„Sorbisch? Na klar!“ abo „Sorben raus!“? Je jenož prašenje časa, zo tež mje atakuja, hdyž so w busu ze susodku abo w kupnicy z předawarku serbsce rozmołwjam. Nastanje prašenje, što prócowanja wo widźomnu serbskosć wunjesu. Haj, informacije Christiana Schäfera wčera w Nowoslicach su mje wostrózbnili – a potom tola zaso nic. Wobhladam-li sej w telewizy ­diskusije a powěsće wo posedźenjach, w kotrychž so politikarjo, kotřiž chcedźa naš kraj nawjedować, bjez kóždeje přistojnosće a respekta słowa jimaja, so hižo njedźiwam. Kóždy praji, štož mysli. A štóž je měnjenja, zo tu Serbja ničo pytać ni­maja, tón tež to wótře wupraji. Što pak serbske dźěćo začuwa, hdyž w šulskej ­jědźerni słyši: „Das ist der Tisch, der ­Sorben hasst.“ – „Sorbisch? Na klar!“ drje jemu w tym wokomiku njepomha. Słowa ranja. Móžemy so zjawej prawicarskeho ekstremizma hišće dowobarać? Za prewenciju njeje nihdy zahe dosć. Weronika Žurowa

Na wšěch 127 porow je so minjeny kónc tydźenja w błótowskej Nowej Niwje (Neu Zauche) na jubilejny 150. zapust zhromadźiło. Cyłu hodźinu traješe, doniž njeběchu so posledni na obligatoriske skupinske foto na hoberskich róštach zesydali. Z wobrazom zdobom dokumentuja, zo je Zapust w Nowej Niwje najwjetši po wšěch Błótach. Mjez wobdźělnikami běchu tež drastowe towarstwa susodnych wsow a bywši woby­dlerjo, kotřiž běchu jeno zapusta dla z Hamburga, Berlina a samo ze Šwicarskeje domoj přijěli. Slědowaše přećah po wsy. Dołheho swjedźenskeho ćaha dla trjebachu lětsa dwě dujerskej kapale. Swjedźeń skónči so z rejemi w hosćencu. Foto: Peter Becker

Venedig (dpa/SN). Syn ameriskeho prezidenta Donald Trump jr. ma mjerzanje hońtwjerskeho wulěta njedaloko Venediga dla. 47lětny je na swojim wopyće w sewjernej italskej kónčinje kónc minjeneho lěta ilegalnje na škitane dźiwje ptački ­třělał. Škitarjo přirody žadaja sej nětko wot prawicarskeje ministerskeje prezidentki Georgije Meloni, Američana na­jebać toho mócneho nana pochłostać.

We wideju je widźeć, kak syn prezi­denta we wojerskej drasće wosrjedź třělenych ptačkow hordźe wo hońtwje rozprawja. Na zemi leža mortwje ptački kaž dźiwje husy, kački a pocpule jako hońtwjerske trofeje. Mjez morjenymi zwěrjatami je přewšo rědka oranžojta husyca. Lěwicarska opozicija chce Trumpa jr. nětko wobskoržić. Měšćanski radźićel Zelenych Andrea Zanoni rjekny hladajo na wopyt z USA: „Woni njemóža so tu kaž wulcy knjezojo wupěrać.“ Scena je w kónčinje Valle Pirimpie nastała, kotraž ma wosebity škitny status EU. Wukrajnikam je hońtwa w tutej kónčinje zakazana. Opozicija žada sej w tym zwisku tež stejišćo italskeho ministra za wobswět, kiž bě hońtwje w tutej kónčinje přizwolił.

Hač do grjekskeje stolicy Athena su wuskutki zemjerženja we wokolinje grjekskeje dowoloweje kupy Santorini pytnyć. Wobydlerjo wčera popołdnju wo střa­senjach rozprawjachu, kotrež mějachu swoje wuchadźišćo w 230 kilometrow zdalenej mórskej kónčinje. Najmócniše rženje ze sylnosću „5“ slědźerjow w jich wěsćenju posylnja, zo připowědźa so wulke zemjerženje.

Nimale 20 000 wohroženych zwěrjatow wuchowali su policisća we wjacore tydźenje trajacej akciji přećiwo pašowarjam dźiwich zwěrjatow. Při tym su we 138 krajach a regionach 365 podhladnych zajeli. Zwěrjata dowjezechu do škitnych centrumow, doniž někotre ­zaso do jich domizny njedowjezu. Po informacijach Interpol su wjace hač 12 000 ptačkow, 5 000 nopawow a 18 wulkich dźiwich kóčkow wuswobodźili.