Hdyž pjenjezy pobrachuja, potom lutujemy rady na městnach, wot kotrychž sej myslimy, zo wažne njejsu. Samsny princip nawožuje tež stat. W Berlinje smy widźeli, kak spěšnje je etat za kulturu skrótšeny. Tomu měli w Sakskej zadźěwać, to maja Zeleni cyle prawje. Kultura je za demo­kratisku towaršnosć – haj, za strowu towaršnosć docyła – njeparujomna. Wosebje iniciatiwy a institucije participowanja, kaž Budyski Thespis-centrum, su šrubiki, kotrež konstrukt našeho zhromadneho žiwjenja hromadźe dźerža, wšako skića ­wone wšěm tym móžnosć dźiwadło dožiwić, kotrychž tute dotal docpěło njeje. Zo njedóstawa Budyski centrum hižo dalše spěchowanje, je zahubny signal. Integra­cija, participacija, wjeselo a kreatiwita maja tak znowa mjenje móžnosćow so w měsće wuwiwać. Zo chcedźa so zamołwići čestnohamtsce dale angažować, za to měli jim wšu česć wopokazać, wšako jich dźěło runjewon lochke njeje.

Maximilian Gruber

Zanurjeny do wobrazowki swojeho šmóratka je 42lětny muž w Bremerhavenje do rěki Weser padnył. Jenož z pomocu přewodźerki so mužej poradźi, w lód­zymnej rěce a póćmje w přistawje schody z wody namakać. Mobilny telefon pak wostanje zhubjeny. Policija wo to prosy, najebać napjate hry na smartphonje na wonkowne wobstejnosće njezabyć. Do wody padnyć móže při aktualnych wjedrowych wobstejnosćach strašne być.

Třo zymscy turisća z Israela su so na ­horje w Japanskej zabłudźili a čakaja na pomoc. Ze swojimi sněhowymi deskami su sej mužojo na wjeršku hory w cen­tralnej Japanskej do paslow zalězli. Tam drje dyrbja hišće chwilu wutrać, dokelž njemóža so pomocnicy špatneho wjedra dla na puć k nim podać. Hakle hdyž je so wjedro polěpšiło, móža helikoptery hórskeje słužby zaso lećeć.

W zašłym tydźenju roznjese so zrudźaca powěsć po Łužicy, zo je njedźelu, 29. decembra, w starobje 84 lět zemrěła ně­hdyša Čornochołmčanska wjesnjanostka a jako „mać Krabatoweho młyna“ znata Gertrud Wincarjowa.

Jako reporterka sym ju w Čornym Chołmcu wosobinsce zeznała, jako je so projekt „Krabatowy młyn“ runje hakle započał. Mi wona wot spočatka impo­nowaše – ze swojim direktnym, runym wašnjom, kiž pokazowaše zdobom jeje wulku wutrobu. Gertrud Wincarjowa zwjazowaše wulki optimizm ze strowym realizmom, měješe sony a wědźeše, kak je zwoprawdźić: z njepředstajomnej kreatiwitu a zasakłosću. „Njeńdźe“ pola njeje njedawaše. Tež, dokelž telko ludźi znaješe a zapřahny, dokelž sama sobu rukawy wuhorny a přeco w prědnim rynku fronty steješe, njemóžeše jej nichtó „ně“ rjec.

Hladajo na we wudaću SN minjeny pjatk wozjewjeny artikl „Łužiska Alianca so wobara“ chce so Hanzo Wylem-Keł k tematice wuprajić a wobsahej přinoška znapřećiwić.

Wětošow. „Ronny Böhme bu hižo lěta 2022 přisłodźenjow a wopačnych wuprajenjow dla z čłonstwa a zastojnstwow Łužiskeje Aliancy wuzamknjeny. Tuchwilu pak so ze starymi dokumentami jako čłon „předsydstwa“ wudawa a wopačne twjerdźenja šěri. Wólbna komisija a wólbny wuběrk Serbskeho sejma stej informowanej. Wěcownje njezmyslnych wuprajenjow dla njejsu potrjecheni twjerdźenja Ronnyja Böhmeho chutnje brali. Tuž je so nětko na někotre medije wobroćił. Podobne podawki z knjezom Böhme hižo wospjet w Hornjej Łužicy wobkedźbowachmy, čehoždla su tež druhe towarstwa jeho ze samsnych přičin wuzamknyli! Přećiwo Ronnyjej Böhme chłostanskoprawnisce postupujemy, dokelž je sej wón hišće dalše njewopřijomne wěcy dowolił.