Za wyši rozhłosowy popłatk hłosowali
Drježdźany (dpa/SN). Sakski krajny sejm je wčera po kontrowersnej debaće přihłosował, rozhłosowy popłatk zwyšić. Parlament rozsudźi so za to z hłosami CDU, Zelenych a SPD. Lěwica so hłosa wzda, AfD bě přećiwo tomu. Tež jedyn zapósłanc z rjadow CDU hłosowaše z „ně“. Rozhłosowy popłatk chcedźa wot 1. januara 2021 wo 86 centow na potom 18,36 eurow wob měsac zwyšić. Runje tak bě to komisija fachowcow namjetowała. Wšitke krajne sejmy Němskeje dyrbja tomu přihłosować. W Saksko-Anhaltskej pak njeje dotal za to žana wjetšina wotwidźeć.
Wothłosowanje bě přewodźane wot horceje debaty. Za medije zamołwity šef statneje kenclije Oliver Schenk (CDU) rěčeše wo „moderatnym zwyšenju“ a widźeše za to runje nětko dobre přičiny, zjawno-prawniski rozhłós skrućić. „Runje w času, hdyž so w koronapandemiji spodźiwne teorije a wopačnosće šěrja, trjebaja ludźo poskitk, kotremuž móža dowěrić“, Schenk wuzběhny.
Trump ma so hižo za dobyćerja
Washington (dpa/SN). Prezident USA Donald Trump je připowědźił, ze sudniskimi skóržbami so masiwnje přećiwo wólbnej poražce wobarać. „Njemóžemy dopušćić, zo nam wólby na te wašnje kradnu“, rjekny Trump w Běłym domje. Znowa rěčeše wo wólbnym wobšudnistwje, bjeztoho zo by dopokazy předpołožił. Wšako bě wón twjerdźił, zo by wólby „z lochkosću“ dobył, bychu-li so „legitimnje“ wotměli. Najebać to, zo njejsu wuslědki w někotrych statach hišće wozjewili, ma so Trump za dobyćerja.
We wjacorych statach pomocnicy hłosy dale wuličeja. W Pennsylvaniji a Georgiji je kontrahent, demokrat Joe Biden, porno Trumpej dale nachwatać móhł, po tym zo běchu tam listowe wólbne podłožki wuličili. By-li Biden Pennsylvaniju za sebje zdobył, by so wón z wjace hač trěbnymi 270 wólbnymi mužemi přećiwo Trumpej přesadźił. Mjeztym dochadźa po cyłym kraju k demonstracijam přiwisnikow a přećiwnikow Trumpa. Toho syn bě jeho namołwił, „totalnu wójnu“ wo wólby zahajić.
Škoda hižo hoberska
Söder a Babiš staj sej přezjednaj
Mnichow (dpa/SN). Bayerski ministerski prezident Markus Söder (CSU) a čěski ministerski prezident Andrej Babiš chcetaj mjezu tež při dale přiběracej ličbje natyknjenjow z koronawirusom wotewrjenu wostajić. „Mjezu zawrěć njeby w boju přećiwo pandemiji wjele wunjesło, by pak razne negatiwne wuskutki měło“, rjekny Söder w Mnichowje po widejowej konferency z Babišom. Podłu wobeju bokow statneje hranicy płaća mjeztym samsne škitne prawidła kaž nahubnik wužiwać a wotstawk dodźeržeć. Tak by zawrjena mjeza předewšěm hospodarstwo, posłužby a transport tworow haćiła. Tež medicinske zastaranje by potrjechene było, kaž Markus Söder argumentowaše. W bayerskich hladarnjach dźěła wosebje wjele čěskich dojězdźowarjow.
Söder potwjerdźi Babišej swój dotalny poskitk, sto łožow za čěskich pacientow rezerwować. Tež Babiš wuznam mjezsobneje pomocy wuzběhny: „Hdyž němske hospodarstwo zwrěšći, tež naše hospodarstwo njepřežiwi.“ Wobaj rěčeštaj tuž runje tak wo mjezu přesahowacych projektach, kaž wo mobilnej telefonowej syći 5G a wo wutwarje železniskich zwiskow.
Lěkarka skóržbu zapodała
Tesla-šef zaso na twarnišću
Grünheide (dpa/SN). Šef předewzaća Tesla Elon Musk je zaso w Němskej. Dwaj měsacaj po swojim prěnim wopyće je wón wčera na nowym lětanišću BER přizemił. Po informacijach powěsćernje dpa chce Musk na twarnišću prěnjeje europskeje twornje ameriskeho twarca elektroawtow w Grünheidźe pola Berlina rozmołwy wjesć. Wčera wječor je so wón nimo toho z hospodarskim ministrom Braniborskeje Jörgom Steinbachom (SPD) zetkał.
