Pellmann žada sej wotmołwu
Berlin/Lwiw (dpa/SN). Zapósłanc Lěwicy w zwjazkowym sejmje Sören Pellmann chce wědźeć, čehodla su jemu jězbu do Ukrainy znjemóžnili. Lipšćanskeho politikarja běchu na dwórnišću ukrainskeho Lwiwa zadźerželi a do Pólskeje wróćo pósłali. „Wočiwidnje maja tam lisćinu ludźi, kotřiž su so kritisce wuprajili a kiž njesmědźa nětko wjace do Ukrainy přińć“, rjekny 47lětny, kiž bě wospjet dodawanje brónjow do Ukrainy šwikał.
Baerbock njekandiduje
Washington (dpa/SN). Annalena Baerbock chce so hladajo na mjezynarodne krizy dospołnje na swój nadawk wonkowneje ministerki koncentrować a nochce kanclerska kandidatka Zelenych być. Tole rjekny politikarka Zelenych na wjerškowym zetkanju Nato we Washingtonje nowinarjam. Po tutym puću móhł so hospodarski minister Robert Habeck z kanclerskim kandidatom Zelenych k wólbam zwjazkoweho sejma klětu nazymu stać.
Steinmeier w bywšim jastwje
Tež dźensa rano su so w španiskej Pamplonje zaso młodźi mužojo z ...
Dwěle Bidena dla dale a sylniše
Washington (dpa/SN). W diskusiji wo strowotnisku a dušinu kmanosć prezidenta USA Joewa Bidena za zastojnstwo je prěni króć demokrat w senaće USA na tym dwělował, hač ma Biden při wólbach prezidenta woprawdźe šansy. Michael Bennet warnuje w rozmołwje ze sćelakom CNN před přemóžacym wuspěchom Trumpa a republikanow we woběmaj komoromaj kongresa. Tež wodźaca politikarka demokratow Nancy Pelosi Bidena indirektnje namołwješe, tola hišće raz wo tym rozmyslować, hač chcył za zastojnstwo prezidenta kandidować.
Dwěle nastupajo Bidena jewja so tež mjez jeho přiwisnikami. Dźiwadźelnik George Clooney rjekny: „Lubuju Joewa Bidena, jako senatora, wiceprezidenta a prezidenta. Tola bój, kotryž Biden dobyć njemóže, je bój přećiwo časej.“
Nowy šef šule policistow
Dalše rakety USA w Němskej
Washington (dpa/SN). USA zesylnja wojerske wottrašenje za škit čłonskich krajow Nato w Europje. Za to chcedźa w Němskej wot lěta 2026 nachwilnje same so orientowace rakety typa Tomahawk a druhe daloko sahace brónje nastajić, rěka w zhromadnym dokumenće USA a Němskeje, kotrež su na kromje wjerškoweho zetkanja Nato wozjewili.
Konkretnje mjenuja tež lětadła wotwobarace rakety SM-6 a jara spěšnje lětace rakety, „kotrež leća wo wjele dale, hač dotalne rakety“.
Prezident USA Joe Biden bě na spočatku ruskeho nadpada na Ukrainu prezencu ameriskich wojakow w Němskej zesylnił, zo by teritorij NATO lěpje škitał. Biden bě stajnje zaso zwuraznił, zo chcyli USA swojeje zamołwitosći wotpowědować a „kóždy centimeter teritorija NATO zakitować“. Z prezidentom Donaldom Trumpom w Běłym domje móhło so tole změnić. Bywši prezident Trump znowa za zastojnstwo prezidenta kandiduje. Jako prezident (2017–2021) bě wón wospjet hrozył, zo USA z Nato wustupja.
Pólska Ukrainje dale pomha
Ministerski prezident Tusk a prezident Zelenskyj zrěčenje wotzamknyłoj
Waršawa (dpa/SN). Pólski ministerski prezident Donald Tusk a ukrainski prezident Wolodymyr Zelenskyj staj bilateralne wěstotne zrěčenje wotzamknyłoj. „Štóž dźensa Ukrainu zakituje, zakituje so sam“, Tusk rjekny.
