Brüssel (dpa/SN). Němska je ze swojej blokadu w poslednim wokomiku při rozsudźe wo zakazu awtow z bencinowym a dieselowym motorom wot lěta 2035 mjez europskimi partnerami njezrozumjenje a mjerzanje wubudźiła. Diplo­maća EU rěčachu wo łamku dowěry a kritizowachu njepřezjednosć němskeho zwjazkoweho knježerstwa. Tež na kmanosći nawjedowanja zwjazkoweho kanclera Olafa Scholza (SPD) přiběrajcy dwěluja. Knježerstwje w Parisu a Madridźe zwurazništej swój hněw tež zjawnje. Runje tak kritisce reagowachu w Brüsselu zastupnicy knježerstwow, kotrež su Němskej poprawom přichilene. „To mamy za jasny łamk dowěry“, rjekny diplomatka. Derje by było, by-li Němska swoje zwady w koaliciji do wothłosowanja EU zrja­dowała. Přichodnje dyrbja drje so w Brüsselu stajnje prašeć, „što je dojednanje z Němskej scyła hišće hódne“. Minjenu wutoru chcychu w Brüsselu poprawom jenož hišće formelnje schwalić, štož bě dawno wujednane: Wot lěta 2035 smědźa w EU jenož hišće nowe awta z ekologiskimi motorami předawać. Němska pak je tole na iniciatiwu FDP wotpokazała.

Drježdźany (dpa/SN). Softwarowy koncern SAP je campus w Drježdźanskim nutřkownym měsće wotewrěł. Nowy kompleks z běrowami na Póstowym naměsće skića městno za 400 sobudźěłaćerjow, zdźěli koncern wčera w Drježdźanach. Předewzaće SAP chce z campusom kapacity za wuwiće zesylnić. „Wjeselimy so, zo Drježdźanske wědomostne a inowaciske stejnišćo dale rosće a zo so zhromadne dźěło z lokalnymi a regionalnymi partnerami zesylnja“, wuzběhny šef techniskeho wobłuka pola SAP Jürgen Müller. SAP chce na městnje regionalnu syć wutworić. „Nimo wurjadnych slědźenjow na Techniskej uniwersiće a dalšich zaměstnjenych institucijow je w měsće tež hišće lokalnych iniciatiwow a techniskich centrumow“, koncern w zdźělence rozkładźe. Zhromadne dźěło z lokalnymi akterami ma so wutwarić.

Sakski ministerski prezident Michael Kretschmer (CDU) podšmórny, zo je so koncern SAP w mjezynarodnym wubědźowanju za stejnišćo w Drježdźanach rozsudźił. „SAP zhladuje na jónkrótne wuwiće. Hižo lětdźesatki to wobkedźbujemy“, Kretschmer rozkładźe. Za młodostnych w regionje je campus wulka šansa.

Narodne powětrowe a swětnišćowe zarjadnistwo NASA je njedawno asteroid „2023 DW“ w swětnišću wotkryło. Ćěleso měri so na zemju a je na zbožo hišće daloko zdalene. Z přerězkom nimale 50 metrow móže asteroid wulke škody na zemi načinić a samo wjetše město zničić. Kaž fachowcy NASA wuličichu, „2023 DW“ dokładnje na dnju Walentina w lěće 2046 zemju trjechi. Prawdźepodobnosć toho pak leži pola 1 do 560. Prawdźepo­dobnosć w loće dobyć leži tuchwilu pola 1 do 140 milionow. W lěće 2013 je dalši asteroid z přerězkom 20 metrow Rusku trjechił. Tehdy so wjele ludźi zranichu a wokna chěžow rozbichu.

Drježdźany (dpa/SN). Sakski ministerski prezident Michael Kretschmer (CDU) podpěruje plany energijoweho přede­wzaća EON, zničeny płunowód Nord Stream 1 w Baltiskim morju reparować. „Wězo je wažne, pozadki zničenja wotkryć a skućićelow pochłostać“, rjekny politikar CDU wčera w Drježdźanach. Runje tak wažne pak je, dalšemu wobškodźenju płunowoda přez mórsku wodu zadźěwać, wón doda. Po dotalnych dopó­znaćach je pječa skupina Ukrainjanow płunowód kónc septembra rozbuchnyła.

CDU a SPD jednatej w Berlinje

Berlin (dpa/SN). Dobre tři tydźenje po wospjetowanych wólbach w Berlinje stej wólbny dobyćer CDU a SPD dźensa jednanja wo zhromadnej knježerstwowej koaliciji zahajiłoj. Spočatnje chcychu so wuzwoleni fachowcy wobeju stron wo zasadnych prašenjach dojednać. Wot spočatk tydźenja chcedźa w cyłkownych 13 dźěłowych skupinach prawidłownje wuradźować. Młodźinska organizacija SPD je so hišće raz doraznje přećiwo ­koaliciskim jednanjam z CDU wuprajiła.

Planowany zakoń cofnjeny