Přistajić nowych fachowcow je Muskej wočiwidnje šefowa naležnosć: Předewzaćel bě w interneće připowědźił, zo chce prěnjorjadnych inženjerow nawabić a z požadarjemi wosobinsce na twarnišću rěčeć. Zawostajił bě tež adresu, dokal móža zajimcy swoje požadanje pósłać. Wopyt Muska bě spontany a překwapjacy, byrnjež wón stajnje zaso připowědźił, zo chcył nětko časćišo do Němskeje přińć. W septembru bě twarnišćo noweje twornje prěni króć wopytał. Do toho bě so ze zwjazkowym hospodarskim ministrom Peterom Altmaierom (CDU) a z braniborskim ministerskim prezidentom Dietmarom Woidku (SPD) rozmołwjał.
To a tamne (06.11.20)
Třilětneho hólca na zastanišću wuhladał je busowy šofer w badensko-württembergskim Ludwigsburgu. Jenož nócny woblek zdrasćeny bě hólčk z bydlenja maćerje ćeknył. Šofer sadźi jeho do busa a zawoła policiju. Bórze na to přizjewi so tam starosćiwa mać, kotraž rjekny, zo drje bě jeje synk prjedy hač hewak wotućił a so skradźu zminył. Krótko na to móžeše wona jeho na straži wotewzać. Tak dołho běchu zastojnicy třilětneho z čajom a šokolodu zastarali.
Kuriozny kónc to pytanskeje akcije policije w Kölnje za zhubjenym awtom: Pytali su swědkow, kotřiž bychu něšto k „pokradnjenemu Citroënej 2CV“ rjec móhli. Rozrisanje přińdźe spěšnišo hač myslene: Susod bě parkowace awto „z ciwilnoprawniskich přičin“ wot priwatneje słužby wotwlec dał. Kak staj so susodaj skónčnje dojednałoj, njeje znate.
Biden na dobrym puću
Washington (dpa/SN). Z wólbnym dobyćom we wažnymaj statomaj Michigan a Wisconsin je so demokratiski prezidentski kandidat USA Joe Biden swojemu zaměrej bližił, stać so z přichodnym prezidentom kraja. Dźensa rano pobrachowaše jemu jenož hišće jenički zwjazkowy stat. W staće Nevada chcedźa wječor němskeho časa wo stawje wuličenja informować. Mjeztym su wólbni wobkedźbowarjo Europskeje unije prezidenta Donalda Trumpa kritizowali, dokelž bě so wón dočasnje za dobyćerja deklarował.
Policiju lěpje planować
Drježdźany (dpa/SN). Sakski krajny sejm je dźensa wo personalnym planowanju policije kraja wuradźował. Na tym polu chcedźa přichodnje efektiwnišo postupować. Po předstawje knježaceje koalicije ma wotpowědna fachowa komisija prawidłowne rozprawy předpołožić a wobstejace struktury přepruwować. Sakska ma tuchwilu 14 000 policistow. Rěčeli su tež wo wotewrjenskich časach wobchodow 31. decembra.
Parlament so schadźował
Wuludnjena je přibrjóžna promenada w Boltenhagenje nad Baltiskim ...
Trump sćele swojich prawiznikow
Washington (dpa/SN). Prezident USA Donald Trump wužiwa w boju wo wuličenje wolerskich hłosow w zwjazkowym staće Pennsylvania dalše prawniske srědki. Po tym puću chce wuličenje hłosow přetorhnyć, doniž nimaja republikanscy wólbni wobkedźbowarjo přistup do wólbnych lokalow, hdźež pomocnicy hłosowanske lisćiki liča. Koronapandemije dla běchu wobkedźbowarjow ze žurlow pósłali. Z dalšimi skóržbami chce Trump tomu zadźěwać, zo z póštu pósłane hłosy wolerjow wuličeja, kotrež hišće hač do pjatka pola wólbneje komisije dochadźeja.
Trump po dotalnym wuličenju w Pennsylvaniji nawjeduje, jeho předskok pak woteběra, ćim wjace hłosow je wuličene. Z 20 wólbnymi mužemi móhł Pennsylvania rozsudny stat w boju wo zastojnstwo prezidenta być. Wólbnobojowy šef Trumpa Bill Stepien bě wčera w telefoniskej konferency rjekł, zo je Trump w Pennsylvaniji dobył, jako hłosowanske lisćiki hišće ličachu. Do toho bě so Trump jako dobyćer cyłych prezidentskich wólbow deklarował, byrnjež toho demokratiski kontrahent Joe Biden dobre wuhlady na dobyće měł.
