Hakle poněčim so pomocnicy w Španiskej předrěja, zo bychu ...
Syriske milicy rozpušća
Scholz z BSW njemóže
Berlin (dpa/SN). Zwjazkowy kancler Olaf Scholz (SPD) móžnu koaliciju ze Zwjazkom Sahry Wagenknecht faktisce wuzamkuje. „Z tymi tola scyła njeńdźe“, rjekny wón wčera w sćelaku ARD. Hladajo na wonkopolitiske směrnicy BSW wón doda: „To je orientacija, hdźež njewěm, wo čim móhł so z tutej stronu dorozumić.“ Scholz dale rjekny, zo zakituje to, štož je zwjazkowu republiku minjenych 75 lět sylniło: zapřijeće do NATO, do Europskeje unije a pěstowanje demokratije a prawostatnosće. „To tla njemóžeš skradźu na Rusku hladać, kaž to BSW čini.“
Do toho bě Scholz prašenje dowěry w zwjazkowym sejmje přěhrał a zwjazkoweho prezidenta Franka-Waltera Steinmeiera prosył, parlament rozpušćić.
Kubicki: Šamała lózyskosć
Berlin (dpa/SN). Městopředsyda FDP Wolfgang Kubicki je wuprajenja zwjazkoweho kanclera Olafa Scholza (SPD) wo FDP při toho narěči w zwjazkowym sejmje jako šamałe wotpokazał. „Zo dyrbju sej wot Olafa Scholza rjec dać, zo njejsym moralisce zrały za knježerstwo, mam za šamału lózyskosć. Tući socialdemokraća pod Olafom Scholzom njejsu sej zasłužili, wjace hač 16 procentow hłosow dóstać“, rjekny Kubicki na kromje wothłosowanja wo prašenju dowěry w zwjazkowym sejmje.
W swojej narěči k prašenju dowěry bě Scholz hladajo na po jeho měnjenju destruktiwne zadźerženje FDP w amplowej koaliciji rjekł: „W knježerstwje sobu dźěłać, žada sej wotpowědnu moralisku zrałosć“. Předsyda FDP tole w swojej narěči šwikaše: „Jako karnewalowy princ na póstnicach placki rozdźělić, je popularne. Takle pak njemóžeš w Němskej knježić.“
Komentatorojo kritizowachu, zo njejsu politikarjo ze swojim wustupowanjom historiskemu wokomikej rozpušćenja zwjazkoweho sejma wotpowědowali.
Što chcedźa unija, SPD a Zeleni?
Politiske strony Němskeje prezentuja programy k wólbam parlamenta
Berlin (dpa/SN). Wukrajnicy, dawki, hospodarstwo a brónje za Ukrainu: Dźeń po prašenju dowěry w zwjazkowym sejmje měrja so politiske ćežišća na wulce emocionalne temy. Unija CDU/CSU, SPD a Zeleni su dźensa w Berlinje swoje programy za bližace so wólby zwjazkoweho sejma 23. februara předstajili. Programy prezentowali su kanclerski kandidat Zelenych Robert Habeck, kanclerski kandidat CDU Friedrich Merz a kanclerski kandidat SPD a amtěrowacy zwjazkowy kancler Olaf Scholz.
Wolóženja na dobro wobydlerjow přilubja wšitke tři politiske mocy. SPD slubi to 95 procentam wolerjow, bjeztoho, zo by nadrobnosće mjenowała. CDU a CSU chcedźa dawk na dochody znižić. Zeleni chcedźa wyšu zakładnu sumu přesadźić, za kotruž njetrjebaja ludźo scyła žadyn dawk płaćić. SPD a Zeleni chcedźa sej wot ludźi z wulkimi dochodami wjace dawkow wužadać.
Pokiw z Braniborskeje
Butra wostanje drje dale droha
Stuttgart (dpa/SN). Štóž hodowne poprjančki pječe, dyrbi jedyn wobstatk recepta tuchwilu dosć droho zapłaćić: butru. Prezident zwjazka ratarjow Joachim Ruckwied njewočakuje najprjedy raz žane wolóženje na dobro přetrjebarjow: „Njeličimy ze zniženjom płaćiznow, wosebje płaćizny mloka dla“, rjekny Ruckwied w Stuttgarće. Butru běchu minjeny čas chětro podróšili. Po informacijach statistiskeho zwjazkoweho zarjada płaćeše butra w oktobru a nowembru nimale 40 procentow wjace hač samsny čas loni. Za kusk butry 250 gramow žadaja sej někotre wulke mlokarnje mjeztym nimale štyri eura.
Prezident zwjazka ratarjow Ruckwied je sej wěsty, zo zwisuje wuwiće mjez druhim ze sylnišim naprašowanjom za tukom z mloka. Po tutym puću wotkrywaja sej mlokarnje nowe móžnosće předawanja a dochodow. Scyła je zastaranje wikow z mlokom tuchwilu chětro napjate. Tole płaćizny mloka tohorunja pohonjuje, Ruckwied rjekny. W decembru so płaćizna mloka po měnjenju Ruckwieda wo dwaj procentaj zwyši. Hač tole tež butru dale podróši, dyrbimy wočaknyć.
Ze swěcu a sirenu na so skedźbnili
To a tamne (17.12.24)
Wosom hodźiny zawrjena bě awtodróha A 72 pola Šwikawy do směra na Lipsk. Nakładne awto dróhoweje słužby bě wčera dopołdnja při rumowanju nadróžneho twarnišća ze swojim kranom železny móst z nastrojemi za wotličenje popłatka nakładnych awtow potorhnyło. Při tym so šofer awta a dalši dźěłaćer zraništaj. Wěcna škoda wučinja 755 000 eurow.
Wulki chaos načinja w italskich wulkoměstach nowa winowatosć za wužiwarjow elektriskich rolerow, nahłownik nosyć. Policija je minjeny kónc tydźenja prěnje chłostanki 50 eurow rozdźěliła. Ludźo skorža, zo njebuchu informowani, wosebje turisća. Wupožčowarjo jězdźidłow starosća so wo swój wobchodny model. Knježerstwo chce z naprawami ličbu smjertnych woporow we wobchadźe znižić. Štóž za wodźidłom awta telefonuje, płaći wotnětka znajmjeńša 250 eurow.
Netanjahu a Trump rěčałoj
Tel Aviv (dpa/SN). Israelski ministerski prezident Benjamin Netanjahu je z přichodnym prezidentom USA Donaldom Trumpom wo połoženju w Syriskej rěčał a swoje měrniwe wotpohlady potwjerdźił. „Nimamy žadyn zajim na rozestajenju ze Syriskej“, rjekny Netanjahu po informacijach nowinarjow. Israel orientuje so na wobstejnosćach na městnje, Netanjahu rjekny. Rěčałoj staj wobaj pječa tež wo pušćenju israelskich zastajencow.
Mortwi w Gazaskim pasmje
Gaza (dpa/SN). Při nadpadźe israelskich wojerskich lětadłow na něhdyšu šulu w sewjernym dźělu Gazaskeho pasma je po informacijach islamistiskeje Hamas znajmjeńša 40 ludźi žiwjenje přisadźiło. Twarjenje w měsće Beit Hanun słužeše wot wójny wućěrjenym ciwilistam jako nachwilny přebytk, rěčnik palestinskeho ciwilneho škita zdźěli. Tójšto woporow je so spaliło. Informacije njejsu njewotwisnje přepruwujomne.
Prezident wosobinsce skazany
