Dohromady 24 projektow wuznamjenili
Budyšin (SN/bn). Załožba za serbski lud je lětsa prěni raz wubědźowanje „Rěč wjaza – Rěc zwězujo – Sorbisch verbindet“ wupisała. Zaměr wurisanja je „pytać za inowatiwnymi a naslědnymi idejemi, z kotrymiž hodźała so serbšćina we wšědnym dnju lěpje zakótwić, zo by so serbska zhromadnosć zesylniła a identita skrućiła“. Dohromady 66 namjetow bu zapodatych. Wěcywustojna jury, paritetisce zestajana z čłonow z Hornjeje, Delnjeje a srjedźneje Łužicy, je 24 z nich jako mytowanjahódnych wuzwoliła, při čimž měješe „na to dźiwać, cyłu Łužicu na wuwažene wašnje wobkedźbować“, kaž direktor załožby Jan Budar na minjeny pjatk digitalnje wuhotowanym spožčenju wuznamjenjenjow podšmórny.
Wuměłstwowy depot ma nastać
Kulturny konwent Hornja Łužica-Delnja Šleska je so minjeny pjatk znowa w Budyskim Kamjentnym domje schadźował. Mjez druhim su tam spěchowanje za klětuše projekty kaž tež inwesticije wobzamknyli.
Budyšin (SN/CoR). Přepruwowanje hospodarjenja zaměroweho zwjazka kulturny rum Hornja Łužica-Delnja Šleska za lěto 2020 je z dobrym wuslědkom zakónčene. Tak zwěsći zličbowanski zarjad Budyskeho wokrjesa nadbytk dohromady 620 000 eurow. „Mějachmy wjace připokazankow ze stron kraja, hač smy wočakowali. A dokelž njejsu so korony dla wšitke projekty zwoprawdźili, su tuž spěchowanske srědki zbyli“, rozłoži komornica kulturneho ruma Anja Kramer. Suma wuruna tak na poslednim posedźenju zwěsćeny deficit w etaće lěta 2022.
Trójna lawreatka w literarnym wubědźowanju
Annamaria Hadankec z Berlina/Kopšina je najwuspěšniša wobdźělnica lětušeho literarneho wubědźowanja Ludoweho nakładnistwa Domowina a Załožby za serbski lud.
Budyšin (SN/at). To je zawěsće tež jurorki a jurorow literarneho wubědźowanja překwapiło: Annamaria Hadankec bě we wšěch třoch kategorijach najwuspěšniša, dwójce z prěnim a jónu z druhim mytom. W kategoriji „basnje a mała proza“ (A) spožči jej jury 1. myto za basnje „Powjaz“, „Naši mužojo!“, „Za tebje“, „Pizza“, „Žedźba“ a „Raj“, runje tak w kategoriji dlěša proza, dramatika (C) za powědančce „Rabies – płaćizna wědy“ a „Čeji lěs?“. W kategoriji „krótka proza“ (B) bě powědančko „Spytowanje“ Annamarije Hadankec 2. myto hódne.
„Sammelsurbium – Serbskosć na tworach a we wabjenju“ rěka ...
Wóski z Baerenstamma
Dom wopytowarjam z cyłeho swěta wotewrjeny
Wojerowski kulturny zwjazk je hižo wjele lět w starym měsće prezentny
Město Wojerecy chce dźěło towarstwa kulturny zwjazk zaměrnje podpěrać. Předewšěm na polu spěchowanskich srědkow chce pomhać a kmanych kooperaciskich partnerow sposrědkować. To je wyši měšćanosta Torsten Ruban-Zeh (SPD) towarstwu přilubił.
Wobłuk spěchowanskich srědkow je dźeń a njepřewidniši. Tohodla „je podpěra nuznje trěbna“, Wojerowski měšćanosta podšmórnje. Nimo toho wón namjetuje, přirjadować towarstwu městno zwjazkoweje dobrowólneje słužby abo dobrowólneho socialneho lěta. Tak móhło „młodym ludźom temy domizniskich stawiznow zbližić“. Ruban-Zeh dale wuzběhnje, zo chce „spěchowanski management města z programom ‚Aktiwne město a wjesne dźěle‘ na stare runje tak kaž na nowe město wusměrić“.
Nowe korjenje rostu
„Sym Serbowka a mjerzam so, hdyž so něchtó praša, hač mam serbske korjenje. Implicitnje přec rěka, zo njejsym prawa Serbowka“, Hella Stoleckojc powěda, „hromadźe ze staršim bratrom smój prěnja generacija w swójbje, kotraž serbsce rěči.“ Identita je kaž młoda rostlinka, rozłožuje 25lětna absolwentka Delnjoserbskeho gymnazija Choćebuz. Su-li wuměnjenja dobre, dóstawa wona nowe korjenje a rosće. Staršej Helle njejstaj Serbaj, ale přećelej serbskeje kultury. Tak je so jeje mać na wušiwanskim kursu za serbsku drastu wukmaniła a so mjeztym tež swoju delnjoserbsku drastu hotuje.
Saksa na pućowanju po swěće
Dešno (mih/SN). Zo Saksojo rady po swěće pućuja, je znate. A njeje-li to praktiskich přičin dla móžno, da podadźa so druhdy kaž Karl May prosće duchownje na dyrdomdejsku jězbu do cuzych krajow. Nic literarnje, přiwšěm tohorunja wuměłsce přeprošuje dalši Saksa nětko zajimcow na fantastiske pućowanje. Tak wita Dešnjanski Domizniski muzej wot minjeneje njedźele zajimcow na hodownu wustajeńcu. W Riesy bydlacy tružacy ludowy wuměłc Fredo Kunze wjedźe wopytowarjow do bajkojteho swěta swojich drjewjanych figurow. Přehladka pokazuje z wulkej lubosću tružene figury ze scenami samotneje kupy Robinsona Crusoewa, sceny Dona Quijota w Španiskej kaž tež hońtwu na buwoły pola Indianow na dźiwim zapadźe Ameriki. W krótkich jednanjach powěda wuměłc ze swojimi figurami kuzłapołne stawiznički. Mnohe małke detaile tutu jězbu po swěće wobohaćeja. Wjacore sceny wo fantastiskim žiwjenju Münchhausena buchu za Drježdźanski Muzej sakskeho ludoweho wuměłstwa stworjene a su jako požčonka Münchhausenoweho města Bodenwerda widźeć.
