Nowa hala za jězdźidła železnicy
To a tamne (06.08.25)
Wo 1 400 kilogramow přećežki bě transporter na awtodróze A 7, jako jón zastojnicy kontrolowachu. Nan a syn běštaj požčeny wóz za přećah z Bayerskeje do Bremena napakowałoj. Policistam je awto napadnyło, dokelž je zadni dźěl hižo chětro přewisował. Waha na parkowanišću pokaza 4 900 kilogramow město dowolenych 3 500. Šoferej hrozy chłostanka 235 eurow a dypk w Flensburgu.
Dokelž je pawiany w Nürnbergskim zwěrjencu morił, hroža direktorej nětko ze smjerću. Dźesać konkretnych hroženjow su policiji sposrědkowali, direktor Dan Encke zdźěli. W socialnych medijach kopja so njekonkretne hroženja. Tež z listami abo mejlkami jemu hroža. W zwěrjencu su minjeny tydźeń dwanaće pawianow morili, dokelž bě jich wobhrodźenje přepjelnjene. Nichtó nochcyše wopicy přewzać, tohodla dyrbjachu je zasparnić.
FDP pyta za nowym pućom
Berlin (dpa/SN). Po swojej poražce we wólbach zwjazkoweho sejma hotuje so FDP na nowe wobsahowe wusměrjenje. K tomu zahaja dźensa woprašowanje čłonow wo jich politiskich starosćach a wočakowanjach. W tym zwisku planuja, woprašowanje tež na politisce zajimowanych rozšěrić, kotřiž njejsu z čłonom strony. Na wólbach zwjazkoweho sejma 23. februara bě FDP ze 4,3 procentami zwrěšćiła a njeje z toho časa wjace w němskim parlamenće zastupjena.
Bolsonaro dyrbi do aresta
Brasilia (dpa/SN). Najwyše sudnistwo Brazilskeje je za bywšeho prezidenta Jaira Bolsonara domjacy arest wukazało. „ Wukazane naprawy přećiwo Jairej Bolsonarej su ranjenje, na tym njedwělujemy“, sudnik Alexandre de Moraes zdźěli. Mjez brazilskimi prawicarjemi hidźeny sudnik je bywšemu statnemu šefej zakazał, zo socialne medije za politiske zaměry wužiwa. Najebać to je Bolsonaro politisku debatu w kraju zaměrnje w socialnych syćach wobwliwował, Moraes zwěsća.
Žadyn zakaz social-media
Plastowe wotpadki zanjerodźa tež dróhi města Nouakchott w ...
AfD w Sakskej dale na čole
Drježdźany (dpa/SN). Bychu-li přichodnu njedźelu w Sakskej wólby krajneho sejma byli, by AfD jasnje jako najsylniša móc wušła. To je wuslědk tak mjenowaneho „njedźelneho prašenja“ wjacorych sakskich nowin a slědźenskeho instituta Civey, kotrež měsačnje přewjeduja.
AfD ma z 35 procentami hłosow dale jasny předskok před CDU, kotraž by 27 procentow docpěła. Lěwica je z dźesać procentami třeća najsylniša moc. BSW ma dźewjeć, SPD a Zeleni matej kóžda šěsć procentow. FDP by runje tak hišće jedyn procent dóstała. Z dźěłom ministerskeho prezidenta Michaela Kretschmera je jenož hišće 40 procentow wolerjow spokojom, 43 procentow je njespokojnych. Na wšěch 18 procentow ludźi njeje so rozsudźić móhło.
Zakaz nima zmysła
Namjet Södera debatu zbudźił
Netanjahu chce Gazu wobsadźić
Gaza/Tel Aviv (dpa/SN). Israelski ministerski prezident Benjamin Netanjahu je so po informacijach medijow rozsudźił, zo Gazaske pasmo dospołnje wobsadźi. Za to chce sej přichodne dny podpěru knježerstwa a nawodnistwa wójska zaručić. Medije cituja w tym zwisku sobudźěłaćerja Netanjahuwa ze słowami: „Smy so rozsudźili: Mamy wotpohlad, zo Gazaske pasmo dospołnje wobsadźimy.“
Israelske wójsko kontroluje tuchwilu 75 procentow zawrjeneho a dospołnje zničeneho pobrjóžneho pasma. W tutym regionje tuchwilu dwaj milionaj Palestinjanow pod surowymi wuměnjenjemi žiwori. Gazaske pasmo je po płoninje tak wulke kaž Mnichow. Israelske wójsko na to tuka, zo chowa islamistiska Hamas poslednich zastajencow w kónčinach, kotrež Israel hišće njekontroluje.
Nawodnistwo wójska je so dotal přećiwo dospołnemu wobsadźenju Gazaskeho pasma wuprajiło. Wotstronjenje wšitkich tunlow a bunkrow Hamas móhło lěta trać. Nimo toho hrozy zastajencam smjerć, hdyž so wojacy bliža.
Zanjerodźenju so wobaraja
Mjezynarodna konferenca za wobmjezowanje plasty w Genfje
Genf (dpa/SN). W šwicarskim Genfje su dźensa nowe wuradźowanja wo swět wopřijace zrěčenje nastupajo wužiwanje plasty zahajili. Zaměr je, zo po wšěm swěće płaćiwe naprawy za wobmjezowanje zanjerodźenja z plastowymi wotpadkami wobzamknu a tež přesadźa.
Dotalne wuradźowanja, kaž naposledk w južnokorejskim Busanje kónc minjeneho lěta, skónčichu bjez wuslědka. Tehdy běchu so zastupnicy něhdźe sto krajow, mjez nimi Němska, za hišće naročniše zrěčenje zasadźowali. Woni pak zwrěšćichu – poměrnje mała skupina wolij produkowacych krajow předewšěm z arabskeje kónčiny so tomu spjećowaše.
Hižo nětko plastowe wotpadki wšitke žiwjenske rumy zanjerodźa a tež čłowjekej zeškodźa. Slědźerjo USA su w mozach a jatrach zemrětych ludźi loni wo wjele wjace nano- a mikroplastiki našli hač hišće 2016. Konferenca w Genfje je posledni pospyt, zo so na powšitkownje płaćiwe zrěčenje za redukowanje zanjerodźenja z plastu dojednaja. Hač do 14. awgusta wuradźuja zastupnicy wjace hač 160 krajow.
