Iniciatiwu podpěraja
Podstupim (dpa/SN). Braniborski ministerski prezident Dietmar Woidke (SPD) je so za to wuprajił, sylnišo z Pólskej hromadźe dźěłać. „Žiwe němsko-pólske přećelstwo přinošuje sylnej Europje“, wuzběhny wón wčera w Podstupimje. Woidke so wjeseli, zo je nowe knježerstwo we Waršawje wotewrjene a ma zajim z Němskej kooperować. Wuwiće hraničneho regiona dyrbjałoj knježerstwje w Berlinje a Waršawje zaso sylnišo forsěrować.
Dietmar Woidke je městopředsyda němsko-pólskeje přećelskeje skupiny. Předsyda je sakski ministerski prezident Michael Kretschmer (CDU). Čłonojo skupiny staraja so wo dobre ramikowe wuměnjenja zhromadneho dźěła. Sakska a Braniborska stej na swojim zhromadnym posedźenju kabineta w aprylu k tomu iniciatiwu zwjazkoweje rady wobzamknyłoj. Iniciatiwa ma so dźensa Zwjazkowej radźe zapodać. Mjeztym su so tež druhe zwjazkowe kraje – mjez nimi wšitke na wuchodźe Němskeje – přizamknyli.
Protestuja dale
Dalši politikar AfD potrjecheny
Berlin (dpa/SN). Po tym zo je zwjazkowy sejm wčera dopołdnja zapósłancej AfD Petrej Bystronej imunitu zběhnył, je tež jeho frakciski kolega a předsyda Młodeje alternatiwy Hannes Gnauck potrjecheny. Parlament hłosowaše wčera wječor přećiwo hłosam AfD za wotpowědne doporučenje imunitneho wuběrka. Z tym předleži dowolnosć za přewjedźenje sudniskeho disciplinarneho jednanja.
Wo pozadkach k tomu njebě spočatnje ničo znate. Po informacijach ARD pak jedna so wo disciplinarny pad jako bě Gnauck hišće pola Zwjazkoweje wobory. Mjeztym zastupuje wón AfD w parlamentariskim zakitowanskim wuběrku. To su politikarjo druhich stron wótrje kritizowali, dokelž bu znate, zo bě wojerska słužba (MAD) Zwjazkoweje wobory bywšeho wojaka jako „ekstremista“ zastopnjowała.
Přećiwo Petrej Bystronej přepytuje Mnichowske statne rěčnistwo podhlada wobtykowanja dla. Mjeztym su sobudźěłaćerjo rěčnistwa jeho běrow a dalše objekty přepytowali.
Porjedźenka
Znjewužiwanje spěšnje předźěłać
Berlin (dpa/SN). Hladajo na trěbne předźěłanje splažneho znjewužiwanja w Berlinskim, Zhorjelskim a Drježdźansko-Mišnjanskim biskopstwje žada sej rada potrjechenych dale wyše tempo dźěła. Konkretnje žada sej zastupnistwo potrjechenych spěšne zahajenje socialno-wědomostneho přepytowanja, kotrež ma bjezposrědne a dołhodobne sćěhi znjewužiwanja wobswětlić. Koncept za studiju běchu hižo w januaru w za to zamołwitej komisiji předźěłanja wobzamknyli. Nětko chcedźa nadawk wupisać.
Sabine Otto, zastupnica rady potrjechenych, rjekny, zo su sej potrjecheni, lajkojo a biskopja přezjedni, kak wažne tajke přepytowanje je. Nětko njesměł so čas brojić. Studija ma „tomu přinošować, atmosferu sprawnosće a wustrowjenja stworić“. Potrjechenych chcedźa słyšeć, škody přiznać a dalokož móžno, zaso narunać. Skućićelam chcedźa składnosć dać, „zamołwitosć přewzać a so nakazać“. Otto rjekny, zo móže proces wupisanja wjacore měsacy trać, studija sama někak tři lěta. „Čas chwata, zastojnstwa so skónča, swědkojo zemrěja a potrjecheni rezignuja. Podajmy so skónčnje na puć!“
Diskriminaciji zadźěwać
Drježdźany (SN). 17. meje je mjezynarodny dźeń přećiwo hidźe homo-, bi-, inter-, a transseksualnosće dla. Dźeń pomjenuje so powšitkownje jako IDAHOBIT. Dźeń złožuje so na 17. meju 1990. Na tutym dnju wobzamkny swětowa strowotniska organizacija (WHO), zo njeje homoseksualnosć hižo chorosć. Wot tutoho dnja skedźbnja so kóžde lěto na namóc a diskriminaciju přećiwo queernym wosobam.
