Předawarki kupnicy na Sydlišćowym puću w Kamjencu so předwčerawšim rano njemało dźiwachu, zo bě so hižo do wotewrjenja předawanišća paduch do njeho dóstał a kak blešu z napojom do zaka tyka. Kaž zawołana policija zwěsći, bě 31lětny wopojeny w kupnicy hižo wospjet kradnył.