Aus der aktuellen Ausgabe vom Freitag, 27 November 2020

Zwjazk zwyši swoje spěchowanje Załožby za serbski lud

Berlin/Budyšin (SN/JaW). Załožba za serbski lud změje klětu wjac spěchowanja wot zwjazkoweho knježerstwa. To je wčera etatowy wuběrk zwjazkoweho sejma na swojim tak mjenowanym wurunanskim wuradźowanju w Berlinje wobzamknył. To wobkrući mjez druhim łužiski zapósłanc Klaus-Peter Schulze (CDU). Za lěto 2021 zwyši tuž Zwjazk swoje spěchowanje Załožby za serbski lud wot 9,8 na 12,2 milionaj eurow. Wotpowědnu próstwu wo to stej frakciji CDU/CSU a SPD wuběrkej sposrědkowałoj. Kaž z internych kruhow wuběrka rěkaše, je posedźenje hač do dźensnišich rańšich hodźin trało.

Předsyda Domowiny Dawid Statnik a předsydka rady Załožby za serbski lud Susan Šenkec wobzamknjenje witataj. „Sporjedźenje krótšenjow spěchowanja Załožby za serbski lud signalizuja zmužitosć. Runje w časach strukturnych změnow trjeba serbskosć jako wosebitosć Łužicy sylnu podpěru – to je nětko w zajimje cyłeho regiona“, rěka w dźensnišej zhromadnej nowinskej zdźělence.

Štóž pyta hišće přirodnu pychu za prěni adwent, je we Wudworskim zahrodnistwje Kroll prawje a namaka tam hodowne wudźěłki najwšelakorišeho razu – moderne a klasiske adwentne wěncy, za wosebity čas typiske a dekorowane rostliny, stykane kwětki a z kwětkami stykane koše za bydlenje kaž tež za zachodne durje atd. Šefina Kerstin Kroll a jeje sobudźěłaćerce Claudia Loch a Manuela Handrick (wotprawa) ­rady při tym pomhaja, to prawe namakać. A štóž rady něšto sam pasli, nadeńdźe ­tu tež prawy poskitk. Foto: Feliks Haza

Budyšin (SN). Zabawnu lekturu za lětsa drje wjace měrnych hodźinkow w dohodownym času chce LND čitarkam a čitarjam ze swojej nowej antologiju serbskeje prozy „Susodźa“ wobradźić. Wudawaćelka Ingrid Juršikowa je powědki 21 awtorkow a awtorow zestajiła. Knihu a titulnu ilustraciju je Iris Brankačkowa wuhotowała. Awtorki a awtorojo antologije su ludźom „přez płót“ pohladali a na žortne abo chutne wašnje wo nich pisali. Wo bliskich susodach a wo daloko zdalenych, wšako je susodow wšudźe na swěće.

Budyšin (SN/CoR). Prěni raz w stawi­znach Serbskeho ludoweho ansambla (SLA) su tradicionalny ptači kwas wotprajili. By to po zahajenju formata w lěće 1957 mjeztym 64. inscenacija była. „Koronoweje pandemije dla klětuši wječorny ptačokwasny program ,Njewěsta njewjesta‘ njepřewjedźemy. Na zakładźe předpisow njeje dotal móžno zjawne dźiwadłowe zarjadowanja přewjedować. Zo zamołwići zakaz zběhnu njeje tučasnje wotwidźeć. Tež za januar njemóžemy w tym nastupanju žanu prognozu wotedać“, rěka w nowinskej zdźělence SLA. Dźěćacy ptačokwasny program pod titulom „Kiž je z wětrom přišoł“ za pěstowarnje a šule samsnych přičin dla njepřewjedu. „Tež móžnosć programy digitalnje přihladowarjam domoj do dobreje stwy pósłać njeje opcija“, rěka dale w zdźělence. „Zasadnje ničo přećiwo přidatnej digitalnej formje njerěči, format smy tež hižo wužiwali. Jako jenička forma předstajenja pak wona njedosaha. Ptačokwasne programy su stajnje zabawneho razu a skutkuja live na ­jewišću z live hudźbu. By to brojenje ptačeho kwasa, brojenje rjaneho libreta a hudźby było. To je nam prosće přeškoda.

Berlin (dpa/SN). We wobchodach žiwidłow Němskeje njesmědźa wot lěta 2022 žane nakupowanske tity z plasty wjace poskićować. Wotpowědny zakaz je zwjazkowy sejm wčera wobzamknył. Po přechodnym času, kajkiž běchu na žadanje wikowarjow wo šěsć na dwanaće měsacow podlěšili, su lochke plastowe měški, kotrež dóstanješ při kasy, zakazane. Zakaz njepłaći za jara lochke tity we wotrjadach za sad a zeleninu.