Tež sakske ministerstwo za justicu, demokratiju, Europu a runostajenje so na tutym dnju hižo wjacore lěta wobdźěla. Před twarjenjom ministerstwa su dźensa, pjatk, tučelowu chorhoj, kiž je znamjo queerneje zhromadnosće, wupowěsnyli. Ministerka Katja Meier, kiž chce so sama ze žonu woženić, praji składnostnje dnja IDAHOBIT: „Zo bychmy diskriminaciji zadźěwali, měli wšitke demokratiske mocy zhromadnje dźěłać. IDAHOBIT nas kóžde lěto na to dopomina, zo mamy hišće wulki čwak dźěła před sobu, doniž njemóže pola nas w kraju kóždy čłowjek bjeze kóždeje diskriminacije žiwy być.“ Za to chce so tež wona jako ministerka wosebje zasadźeć.
Hotuja so na dźeń parkow regiona
To a tamne (17.05.24)
Entertaineraj Joko a Klaas staj swój wusyłanski čas za to wužiwałoj, za EU wabić. Tak rysowaštaj wonaj z pomocu fachowcow, što so stajnje, jelizo so EU rozpušći. Kumštna inteligenca (KI) zwobrazni při akciji zawčerawšim wječor negatiwne wěšćenja, započinajo ze zawrjenymi mjezami a turbulencami na wikach, wo drastiskich stratach dźěłowych městnow, słabym němskim hospodarstwje a dobyću demagogow a nacionalistow, štož by China znjewužiwała.
Zwěrjo na trawniku při kopańcy w USA je přihladowarjow jara zwjeseliło. W běhu prěnjeho połčasa partije w kopańcowej hrě Philadelphia Union přećiwo New York City FC je mjenujcy šup na hrajnišćo běžał. Publikum z mócnym přikleskom reagowaše. Pomocnicy spytachu zwěrjo popadnyć, tola zwěrjo so spočatnje wuwiny. Mjez druhim ze smjećowej tonu šupa po hrajnišću honjachu. Hru dyrbjachu zamołwići krótko přetorhnyć.
Chce wědu wo Serbach tež w zarjedźe šěrić
Zły Komorow (SN/MiP). W februarje lěta 2020 je Serbowka Hanka Rjelcyna městno społnomócnjeneje za serbske naležnosće we wokrjesu Hornje Błóta-Łužica nastupiła. Zły Komorow a wokolne kónčiny wšak 40lětnej Radworčance njeznate njejsu, wšako je po swojim činohrajnym studiju w Lipsku wot lěta 2009 sem jako dźiwadźelnica na tamnišim Nowym dźiwadle skutkowała. Zo by so w delnjoserbskej rěči wukmaniła, wobdźěli so hnydom po tym, zo bě městno nastupiła, na kompaktnym kursu w Šuli za delnjoserbsku rěč a kulturu w Choćebuzu.
Politikar AfD přepytowany
Mnichow (dpa/SN). Generalne statne rěčnistwo w Mnichowje je přepytowanja přećiwo zapósłancej AfD w zwjazkowym sejmje Petrej Bystronej zahajiło a dźensa wjacore objekty přepytowało. Wobsteji podhlad wobtykanja a płokanja pjenjez dla. Zwjazkowy sejm bě do toho imunitu Bystrona zběhnył. Přepytowali su objekty w Berlinje, Mnichowje a na kupje Mallorca. Pječa je Bystron pjenjezy proruskeho propagandoweho sćelaka „Voice of Europe“ brał. Bystron tole prěje.
Prawicarska koalicija hotowa
Den Haag (dpa/SN). Nižozemska dóstanje prawicarsku knježerstwowu koaliciju. Nimale šěsć měsacow po wólbach parlamenta su so radikalny prawicarski populist Geert Wilders a tři dalše strony na koaliciske zrěčenje dojednali. Dale njejasne je prašenje, štó budźe nowy ministerski prezident. Wilders je so zastojnstwa hižo wzdał. Na šefa knježerstwa dyrbja so hišće dojednać, wón rjekny. Koaliciske zrěčenje chcychu dźensa předstajić.
Přepytuja socialne platformy
