Kamjenica/Drježdźany (dpa/SN). W swojej wčerawšej nowolětnej narěči je so ministerski prezident Sakskeje Michael Kretsch­mer (CDU) za wjace wotewrjenosće a zhromadnosće w našej towaršnosći wuprajił. „Pomhajmy sej mjez sobu, w swójbje, susodstwje, mjez kolegami, w sportowym towarstwje“, podšmórny politikar w Kamjenicy, lětušej Europskej kulturnej stolicy. „Chcemy přećelnu, so błyšćacu a optimistisku Saksku“, wón praji. Generacija měrliweje rewolucije w lěće 1989 je dźensniša generacija staršich. „Tući móža tehdyši duch změny, jich wote­wrjenosć a jich zwólniwosć so gratu přimać na nowu generaciju dale dawać.“

Kretschmer wuzběhny wuznam industrije za město Kamjenicu a cyłu Saksku, skedźbni pak tež na aktualne wužadanja němskeho hospodarstwa a z tym zwisowace financne wobmjezowanja Swobodneho stata w nowym lěće. „Hospodarsku situaciju pak móžemy sami pozitiwnje wobwliwować“, wón zwurazni. Statne knježerstwo chce wšitko činić, zo by hospodarski trend do praweho směra zahibnyło.

Wjac pjenjez za někotrych – wyše kóšty za druhich

Budyšin (dpa/SN/VaŽ). Wuměnkarjo smědźa so nad wjac pjenjezami wjeselić, mjeztym zo budźe porto za listy dróši. Lětsa so tójšto prawidłow změni, štož změje čujomne wuskutki na dochody mnohich ludźi. Lěto 2025 přinjese najprjedy mnoho lěpšinow: Za dochody hač do wysokosće 12 096 eurow njetrjebaja so dawki płaćić. Bjezdawkowa suma dźěći pak je 9 600 eurow. Minimalna mzda zwyši so wo 41 centow na 12,82 eurow. Tež wukubłacy w prěnim wukubłanskim lěće móža so wjeselić, woni zasłuža nětko měsačnje znajmjeńša 649 eurow. 18 eurow wjace hač dotal, mjenujcy 556 eurow smědźa ludźo z minijobom měsačnje zasłužeć. Wot julija móža seniorojo ze zwyšenjom rentow wo něhdźe 3,5 procentow ličić. Dźěćacy pjenjez zwyši so wo 5 eurow na 255 eurow a přiražka za dźěći w swójbach z niskimi dochodami na 25 eurow. Wot 1. meje smědźa mandźelscy zhromadne dwójne mjeno z wjazawku abo bjez njeje wjesć. Hladanski personal dóstanje wot julija wyšu minimalnu mzdu. Online-shopy dyrbja wot junija za wšěch ludźi, tež za kupcow z handicapami, bjez barjerow być.

„Same procedure as every year“ je drje najznaćiši citat ze skeča, kotryž ludźi mjeztym hižo wjace hač šěsć lětdźesatkow předewšěm silwester zabawja. Cyle tak dołho so w Němskej wo dalšim fenomenje na kóncu lěta njediskutuje, při­wšěm by so hesło tež tu hodźało. Hladajo na zranjenja ze zdźěla fatalnymi konsekwencami wudyri po wulkim praskotanju prawidłownje debata, hač njeby jenički, profesionelnje wuhotowany wohnjostroj wob město dosahał a hač měli so praskadła scyła hišće priwatnikam předawać. Politisce so tajkele žadanje drje ­nje­zwoprawdźi – byrnjež wjetšinje towaršnosće wědome było, zo pyrotechnika wobswětej a přirodźe runjewon njetyje, skót a zwěrinu zamyla, wosobowe a wěcne škody wuskutkuje a naposledk hobersku hromadu wotpadkow zawostaja. Ale tale swoboda! A apropos politika: Hdyž hižo (njeeficientnje) mjezy kontrolujemy, njemóhli zastojnicy tež raz za ilegalnymi praskotakami hladać? Bosćan Nawka

Berlin (dpa/SN). W Němskej su ludźo 2024 znowa něšto mjenje klasiskeje linearneje telewizy hladali. Tak wučinješe přerězny čas hladanja po informacijach Dźěłoweho zjednoćenstwa za telewizijne slědźenje (AGF) mjez ludźimi wot třoch lět přerěznje 171 mjeńšin wšědnje – jědnaće minutow mjenje hač lěta 2023.

171 mjeńšin wšědnje, to stej dwě hodźinje a 51 mjeńšin. Młodźi ludźo (14 do 49 lět) hladaja wšědnje 79 mjeńšin, hodźinu a 19 mjeńšin. To je wo wjele mjenje hač přerězk. Wosebje ludźo nad 50 lětami so wo to postaraja, zo je přerězny čas hladanja wo wjele wyši.

Před štyrjomi lětami, 2020, słušeše klasiska telewiza k dobyćerjam prěnjeho lěta koronapandemije. Přerězna doba ­telewizijneho časa rozrosće tehdy wot 210 mjeńšin 2019 na 220 minutow. 2021 spadny doba na 213 mjeńšin, w lěće 2022 potom na 195 a 2023 na jenož hišće 182. Dotalny rekord wužiwanje telewizy minjenych lětdźesatkow docpěchu lěta 2011 z 225 mjeńšinami. Hłowna přičina woteběraceho konsuma klasiskeje telewizy je po měnjenju fachowcow raznje přiběracy wuznam interneta.