Berlin (dpa/SN). Štóž wjace zasłuža, ma wot klětušeho wjace socialnych wotedawkow płaćić. To předwidźi turnusowy naćisk postajenja zwjazkoweho socialneho ministerstwa, kotryž powěsćerni dpa wot minjeneho pjatka předleži.

Tak stupaja wotedawki za rentowe a bjezdźěłnostne zawěsćenje. Na zapadźe maja ludźo z měsačnej mzdu hač do 7 100 eurow wjace płaćić. Na wuchodźe leži hranica pola 6 700 eurow mzdy. ­Tuchwilu leži hranica pola 6 900 eurow w starych a 6 450 eurow w nowych zwjazkowych krajach.

Tež wotedawk za hladanske zawěsćenje ma so po cyłym Zwjazku jednotnje na 4 837,50 eurow měsačnje zwyšić. Hranica winowatostneho zawěsćenja ma klětu na 64 350 lětneje mzdy postupić. Lětsa je to hišće nimale 2 000 eurow mjenje. Štóž potajkim wjace zasłuži, móže so potom přez priwatnu chorobnu kasu zawěsćić.

Kóžde lěto so měritka měnjeja, wotpowědnje wuwiću mzdow z lěta do toho. Za lěto 2019 wuchadźa ministerstwo z 2,95 procentow wjace mzdy. Nowe postajenje ma zwjazkowy kabinet 14. oktobra wobkrućić. Nětko pak najprjedy raz ministerstwa wo naćisku wothłosować.

Wo zajědojćenje Nawalneho a přichodźe płunowoda Nord Stream 2 šło

Berlin/Drježdźany (dpa/SN). Sakski ministerski prezident Michael Kretschmer (CDU) je so w padźe zajědojćeneho ru­skeho opoziciskeho politikarja Alekseja Nawalneho jasnje přećiwo tomu wu­prajił, twar nimale hotoweho płunowoda Nord Stream 2 z Ruskeje do Němskeje přetorhnyć. „To je dospołnje wopačna kročel“, rjekny Kretschmer we wčerawšim wusyłanju telewizije ARD „Bericht aus Berlin“. Sakski premier w tym zwisku na to skedźbni, zo bě dodawanje surowiznow z Ruskeje do Němskeje samo w časach zymneje wójny stajnje zaru­čene.

Podobnje argumentowaše jednaćel wuchodneho wuběrka Němskeho hospodarstwa Michael Harms. W samsnym sćelaku pokaza wón na to, zo wobsteja mjeztym 50 lět „absolutnje spušćomne energijowe styki k Ruskej. Tež w najćešich politiskich dobach smy so na nje dźerželi. To tež tónkróć poručam.“

Lěpšu podpěru we wólbnym boju njeby sej prezident USA Donald Trump scyła přeć móhł. Němska spjelnja jemu starodawne žadanje a staja přichod płunowoda Nord Stream 2 z Ruskeje do Němskeje do prašenja, dokelž ma Moskwu za sobuzamołwitu w padźe zajědojćeneho ru­skeho opoziciskeho politikarja Alekseja Nawalneho. A zaso raz pokazuje so němska aroganca, z kotrejž wupěra so zwjazkowa republika jako sudnica w padach, kotrež njejsu scyła hišće wujasnjene. W Berlinje dyrbjeli sej wuwědomić, zo bě Němska z ruskimi surowiznami tež w časach najhóršeje zymneje wójny stajnje zastarana. Město toho hotuja so wonkowny minister Heiko Maas a dalši na dospołnje njetrěbny a nowy konfrontaciski kurs přećiwo Moskwje. A hdyž budźe za něšto tydźenjow Donald Trump we Washingtonje na dalše štyri lěta za prezidenta USA spřisahany, smědźa sej w Berlinje na ramjo klepać, zo su po swojich mocach k tomu přinošowali. Marko Wjeńka

Młody boran je w schleswigsko-holsteinskim Heidegrabenje po wikowej hali běhał a tam wopytowarjow kofejownje nastróžił. Połdra lěta stare skoćo bě přez awtomatiske durje do hale přišło a je so něhdźe dźesać mjeńšin po wikach rozhladowało. Do toho bě z bliskeje pastwy ćeknyło a po wsy běhało. Nawoda hale wozjewi wobraz njewšědneho wopytowarja na Facebooku, na čož so wobsedźer borana přizjewi a sej po njeho přijědźe.

Wopačny policist w starej uniformje je ludźom w schleswigsko-holsteinskim měsće Heide napadnył. Wobšudnik bě staru zelenu město nowu módru słužbnu drastu woblečeny. Takle předrasćeny wón spyta kompjuter swójby w jeje by­dlenju sćazać, na kotrymž běchu pječa ilegalne daty. Wobydlerjo jemu njewěrjachu a informowachu prawu policiju. Na to skućićel ćekny. Nětko za nim pytaja.