Čěski inwestor w Essenje
Moskwa warnuje USA
„Započatk nabožneje wójny“
Wukaz Waršawskeho wyšeho měšćanosty zbudźa razne reakcije PiS
Waršawa. Wulku towaršnostnu diskusiju nastorčił je Rafał Trzaskowski, wyši měšćanosta pólskeje stolicy Waršawy, z wukazom, kajkiž tak razny nichtó wočakował njebě: Wotnětka su w zarjadnišćach města wšitke nabožne symbole zakazane: křiže na sćěnach runje tak kaž na blidach. Tež swjećatka abo postawy swjatych maja so zhubić. Oficialne zarjadowanja města wotměwaja so wotnětka bjez duchownych, hinak hač běchu to Polacy z časa knjejstwa narodno-konserwatiwneje strony PiS zwučeni.
Hłowna přičina wukaza je po słowach wyšeho měšćanosty nabožna neutralita. Přiwisnicy druhich nabožinow móhli wšudźe prezentne symbole katolskeje cyrkwje jako diskriminowace wobhladować. Sobudźěłaćerjo měšćanskich institucijow dyrbja po najnowšim tež akceptować, hdyž wopytowarjo na tym wobstawaja, zo nochcedźa hižo jako „knježe“ narěčani być, ale jako „knjeni“. Po internetnym naprašowanju 60 procentow Polakow rjadowanje wita, jeno 40 procentow so tomu spjećuje.
Snadny rozrost hospodarstwa
Dźěło ze zbrašenymi pohłubšić
To a tamne (24.05.24)
Dospołnje pjany šofer nakładneho awta je wozydło, na kotrymž transportowaše piwowe kašćiki, na awtodróze A 10 zapadnje Berlina powalił. Do toho bě wón z jězdnje zjěł a do skłoniny zrazył. Piwowe kašćiki padnychu na dróhu a do přirowa. Při prěnim woprašowanju šofera po njezbožu policisća alkohol zwěsćichu. Test wunjese nic mjenje hač 3,09 promilow. Snadnje zranjeneho šofera dowjezechu do chorownje.
Křiwy křiž na wěži cyrkwje swj. Lamberta w Düsseldorfskim starym měsće su wohnjowi wobornicy wčera zrunać dyrbjeli. Za to wužiwachu wosebitu dźěłowu platformu, kotraž jich k 80 metrow wysokemu křižej zběhny. Bazilika swj. Lamberta je najstarša cyrkej stareho města a jedyn ze symbolow Düsseldorfa. Kupola, na kotrejž křiž steji, je nimale 200 lět stara a pokazuje mjeztym twarske brachi.
Egyptowska hrozy z cofnjenjom
Kairo (dpa/SN). Egyptowska hrozy, so swojeje róle jako posrědnik mjez Israelom a islamistiskej Hamas w Gazaskej wójnje wzdać. Trajace pospyty, egyptowske prócowanja wo posrědnistwo a rólu Egyptowskeje z wopačnymi twjerdźenjemi podrywać, połoženje w Gazaskim pasmje a we wšej kónčinje jenož dale přiwótřa, zdźěli Diaa Rashwan, šef statneje egyptowskeje informaciskeje słužby. Tole móhło Egyptowsku pohnuć, dotalne zastojnstwo jako posrědnik złožić.
Wjace pjenjez pěstowarnjam
Berlin (dpa/SN). Němski dźěłarniski zwjazk žada sej masiwne inwesticije na dobro dalšich městnow w pěstowarnjach. Tule měło tež zwjazkowe knježerstwo swojej zamołwitosći wotpowědować, rjekny zastupowaca předsydka Elke Hannack. Tuchwilny spěchowanski program Zwjazka za pěstowarnje lětsa wuběži. Nowy zakoń njeje wotwidźeć. Potrjeba je pak dale wulka. Po wšej Němskej pobrachuje něhdźe 430 000 městnow.
Tež zastojnicy měli přinošować
Zadwělowanaj stejitaj Phillip a Kimberly Ergish na rozpadankach ...
75. róčnicu zakładneho zakonja swjećili
Berlin (dpa/SN). Ze statnej swjatočnosću mjez twarjenjom Reichstaga a kanclerskim zarjadom su dźensa w Berlinje 75. róčnicu zakładneho zakonja w Němskej woswjećili. 23. meja 1949 je zdobom datum załoženja Zwjazkoweje republiki Němskeje. Wopominali su w tym zwisku tež měrniwu rewoluciju 1989 w NDR, kotraž woswjeći lětsa swoju 35. róčnicu. Wona je na kóncu k tomu wjedła, za je spočatnje jenož za zapadnu Němsku zdźěłany zakładny zakoń dźensa po wšej Němskej płaćiwy.
Zwjazkowy prezident Frank-Walter Steinmeier, kiž bě statny akt přikazał, měješe centralnu narěč. „Tutón zakładny zakoń je zakład toho, zo postajeja w našim staće swoboda, demokratija a prawo zhromadne žiwjenje“, pisaše Steinmeier do zahajenja zarjadowanja na swojej internetnej stronje. Z jeho wida je so wustawa minjenych 75 lět jako stabilna wopokazała a tójšto krizow wobstała.
Pytaja wobdźělnikow konferency
Kijew (dpa/SN). Ukraina prócuje so wo dalšich wobdźělnikow za planowany měrowy wjeršk srjedź junija w Šwicarskej. „Dźensa sym ze statnymi a knježerstwowymi šefami Chilskeje, Albanskeje, Awstriskeje a Mosambika rěčał“, rozprawješe prezident Wolodymyr Zelenskyj wčera wječor w swojim widejowym poselstwje. „Štyri dalše kraje na wjeršku, dźakuju so wam.“ Znate je, zo chce zwjazkowy kancler Olaf Scholz (SPD) Němsku na konferency zastupować. Mjeztym Ruska ze swojej ofensiwu dale pokročuje.
Šwicarska organizuje po přeću Ukrainy 15. a 16. junija na hrodźe Bürgenstock pola Luzerna wjerškowe zetkanje. Na nim chcedźa wjace mjezynarodneje pomocy za nadpadnjeny kraj mobilizować. Ukraina so nadźija, runje neutralne abo samo z Ruskej spřećelene kraje na juhu wo swojej poziciji přeswědčić. Wosebje intensiwnje prócuja so wo Chinu. Njeńdźe w prěnim rjedźe wo měrowe jednanja z Ruskej. Moskwa njeje scyła přeprošena a tak a tak wotpokazuje, so na tajkej konferency wobdźělić.
