Drježdźany (dpa/SN). Sakski krajny sejm je kooperaciske zrěčenje mjez knježerstwom a opoziciju z wjetšinu schwalił. Za „konsultaciske a informaciske dojednanje“ hłosowachu nimo zapósłancow CDU a SPD tež Lěwica a Zeleni a nimale wšitcy zastupnicy Zwjazka Sahry Wagenknecht. Po nowym dojednanju chce knježerstwo opoziciju hižo zahe do nowych zakonskich předewzaćow zapřijeć a jich namjety wobkedźbować. Po tutym puću móhli tež projekty opozicije wjetšinu w sejmje dóstać. Zastupnicy CDU rěčachu wo „nowej politiskej kulturje“.

AfD ma dojednanje za „simulaciju ­demokratije“ a nochce so na mecha­nizmje wobdźělić, wšako stej CDU a SPD dźěło z AfD tak a tak wuzamknyłoj.

Washington/Moskwa (dpa/SN). Prezident USA Donald Trump je z ruskim prezidentom Wladimirom Putinom telefonował a je so z nim na hnydomne rozmołwy wo skónčenju wójny w Ukrainje dojednał. Tole je Trump na swojej internetnej platformje zdźělił. W Krjemlu su telefonat wobeju statnikow wobkrućili. Trump je po tym tež z ukrainskim prezidentom Wolodymyrom Zelenskym rěčał.

W tym zwisku je knježerstwo Trumpa prěni króć zjawnje předstajiło, kak sej deal k skónčenju wójny předstaji – a to we wjacorych dypkach w zmysle Ruskeje. Tak měła so Ukraina móžneho čłonstwa w NATO wzdać. Wojacy USA njesměli dźěl mjezynarodneje měroweje jednotki być. Trump rěčeše wo „dołhim a jara ­produktiwnym telefonaće“. Wobaj chcetaj so bórze zetkać. Po rozmołwje z Putinom telefonowaše Trump ze Zelenskym. Tón chce so jutře w Mnichowje z wiceprezidentom USA J.D. Vanceom zetkać.

Mjeztym žada sej Europska unija, zo smě so na rozmołwach wo přichodźe Ukrainy wobdźělić.

Njedawno přebywach we westfalskim ­městačku a so wjeselach, zo w tamnišim Rewe-wobchodźe produkty nadeńdźech, kiž wot našeho serbskeho wikowarja w Njeswačidle znaju. Wězo z jednym rozdźělom: Tam su přidatnje sortiment žiwidłow z wokoliny poskićili kaž wosebity bio-twarožk wjesneho producenta, mjeztym zo nam doma poskitki z Łužicy prezentuja. Tak posrědkuje předawanišćo zdobom regionalny flair – domoródnym a hosćom. Přiwšěm pak mam za wažne, zo so w Njeswačidle tež wo wubědźowanje staraja, zo njebychu regionalni poskićowarjo na wšě časy swoje garantowane městno měli. Wšako mam druhdy zaćišć, zo někotři ­testuja, kelko su kupcy zwólniwi, jenož ­tohodla přidatnje zapłaćić, dokelž njeje to wupłód „złeho“ koncerna, ale „dobreho“ susoda. Tute wubědźowanje pak jenož funguje, hdyž jemu wikowar platformu w swojim wobchodźe zaruča. Dalši argument za nas, serbske předawanišćo podpěrować. Marcel Brauman

Bad Schandau (dpa/SN). Na wot spočatka nowembra zawrjenym mosće nad Łobjom w Bad Schandauwje chcedźa nětko prěni króć tež hornje woršty mosta pruwować. Přihoty za to hišće tutón tydźeń zakónča, krajny zarjad za dróhotwar a wobchad zdźěla. Tam chcedźa na wjacorych městnach asfalt wotdypać a sej beton pod nim bliže wobhladać.

Zo bychu dokładnišo wědźeli, hdźe móhła nošna struktura mosta přez zymsku sel a dźěry w asfalće chutnje wob­škodźena być, su minjeny čas elektromagnetiske pruwowanja přewjedli. Na kritiskich městnach chcedźa přichodny tydźeń asfalt wočinić a kuski wocloweje konstrukcije wurězać. Kónc februara chcedźa městna pruwowanja zaso dospołnje začinić, zamołwići zdźěleja.

Móst nad Łobjom w Bad Schandauwje běchu 7. nowembra njewočakowano z wěstotnych přičin zawrěli. Łódźe smědźa mjeztym zaso jězdźić, nadróžny wobchad dyrbi dale dołhe wokołopuće na so brać. Nastork zawrjenja bě wurjadne ­pruwowanje mosta po sypnjenju Carolineho mosta w Drježdźanach. Tam běchu swój čas samsny wocl wužiwali.