„STOLZ STATT PRIDE“ steji na nalěpku, kotryž ležeše dźens rano w listowym kašćiku Serbskich Nowin. Wudał je jón młoda alternatiwa, młodźinski zwjazk AfD, kotryž je w Sakskej prawicarsko-ekstremistiski. Strach před wšěm, štož je hinaše, hač „normalna“ swójba, za to su prawicarjo po wšěm swěće znaći. Znaći su woni tež za swoju politiku wumjezowanja a diskriminacije. Po jich měnjenju njeje w towaršnosći ruma za ludźi, kotřiž lubuja čłowjeka samsneho splaha, abo kiž so jako muž abo žona identifikować njemóža. Dołhož nacije jenož bledźa, je to někak ­hišće k wutraću. Strašne pak je, hdyž počinaja woni měrliwe protesty hordych njeheteroseksualnych čłowjekow nadběhować, kaž su to sobotu w Drježdźanach činili. Mjeńšiny, wšojedne hač narodne abo seksualne, su jim potajkim njelube. Strach wobsteji, zo steja prawicarjo snano bórze tež poboku křižerskich procesionow a tute myla. Tući ludźo wumjezuja tež nas Serbow. Maximilian Gruber

Budyšin (SN/MkWj). W Budyskej Tachantskej cyrkwi su minjeny pjatk jurista Jannika Jaschinskeho jako hosća witali. W rjedźe zarjadowanjow „Budyske narěče“ stejachu tónkróć awtoritarne politiske strony a sćěhi jich skutkowanja w srjedźišću. Jaschinski je wědomostny sobudźěłaćer w „Durinskim projekće“, slědźenskim projekće, kiž přepytuje krutosć demokratije a prawostatnosće w Němskej.

W swojim přednošku přepytowaše Jaschinski před něhdźe sto wopytowarjemi, što móhło so stać, hdyž awtoritarna strona nawod krajneho knježerstwa přewozmje. Złožujo so na přikłady w Madźarskej abo Pólskej jurist naliči, kak móža awtoritarne strony z pomocu wobstejacych zakonjow demokratiju podrywać a ju takrjec z demokratiskimi srědkami wotstronić. „Durinski projekt“ běchu załožili, zo bychu tute wuwiće přeslědźili. Jaschinski bě prawniske wědomosće a ludowe hospodarstwo w Heidelbergu, Parisu a Santiago de Chile studował. Wot lěta 2022 iniciatiwa „Budyšin zhromadnje“ rjad „Budyske narěče“ organizuje. Skupina chce ludźi z hospodarstwa, kultury, kubłanja a cyrkwje zjednoćić.

Wuměnkarku w chorobnym stole je sobudźěłaćer lětanišća w Nürnbergu do wopačneho lětadła dowjezł. Dźowka čakaše w Athenje podarmo na swoju mać, kotraž bě město toho w Albaniskej přizemiła. „Přičina za zmylk běchu wjacore njezbožowne wobstejnosće“, zdźěli minjeny pjatk rěčnik lětanišća. 83lětna chcyše poprawom na swójbny wopyt do Grjekskeje, za Albanisku njeměješe wona ani tiket, dźowka zdźěli.

K žohnowanju zwěrjatow su w Berlinje-Neuköllnje wopytowarjo předewšěm swoje psyki na kemše sobu přinjesli. Ewangelska wosada w Berlinje-Rudowje bě zajimcow na tajke přeprosyła. Přeprošeni pak běchu tež wobsedźerjo kóčkow, ptačkow abo reptilijow. Prěnje tajke požoh­nowanje zwěrjatow njewotmě so w cyrkwi, ale na cyrkwinskej zahrodźe, dokelž hodźeše so tam wšitko lěpje wurjedźić.

Choćebuz (SN/mb). Dalši znaty Serb kandiduje w Delnjej Łužicy za AfD: Skótny lěkar Ulrich Wünsch nastupi na lisćinje AfD za wólby měšćanskeje rady Choćebuza we wólbnym wokrjesu Dešank, Depsk, Žylowk, Zaspy, Chmjelow, Žylow, Škódow a Rogozno. To rozprawja „Nowy Casnik“ (NC) w aktualnym wudaću. Do toho je kandidatura Hanza Wylema-Keła, prominentneho zapósłanca Serbskeho sejma a předsydy „Łužiskeje aliancy“, za AfD we Wětošowje zadźiwanje w serbskej zjawnosći zbudźiła (Serbske Nowiny su rozprawjeli). Tež Wünsch běžnje delnjoserbsce rěči, tohodla su jeho njedawno wobdźělnicy projekta „Zorja“ w zwěrjencu wopytali – a to běše tež tema přinoška telewizijneho wusyłanja „Łužyca“.

Mjeztym so předsydstwo župy „Delnja Łužica“ wot wólbneho wabjenja Choćebuskeje AfD ze serbskimi drastami distancuje. Na naprašowanje NC předsyda AfD w Choćebuzu kritiku wotpokaza, wšako serbska drasta „njeje uniforma Domowiny“, ale dźěl „našeje kultury, našeje tradicije, našeje domizny“. Wo serbskej rěči pak w programje Choćebuskeje AfD ničo njenamakaš.