Mario Voigt jako premier woleny
Erfurt (dpa/SN). Politikar CDU Mario Voigt je nowy ministerski prezident Durinskeje. 47lětny je dźensa w krajnym sejmje w Erfurće hnydom w prěnim wólbnym kole trěbnu absolutnu wjetšinu hłosow měł, byrnjež jeho nowa koalicija CDU, BSW a SPD tam žanu swójsku wjetšinu njedocpěła.
Móžno tole bě, dokelž je so po wšej Němskej prěnja tak mjenowana koalicija ćernjowki hišće do posedźenja sejma z Lěwicu dojednała. Tak njebě wukónc wólbow wot AfD z jeje předsydu Björnom Höcke wotwisny. Lěwica je připowědźiła, zo chce za Voigta hłosować. „AfD njesmě žane jewišćo dóstać“, rjekny frakciski šef Lěwicy Christian Schaft.
Při wólbach ministerskeho prezidenta hłosowaše w prěnim kole 51 zapósłancow za Voigta, 33 přećiwo njemu, štyrjo so hłosa wzdachu. Koalicija Voigta ma w krajnym sejmje jenož 44 z cyłkownje 88 mandatow. Tajneho wothłosowanja w kabinach dla njeje tuž jasne, hač njeje Voigt tež hłosy AfD dóstał. AfD je ze 32 zapósłancami najsylniša frakcija.
„Njesměmy so wróćo sćahnyć“
Minister Pistorius za sylniše zasadźenje Němskeje na Bliskim wuchodźe
Bagdad (dpa/SN). Zakitowanski minister Boris Pistorius (SPD) chce po powalenju dotalneho režima w Syriskej połoženje na Bliskim wuchodźe stabilizować. Na kromje knježerstwowych rozmołwow w Iraku přilubi politikar SPD sylniše zasadźenje Němskeje, jeli sej kraje regiona tole přeja. Hladajo na polóženje w Syriskej Pistorius rjekny, zo móhł sej zhromadne dźěło z nowymi mócnarjemi pod wěstymi wuměnjenjemi předstajić.
„W přichodnych měsacach dyrbimy nowe formaty wěstotneje kooperacije zdźěłać, zo móhła tež Němska zamołwitosć přewzać, runje hladajo na Syrisku“, wón měni a doda zo tole „spektrum nadawkow jasnje rozšěrja“.
Móc ze wšěm gwałtom
To a tamne (12.12.24)
Na wšěch 46 620 namakankow su lětsa hač do kónc nowembra w běrowje Berlinskich wobchadnych zawodow wotedali. Najčasćišo wotedachu toše, nachribjetniki a wačoki, rěčnica zdźěli. Wosebje kuriozne zhubjene wěcy su drohotny kožuch za šiju, fetišowe drasty, kostimy a dźěćace plastowe awto. Něhdźe 35 procentow namakankow wobsedźerjam zaso wróća. Jeli so nichtó njepřizjewi, wěcy po šěsć tydźenjach přesadźuja.
Wulkowikowarja drogow su w Drježdźanach zajeli. 24lětnemu wumjetuja, zo je něhdźe 70 kilogramow Crystal Metha w Drježdźanach a Lipsku předawał. Tež w Berlinje je kilogramaj kokaina předał. Hódnotu drogow trochuja na 785 000 eurow. Při přepytowanju jeho bydlenja w Drježdźanach namakachu 30 000 eurow a brónje. Fachowcy běchu so do komunikaciskeje syće dealera zadobyli.
Zwiski mjez Awstralskej a Łužicu hajił
Něhdyši předsyda Wend/Sorb Society of South Australia Dennis Jenke zemrěł
Z Awstralskeje je dóšła powěšć, zo je 3. nowembra 2024 w Lobethalu pola Adelaide zemrěł angažowany sobustaw a wjacelětny předsyda serbskeho towarstwa w Južnej Awstralskej, knjez Dennis Jenke, w starobje 94 lět. Wón zawostaji swoju mandźelsku June, syna Marka, dweju wnučkow a prawnučka. Jako swěrny sobustaw lutherskeje cyrkwje namaka swój posledni wotpočink na wosadnym kěrchowje w Lobethalu.
Potomnik serbskeje swójby
Ze zrěčenjom njespokojom
Drježdźany (SN). Gmejny a wokrjesy w Sakskej kritizuja koaliciske zrěčenje CDU a SPD a sej předźěłanje tutoho žadaja. Pozadk je, zo deficit w etatach dale a bóle stupa. Předewšěm w zakonju předpisane wysoke socialne kóšty a wysoke płaćizny za energiju kaž tež personal komuny poćežuje.
Poprawom chcyštej stronje do jednanjow wo koaliciskim zrěčenju komunam hladajo na financielnu nuzu pomhać. Z koaliciskeho zrěčenja pak to nawopačne wuchadźa. Tak sej komuny žadaja, so nowych planowanych socialnych wudawkow wzdać. W lěće 2028 planowane darmotne předšulske lěto za wšitke dźěći w Sakskej měło so šmórnyć. Jeničce za tónle projekt dyrbjeli w Sakskej 250 milionow eurow wob lěto nałožić. Tohorunja měła koalicija planowany moratorij za pěstowarnje cofnyć. Tak stej CDU a SPD hladajo na znižace so ličby dźěći w pěstowarnjach wobzamknyłoj, personalne kóšty njepřikrótšić. Za lěto 2025 a 2026 to cyłkownje 120 milionow eurow wjace kóštow zawinuje. Komuny maja tohorunja za trěbne, zo so w zjawnej słužbje dźěłowe městna wottwarja.
Scholz próstwu zapodał
Berlin (dpa/SN). Zwjazkowy kancler Olaf Scholz (SPD) je dźensa wotpowědujo artiklej 68 wustawy prezidentku zwjazkoweho sejma Bärbel Bas (SPD) wo to prosył, w zwjazkowym sejmje prašenje dowěry na dnjowy porjad stajić. Scholz chce po pušćenju zwjazkoweho financneho ministra Christiana Lindnera (FDP) 23. februara dočasne nowowólby zwjazkoweho sejma přesadźić. Zwjazkowy sejm přichodnu póndźelu wo dowěrje rozsudźi. Wuslědk wothłosowanja njeje jasny.
Iran wumjetuje USA a Israelej
Teheran (dpa/SN). Iranski prezident Ajatollah Ali Chamenei je njepřećelomaj kraja Israelej a USA wumjetował, zo su za powalenje režima syriskeho mócnarja Bashara al-Assada zamołwite. „Nichtó njedwěluje, zo su podawki w Syriskej wuslědk amerisko-cionistiskeho plana“, nabožny nawoda Irana rjekny. Chamenei twjerdźi, zo ma dopokazy za komplot Israela. Přiwšěm pak je njemjenowaše.
Dulig njebudźe wjace minister
