Starosća so planow Šwicarskeje dla
Bern/Stuttgart/Berlin (dpa/SN). Šwicarske plany za kónčne składźišćo atomowych wotpadkow a připrawy za zapakowanje blisko mjezy do Badensko-Württembergskej su protest a starosće wobydlerjow zbudźili. Němske města a gmejny při Wysokim Rynje kritizowachu planowany twar připrawy za palne elementy na stejnišću Würenlingen, něhdźe 15 kilometrow južnje němskeje gmejny Waldshut-Tiengen. To woznamjenja 67 000 ludźom wulke poćeženje, wčera wjacori wjesnjanosća zdźělichu.
„Namjety za stejnišća na wědomje bjerjemy a budźemy je we wuměnje ze swojimi šwicarskimi susodami pruwować“, statne ministerstwo Badensko-Württembergskeje wozjewi. Plany Šwicarskeje su najprjedy jenož mjezykročel w hišće njewotzamknjenym procesu. Poprawne kónčne składźišćo atomowych wotpadkow ma blisko němskeje gmejny Hohentengen nastać. Radioaktiwne smjeća chcedźa tam w sta metrach hłubokosće składować. Před něšto lětami běchu so Šwicarjo hišće za druhe stejnišćo rozsudźili.
Za žónsku kwotu hłosowali
Na stronskim zjězdźe so modernizowanje CDU wotbłyšćowało
Hannover (dpa/SN). CDU je so za přiměrjenje mzdow rozhłosowych sćelakow ARD, ZDF a Deutschlandradio na niwow zjawneje słužbje wuprajiła. Tole wuchadźa z próstwy Młodeje unije (JU), kotruž su zawčerawšim na stronskim zjězdźe CDU w Hannoveru wobzamknyli. Lěta dołho so přeco zaso wo wysokosći mzdow předewšěm intendantow wadźa. Naposledk je so debata w běhu krizy pola sćelaka ARD Berlin-Braniborska (RBB) kołowokoło wumjetowanjow přećiwo bjezposrědnje pušćenej intendantce Patriciji Schlesinger zaso přiwótřiła.
Njejasne je, kak móhło so kaž nětko wot CDU nastorčene přiměrjenje konkretnje zwoprawdźić. W statnych zrěčenjach postajeja zwjazkowe kraje nadawk a strukturu zjawnoprawniskeho rozhłosa.
To a tamne (12.09.22)
W spominanju na posledni wustup britiskeje Queen na polu komedije je něchtó w Šotiskej město kwětkow marmeladowy sandwich před palast w Edinburghu połožił. Do plastoweje tity zapakowany chlěb ležeše hromadźe z plyšowym mjedwjedźom před wrotami kralowskeho hrodu. Queen bě so za widejowy klip k swojemu 70lětnemu trónowemu jubilejej lětsa ze znatym barom Paddingtonom na čaj zetkała. K tomu sydachu marmeladowe pomazki.
Dokelž jeho žona njeje přestała rěčeć, je muž w Nußdorfje w bayerskim Chiemgauwje policiju zawołał. Mjeztym zo po informacijach policije „słyšomnje zatrašeny“ muž ze zastojnikami při telefonje rěčeše, ćekny wón z domu na zahrodu. Po słowach policije bě žona po ludowym swjedźenju „wočiwidnje sylnje alkoholizowana“.
Swět reaguje na smjerć kralowny Elisabeth II.
Chwalba wuknjacym
Berlin (dpa/(SN). Społnomócnjeny zwjazkoweho knježerstwa za antisemitizm Felix Klein je młodostnych pochwalił, kotřiž so přećiwo wumjezowanju a za dopominanje na holocaust angažuja. To je wažny přinošk za žiwu a wobornu demokratiju, rjekny Klein powěsćerni dpa składnostnje dźesaćlětneho wobstaća programa „Posoł Anny Frank“. Tón měri so w mjenje wot nacijow zamordowaneje holcy Anne Frank na wuknjacych, kotřiž chcedźa projekty k dopomnjenju na abo přećiwo antisemitizmej zeskutkownjeć.
CSU: Wuslědki wozjewić
Mnichow (dpa/SN). CSU je zwjazkoweho hospodarskeho ministra Roberta Habecka (Zeleni) namołwiła, zo by detailowane wuslědki milinoweho stresoweho testa wozjewjał. „Ludnosć ma prawo na transparencu“, rjekny generalny sekretar CSU Martin Huber dźensa powěsćerni dpa. Wozjewjenje powerpoint-prezentacije jako wuslědk njewotpowěduje wuznamej přepytowanja a wuskutkowanjam z toho slědowacych rozsudow. Huber je jasne dwěle studiju nastupajo přizjewił.
Žadanja komunow wotpokazał
Prawidła korony dla za nazymu wobzamknyli
Berlin (dpa/SN). Wobydlerjo maja so wot 1. oktobra na nowe zawjazki korony dla w nazymje a zymje nastajić. Zwjazkowy sejm je wčera paket zakonjow zwjazkoweho knježerstwa nastupajo maski a testy wobzamknył. Centralne postajenja předpisuja mjez druhim winowatosć nahubnika w dalokowobchadnych ćahach, klinikach a lěkarskich praksach. Kraje móža tež w hosćencach a dalšich nutřkownych rumnosćach nošenje maski předpisać. W lětadłach tale winowatosć njepłaći.