Za wotsunjenje do Syriskeje

Berlin (dpa/SN). Zwjazkowy nutřkowny minister Horst Seehofer (CSU) nochce tuchwilu płaćiwy generelny zakaz ćěkancow do Syriskeje wotsunyć po 31. decembru wjace podlěšić. Wón chcył so na konferency nutřkownych ministrow za to ­zasadźeć, wotsunjenje do Syriskeje pruwować, jedna-li so wo skućićelow a tak mjenowanych wohrožowarjow, rjekny Seehofer. Zakaz wotsunjenja běchu 2012 wobzamknyli a wospjet podlěšili. Mjeztym je wobydlerska wójna w Syriskej w najwjetšim dźělu kraja nimo.

Socialne temy w srjedźišću

Po wšej Hessenskej su dźensa we wobłuku krajneho akciskeho dnja kontrolowali, hač ludźo winowatosć dodźerža, nahubniki nosyć. Mjez zasadźenymi policistami běštaj tež Philip Fischer (prědku) a Lorena Berdt. Wonaj kontrolowaštaj dodźerženje winowatosće zhromadnje ze železnicarjemi w spěšniku ICE. Foto: dpa/Arne Dedert

Berlin (dpa/SN). Wulka koalicija w Berlinje chce klětu 180 miliardow eurow nowych kreditow brać a wjace pjenjez za strowotnistwo, wobchad a infrastrukturu wudać. Tole je wuslědk zakónčacych wuradźowanjow etatoweho wuběrka, kotrež trajachu hač do dźensnišeho ranja. Zwjazkowy etat předwidźi klětu wudawki 498,6 miliardow eurow. Zwjazkowy sejm chce budget w tydźenju mjez 8. a 11. decembrom schwalić. Financny minister Olaf Scholz (SPD) bě poprawom 96 miliardow eurow nowych kreditow zaplanował. Přidatnych wudawkow koronapandemije dla, na přikład za nowy serum, pak dyrbješe wón tutón sumu na 180 miliardow eurow zwyšić.

Paducha žwjenkačkowych awtomatow lepiła je policija w badensko-württembergskim Brühlu. Žona bě wobkedźbowała, kak 72lětny spyta, awtomat wot­šrubować a informowaše policiju. Zastojnicy namakachu w awće rentnarja wosom dalšich kradnjenych awtomatow, nimo toho grat a tójšto klučow. 72lětny nochcyše dokładnje rjec, wotkal awtomaty pochadźeja. Policisća nastroje sćazachu, muž smědźeše hić.

Mobilny błyskač sobu wzał je šofer wosoboweho awta w Sakskej Šwicy. Po tym zo bě jeho nastroj w Struppenje z přewulkej spěšnosću lepił, 52lětny wospjet při błyskaču nimo jědźeše a aparat skónčnje sobu wza. Jako jeho sobudźěłaćer krajnoradneho zarjada narěči, muž wotjědźe. Policija nětko padustwa dla přepytuje. Błyskač zastojnicy pozdźišo w bydlenju muža namakachu.

Washington (dpa/SN). Republikanski mějićel zastojnstwa Donald Trump chce Běły dom wopušćić, dyrbjał-li wólbny kolegij demokrata Joewa Bidena jako noweho prezidenta USA wuzwolić. Zdobom by Trump hladajo na „masiwne wólbne wobšudnistwo“ wólbu Bidena za „wulki zmylk“ měł, rjekny Trump wčera we Washingtonje. Dopokazy za wólbne wobšudnistwo wón njeměješe. Trump so dale spjećuje, dobyće Bidena připóznać. „To běchu manipulowane wólby, sto procentnje.“ Biden ma tuchwilu 306 hłosow wólbnych muži, za dobyće by wón 270 trjebał. Wólbny kolegij chce 14. decembra noweho prezidenta USA wuzwolić. 20. januara jeho spřisahaja.

Hamburg (dpa/SN). Najwjetši wikowar žiwidłow Němskeje Edeka je nowe naprawy koronapandemije dla w drobnowikowanju raznje kritizował. „Mamy wobmjezowanje ličby kupcow we wobchodach z wjace hač 800 kwadratnymi metrami předawanskeje płoniny za kontraproduktiwne a njezrozumliwe“, rjekny šef Edeka Markus Mosa w Hamburgu. Wulki nawal kupcow runje w hodownym času njehodźi so tak zmištrować. Pokazka politiki, zo měli ludźo nakupowanje na wjacore dny rozdźělić, tež dale njepomha, dokelž činja to kupcy hižo wot časa prěnjeho lockdowna. Dalše rozdźělowanje kupcow na tym ničo njezměni, Mosa rjekny.

Nimo toho wobzamknjenje fairne wubědźowanje haći, šef Edeka skorži. Wobchody z tejkami, hdźež kupcow posłužuja, kaž Edeka, maja jasne njelěpšiny porno ryzy samoposłužowarnjam, dokelž kupcy w nich dlěje přebywaja. „To drje přichodnje hišće wjace wobchodow na samoposłužowanje z tunimi tworami přestaja“, wikowar wěsćeše.