To a tamne (17.06.24)
Awto rentnarjow rubił je muž wčera we Werdauwje w Šwikawskim wokrjesu. Wobaj chcyštaj wóz njedaloko tankownje samaj wurjedźić, jako so njeznaty za wodźidło awta sydny a wotjědźe. 70lětny podarmo spytaše, paducha zadźeržeć. Při tym so starc snadnje zrani. Policija paducha krótko na to njedaloko starownje lepi, hdźež awto steješe. 48lětny bě wopity. Wón dyrbi so rubježneho padustwa a dalšich přeńdźenjow dla zamołwić.
Grilowaneho krokodila zesłodźeć dali su sej wobydlerjo gmejny Bulla na sewjeru Awstralskeje, hdźež bydla prawobydlerjo Aborigine. Krokodil bě so stajnje zaso dźěćom a psam bližił a wulki njeměr zbudźił. Skónčnje ze zamołwitymi wobzamknychu, 3,63 metrow dołhi krokodil zatřělić. Po wašnju prawobydlerjow sydaše potom krokodilowa poliwka a grilowane mjaso w bananowych łopjenach.
Zazběh europskeho koparskeho mišterstwa w Němskej
Po 1988 a jednotliwych hrach 2021 wotměje so europske koparske mišterstwo muži lětsa zaso raz w Němskej. K zazběhej přijimuje wubranka Němskeho koparskeho zwjazka DFB narodne koparske mustwo Šotiskeje. Po dočasnym kóncu při zašłych turněrach, chce němske narodne mustwo w swójskim kraju fanow zahorić a jeli móžno trofeju w Berlinje přijeć. Tola tež Šotiska bě naposledk w kwalifikaciji za EM zahoriła a móžeše so jako skupinski druhi direktnje za turněr w Němskej kwalifikować. Nětko trjechitej mustwje w Allianz Arenje, w Mnichowje, w zazběhowej hrě na so. Zahajenska hra so live w telewiziji na sćelaku ZDF kaž tež w livestreamje w interneće wusyła. Přihotowanje započnje so dźensa w 19.25 hodź. a zakop zazběhoweje partije budźe w 21.00 hodź.
AfD so sudnisce přesadźiła
Gelsenkirchen (dpa/SN). Město Essen dyrbi AfD měšćansku žurlu Grugahalle za jeje zjězd kónc junija přewostajić. To je zarjadniske sudnistwo w Gelesenkirchenje rozsudźiło. Wusud njeje hišće płaćiwy. Po měnjenju sudnistwa ma AfD prawo na runostajenje při wužiwanju zjawnych městnosćow kaž Grugahalle. Z njej njesmědźa hinak wobchadźeć hač z druhimi stronami. Essen bě AfD zrěčenje wo wužiwanju hale wupowědźiło.
Bamž přijědźe na wjeršk G7
Bari (dpa/SN). Na wjerškowym zetkanju skupiny G7 w Italskej wočakowachu dźensa nimo statnych a knježerstwowych šefow wjacorych krajow tež bamža Franciskusa. Italska ministerska prezidentka Giorgia Meloni bě jeho přeprosyła. Nawoda wjace hač 1,3 miliardy katolikow po wšěm swěće chce so na rozmołwnym kole wo kumštej inteligency wobdźělić. Wjeršk w luksusowym hotelu nad Adriju so jutře skónči.
Bencinowe awto so zapaliło
Zwjazkowy prezident Frank-Walter Steinmeier (srjedźa, kiwajo) je ...
Zrěčenje mjez USA a Ukrainu
Pruwuja rozsudy ministrow
Tesla warnuje
Israelscy zastajency hišće žiwi?
Beirut (dpa/SN). Dlěje hač wosom měsacow po nadpadźe na Israel islamistiska Hamas po swójskich informacijach njewě, kelko zawlečenych zastajencow w Gazaskim pasmje je hišće žiwych. „Njewěm to. Nichtó to njewě“, rjekny rěčnik Hamas Osama Hamdan sćelakej CNN.
Minjenu sobotu běchu israelscy wojacy při wulkim wojerskim zasadźenju štyrjoch zastajencow z rukow Hamas wuswobodźili a při tym – po informacijach Hamas – 274 Palestinjanow morili.
W Israelu dochadźa hižo měsacy k demonstracijam. Ludźo žadaja sej wot knježerstwa Benjamina Netanjahuwa wjetšu prócu, zo móhli so zastajency zaso nawróćić. Tući hraja tež wažnu rólu při indirektnych jednanjach mjez Israelom a Hamas wo přiměrje. Prezident USA Joe Biden namjetuje nachwilny přiměr, zo móhli žónskich a staršich zastajencow pušćić. Při wšěm z tym liča, zo njeje najwjetši dźěl zwostawacych 120 israelskich zastajencow hižo žiwych.
Dobyće snadne, ale zbožowne
Pólska Wobydlerska koalicija so při europskich wólbach přesadźiła
Waršawa. Wólby Europskeho parlamenta minjenu njedźelu běchu w Pólskej w prěnim rjedźe zasadne wothłosowanje: na dobro noweho knježerstwa Wobydlerskeje koalicije (KO) ministerskeho prezidenta Donalda Tuska abo přećiwo njemu na dobro bywšeho knježerstwa PiS z Jarosławom Kaczyńskim na čole. Na kóncu bě jasne, zo je Tusk wothłosowanje dobył, byrnjež přewšo snadnje. 37,06 procentow Polakow bě kandidatow koalicije woliło, za zastupnikow PiS wupraji so 36,16 procentow. Njesměrnje zbožowny prezentowaše so Tusk zhromadnje z Waršawskim wyšim měšćanostu Rafałom Trzaskowskim po wozjewjenju wólbnych wuslědkow. Kaczyński porno tomu je spytał poražku relatiwizować, wšako pobrachowaše jemu na kóncu woprawdźe „jeničce“ 100 000 hłosow.
Karta wólbnych wokrjesow Pólskeje jasnje pokazuje, zo je kraj politisce dale pačeny: Zapad je kruće w rukach Europje přichileneje liberalneje Wobydlerskeje koalicije. Wuchodne kónčiny steja za narodno-konserwatiwnej PiS.