386 zapósłancow hłosowaše za plany, 313 bě přećiwo tomu, třo so hłosa wzdachu. Zwjazkowa rada dyrbi zakonjej hišće přihłosować.
Po słowach zwjazkoweho ministra justicy Marca Buschmanna (FDP), kotryž je naćisk zakonja hromadźe ze zwjazkowym ministrom za strowotnistwo Karlom Lauterbachom (SPD) zapodał, njejsu w naćisku „žane lockdowny, zawrjenja zawodow a šulow, žadyn zakaz demonstracijow“ zakótwjene. Skoro wšitcy eksperća pak liča z přiwótřenjom infekciskeho połoženja. Stat dyrbi za to jednanjakmany być, kaž rěkaše.
Dźěłaja dale
Frankfurt nad Mohanom (dpa/SN). Po eklaće při wothłosowanju a krizowych posedźenjach w nocy su synodalnu zhromadźiznu reformoweho procesa němskich katolikow dźensa pokročowali. Předsyda Němskeje biskopskeje konferency, Georg Bätzing, pak je w Frankfurće nad Mohanom wo krizy rěčał.
Na předwječoru bě we wothłosowanju zasadny tekst seksualnu moralku cyrkwje nastupajo na trěbnej wjetšinje dweju třećinow biskopow zwrěšćiła. Biskopja a druzy wobdźěleni su na to w dźělenymaj posedźenjomaj rozjimali, kak chcedźa nětko dale postupować. Wosebje lajscy zastupnicy běchu přewšo přesłapjeni.
To a tamne (09.09.22)
Zakaz nošenja kupanskich črijow w swojej šuli wupraja srjedźna šula Elsa-Triolet šulerjam we francoskim Saint-Denisu. Jako přičinu mjenowaše wučer šule falowacy škit při přewjedźenju chemiskich pospytow. Hačkuli wobsteji na francoskich šulach jenož zakaz nošenja drasty z nabožnymi symbolemi, žada so wot šulerjow korektna drasta. Na naprašowanje so to šulerjam njespodoba.
Wulku plantažu cannabisa z wjace hač 1 000 rostlinami su slědźerjo policije w Grjekskej nadešli a štyrjoch podhladnych zajeli. Wot 3. septembra sem su rostliny poněčim we wotležanej kónčinje na kupje Evia namakali, kaž policija štwórtk zdźěli. Bychu-li so předźěłane rostliny na drogowych wikach zwičnili, bychu skućićeljo něhdźe 2,5 milionow eurow zasłužili. Grjekska a Albaniska matej najwjetšu cannabisowu produkciju.
Pomoc mjeńšim firmam
Berlin (dpa/SN). Zwjazkowy hospodarski minister Robert Habeck (Zeleni) je předewzaćam w krizy energijow a płaćiznow podpěru přilubił. Politikar rěčeše dźensa w zwjazkowym sejmje wo wulkim wuchowanskim pakeće wosebje na dobro małych a srjedźnostawskich firmow. Dotal koncipowanu podpěru, na kotruž bě so ampla kónc tydźenja dojednała, chcedźa runje tak na wone předewzaća rozšěrić. Tež wusměrjenje na wikowanje ma jako kriterij wotpadnyć.
Dale po Synodalnym puću
Frankfurt nad Mohanom (dpa/SN). Najebać raznu kritiku z Vatikana su němscy katolikojo swój reformowy proces „Synodalny puć“ dźensa pokročowali. K štwórtemu razej schadźuje so hač do soboty na Frankfurtskich wulkowikach synodalna zhromadźizna. Jej přisłušeja biskopja, měšnicy, cyrkwinscy sobudźěłaćerjo a mnozy lajscy zastupjerjo. Wuradźuja tež wo změnach seksualneje moralki cyrkwje.
Blokada – ludomordarstwo?
Šefreporter reagujena nadběhi
Wjazońca (SN/MiR). Šefreporter magacina Cicero Moritz Gathmann zwuraznja, zo nima so Budyšin jako „brown under“ difamować. Wón bě zašły pjatk z koleginu we Wjazóncy rešeršował. Magacin Cicero zaběra so tuchwilu z temu, kak so energijowa kriza na towaršnosć, politiku a hospodarstwo wuskutkuje. W swojim tweeće na Facebooku wón sobotu piše: „Je tam, a to wěm z mnohich jězbow a znajomstwow, wjele dobrych ludźi. Tuž: stupće so napřećo a njebojće so. Na samsnym městnje wón wo swojich dožiwjenjach w Hornim kraju za Budyšinom powěda. Wón bě zhromadnje z fotografku tón wječor na zarjadowanju „Budyskeho měra“ w hosćencu „Zur deutschen Eiche“ rešeršował. Na zarjadowanju běštaj po měnjenju Gathmanna nošnu rólu zabrałoj něhdyša moderatorka MDR Katrin Huß a mějićel twarskeho předewzaća Hentschke Bau Jürgen Drews. Přitomnosć žurnalistow so po jeho wopisowanju přiwótři a skupina neonacijow jeju dźěło registrowaše, komentowaše a spyta jemu zadźěwać. Po zarjadowanju měrještaj so po zdaću dwajo z nich na awto reportera a je wobškodźištaj.
