Tukajana sabotažu
Zelenskyj: Wuswobodźimy kraj
Kijew (dpa/SN). Najebać wot ruskich okupantow přewjedźene pozdatne ludowe wothłosowanje je ukrainski prezident Wolodymyr Zelenskyj připowědźił, zo chcył wobsadźene kónčiny wróćo zdobyć. Wothłosowanje wo přistupje k Ruskej wón we widejowym poselstwje z raznymi słowami wotpokaza. Krótko do toho běchu wot Moskwy zasadźene instancy zdźělili, zo je so 99 procentow ludźi we wobsadźenych kónčinach za přistup k Ruskej federaciji wuprajiło. Zelenskyj rjekny: „Pohibujemy so doprědka a wuswobodźimy swój kraj.“
We widejowej narěči před posedźenjom bjezstrašnostneje rady UNO Zelenskyj hladajo na ruskeho prezidenta Wladimira Putina doda: „Aneksija je skutk, z kotrymž steji wón nětko sam napřećo cyłemu swětej“.
Pozdatne wothłosowanja, kotrež je Ruska we wobsadźenych kónčinach pod wulkim mjezynarodnym protestom pjeć dnjow dołho přewjesć dała, njejsu mjezynarodnje připóznate. Wobkedźbowarjo su minjene dny wospjet na to pokazali, zo su wobydlerjow wobsadźenych kónčin k wothłosowanju nuzowali.
Domjacej nadawkaj
To a tamne (28.09.22)
Za swoju rólu jako kriminalistka w nowym rjedźe kriminalnych filmow „Lauchhammer“ je dźiwadźelnica Odine Johne samo jězbnu dowolnosć wuspěšnje złožiła. Tole je 35lětna nowinarjam přeradźiła. Cyłkownje šěsć pokročowanjow su produkowali, w kotrychž tež ničenje łužiskeje krajiny přez brunicowe jamy nazornje dokumentuja. Prěni dźěl serije „Łuchow – smjerć we Łužicy“ wusyłaja dźensa wječor w 20.15 hodź. w ARD.
Pućowaca policistka Sandra Köhler je wjace hač 10 000 eurow za wopory katastrofalneho zapławjenja w dole rěki Ahr nazběrała. 48lětna kriminalna hłowna komisarka je předwčerawšim, póndźelu, po 24 dnjach, 19 etapach a 415 kilometrach do Kassela doběžała. Policistka bě so 3. septembra na puć podała a je na swojim puću we wšitkich policajskich prezidijach Hessenskeje pozastała.
Warnuje před škodami
Berlin (dpa/SN). Hospodarski minister Robert Habeck (Zeleni) je wysokich płaćiznow energije dla před trajnymi škodami w hospodarstwje Němskeje warnował. Wón wupraja so za wobšěrnu pjenježnu podpěru zwjazkoweho knježerstwa. Powěsćerni dpa wón rjekny, zo chcyło knježerstwo wšu financnu móc nałožić, zo by hospodarstwo přez krizu wjedło, dźěłowe městna zaručiło a inwesticisku móc hospodarstwa škitało.
Dźěry w płunowodomaj
Kopenhagen (dpa/SN). Zamołwići w Danskej su cyłkownje tři dźěry na płunowodomaj Nord Stream 1 a 2 zwěsćili. Defekty su njedaloko kupy Bornholm identifikowali. Dokelž njejstej płunowodaj tuchwilu aktiwnej, njewobsteji strach za zastaranje Europy a Danskeje. Łódźam pak radźa, so městnow wzdać. Přičiny njedostatkow dotal njeznaja. Wčera wječor běchu zwěsćili, zo ćišć w płunowodźe Nord Stream 1 masiwnje woteběra.
Tysacy zaso demonstrowali
Problemy Łužicy wobjednawali
Njedostatki při mobilizowanju
Moskwa (dpa/SN). Hladajo na rozprawy wo nućenjach a namocy při zwołanju rezerwistow je Krjeml njedostatki při dźělnym mobilizowanju přiznał. „Mamy woprawdźe pady, w kotrychž su dekret prezidenta Wladimira Putina ranili“, zdźěli rěčnik Krjemla Dmitrij Peskow wčera powěsćerni Interfax. „Nadźijamy so, zo so tempo wotstronjenja pospěši a zo so wšitke zmylki koriguja.“
Putin bě hladajo na do dołhosće so ćahacu wójnu přećiwo Ukrainje a na poražki swojeho wójska dźělne mobilizowanje wukazał. Na wšě 300 000 rezerwistow chcedźa do wójska zwołać. Zamołwite za organizaciju zwołanja su wokrjesne woborne komanda. Zdobom Peskow potwjerdźi, zo njejsu hišće wo wukazanju wójnskeho prawa rozsudźili. To by rěkało, zo njesmědźa mužojo we wobornej starobje wjace kraj wopušćić. Zo bychu so zwołanju do wójska wuwinyli, tuchwilu tysacy mužow z Ruskeje ćěka.
We wot Ruskeje wobsadźenych kónčinach Ukrainy su dźensa pozdatny referendum wo přistupje k Ruskej skónčili.
Wysk a starosće po wólbach
Prawicarjo w Europje italskej wólbnej dobyćerce gratulowali
Paris/Rom (dpa/SN). Po wólbnym dobyću prawicarskeho lěhwa při wólbach parlamenta w Italskej je francoska ministerska prezidentka Élisabeth Borne připowědźiła, zo chcyła na škit zakładnych prawow we wšitkich čłonskich statach EU dźiwać. „Mamy w Europje cyły rjad hódnotow a wězo na to hladamy, zo je nastupajo čłowjeske prawa a prawo na wotehnaće we wšitkich krajach respektuja“, rjekny Borne wčera sćelakej BFMTV.
Za druhi stil
Kreatiwne ideje wuzwolili
Drježdźany (SN). Ze zapodatych 977 projektowych idejow wubědźowanja „Simul+ – Čiń sobu!“ wuzwolichu 545 kreatiwnych projektow, kaž wčera sakski statny minister za regionalne wuwiće Thomas Schmidt (CDU) a jednaćel sakskeho krajneho kuratorija Wjesny rum z.t. Peter Neunert wozjewištaj. Fonds je do štyrjoch wubědźowanskich modulow rozdźěleny, kotrež so z dohromady 7,6 milionow eurami mytuja.
W modulomaj „komuna“ a „regionalna kooperacija“ dóstanje cyłkownje 37 městow a gmejnow zhromadnje ze swojimi partnerami myta we wysokosći 60 000 do 250 000 eurow. W Budyskim wokrjesu stej to na přikład město Wojerecy a gmejna Worklecy. Poslednja chce z mytowanjom kupu srjedź wjeski wožiwić. Ze Zhorjelskeho wokrjesa wobdźěli so město Běła Woda, kotraž chce składnostnje 150. jubileja města škleńčernje wuměłski festiwal přewjesć. Tež gmejna Slepo wuznamjeni so za ideju digitalneho gratu za turistow.