Ukrainski prezident mjenowaše zrěčenje „naročne“. Dojednanje „je kmane, žiwjenje našich ludźi škitać a so ruskemu njedobru wobarać“, Zelenskyj zwurazni. W zrěčenju je předwidźane, zdźěłać mechanizm, z kotrymž móža „ruske rakety a truty nad teritorijom Ukrainy wottřělić, kotrež do směra na Pólsku leća“.
Nimo toho w zrěčenju steji, zo Pólska móžnosć pruwuje, Ukrainje dalše wojerske lětadła typa MiG-29 přewostajić. Waršawa je Ukrainje hižo dźesać lětadłow tohole typa přepodała. Po ukrainskich medijach dźe nětko wo 14 dalšich lětadłow. Tusk w tym zwisku potwjerdźi, zo dyrbjeli zapadni partnerojo Pólskej najprjedy bojowe mašiny narunać.
Hinaši stil politiki
To a tamne (11.07.24)
Wjace hač 3,6 kilometrow na wuskim powjazu přeprěčił je Jaan Roose z Estiskeje w Italskej. 250 metrow nad morjom balansowaše 32lětny mjez sicilskej kupu a Italskej. Za zapis do Guinnessoweje knihi rekordow přiwšěm njedosahaše: Sto metrow před cilom zhubi Roose runowahu a padny. Wěstotny powjaz jeho dźeržeše. Akrobat čaru hišće doběža. Roose bě prěni čłowjek, kotryž je so na přeprěčenje Messinskeje dróhi zwažił.
Swětłe włosy, wopačne zuby a šnawcar – takle předrasćeny je so Pforzheimski wyši měšćanosta Peter Boch (CDU) mjez ludźi měšał, zo by sej starosće a problemy wobydlerjow naposkał. Won pomhaše w pěstowarnjach, we wuchowanskej słužbje a w měšćanskim zawodźe. Tak porjedźeše hrajkanišća a rumowaše wotpadki, kotrež su ludźi do parka mjetali. Rozprawu pokazuja póndźelu w 20.15 hodź. w RTL.
Prašenja kubłanja Serbsku radu Braniborskeje najbóle zaběrali
Swoju dźěławosć za wólbnu dobu 2019–2024 bilancowała je Rada za naležnosće Serbow při Krajnym sejmje Braniborskeje wčera w Podstupimje. Nowy gremij so hakle kónc lěta wuzwoli, tak je rada terminaj dalšeju posedźenjow wobzamknyła.
Městno w hladarni zaso dróše
Berlin (dpa/SN). Swójski pjenježny podźěl wobydlerjow starownjow dale přiběra. Hladajo na 1. julij dyrbjachu hladanja potrěbni po wšej Němskej 2 871 eurow ze swójskeje kapsy připłaćić. To je 211 eurow wjace hač srjedź 2023, wuhódnoćenje zwjazka narunanskich kasow wunjese. Poćežowanje wobydlerjow hladarnjow najebać zwyšene připłatki dale přiběra. Připłatki měrja so po tym, kak dołho ludźo hižo w starowni přebywaja.
DGB: Debata swětacuza
Berlin (dpa/SN). Němski dźěłarniski zwjazk DGB ma debatu wo wjace nadhodźinach a dlěšich dźěłowych časach za swětacuzu a warnuje před měšenjom do tarifoweje awtonomije. Powšitkowne žadanje za dlěšim dźěłom woprawdźitosć milionow ludźi ignoruje, rjekny předsydka DGB Yasmin Fahimi nowinarjam. Politika njesměła so do naležnosćow dźěłarnistwow tykać. Njech činja radšo něšto přećiwo milionam njepłaćenych nadhodźinow w Němskej, wona rjekny.
Wuzwola noweho premiera
