Sylne zliwki na zapadźe kraja
Offenbach (dpa/SN). Ćežke njewjedra a sylne zliwki su wosebje na zapadźe Sewjerorynsko-Westfalskeje tójšto zasadźenjow wohnjoweje wobory a policije zawinowali. Po informacijach policije je woda pincy a bydlenja zapławiła. Pomocnicy su wobydlerjow z bydlenjow a šoferow z awtow wuchowali. Potrjechena bě tež dolina rěki Ahr. Wjedrarjo pak z toho wuchadźeja, zo njebudu zliwki tak razne kaž lěta 2021, jako tam 140 ludźi zemrě.
Nowe sankcije přećiwo Ruskej
Brüssel (dpa/SN). Němska so zhromadnje z Francoskej za nowe sankcije přećiwo Ruskej zasadźuje. Ze zhromadneho dokumenta wuchadźe, zo wabitej krajej za hišće konsekwentniše postupowanje přećiwo ruskemu energijowemu wobłukej. Z tutymi dochodami ruski prezident Wladimir Putin wójnu přećiwo Ukrainje financuje, we wobkrućenju namjeta rěka. Pismo su wšitkim čłonskim krajam EU pósłali.
Postrowy Trumpa wozjewili
Fachowcy policije steja při znjezboženym busu w měsće Atlacomulco ...
Macron dyrbi spěšnje jednać
Paris (dpa/SN). Francoska pyta za nowym ministerskim prezidentom, po tym zo je dotalne knježerstwo wčera zwrěšćiło. Prezident Emmanuel Macron je dźensa wotwoleneho premierministra Françoisa Bayeroua witał a toho próstwu wo wotstup přiwzał. Hižo přichodne dny postaji Macron naslědnika. Dokelž knježi w kraju politiska kriza z hrožacej žołmu stawkow a protestow, steji tež Macron pod wulkim politiskim ćišćom.
Bayerou bě wčera w parlamenće swojeho wjele diskutowaneho lutowanskeho plana dla prašenje dowěry stajił. Opozicija je přećiwo njemu hłosowała a předewzaće tak powaliła. Politiske lěhwa w Francoskej su pačene. Nichtó nima wjetšinu. Koalicije kaž w Němskej njejsu tam z wašnjom.
Ludźo dyrbjaz Gazy ćěkać
Gaza/Tel Aviv (dpa/SN). Israelske wójsko je wobydlerjow Gazy oficialnje namołwjało, zo maja ćeknyć. Wone chce město dospołnje wobsadźić. Ludźo maja so swójskeje wěstoty dla do Al-Mawasi na juhu pasma podać, w arabsce wozjewjenej namołwje rěka. Israelske wójsko chce w Gazy „z wulkim rozmachom“ postupować a Hamas zničić. Hižo wčera bě israelski ministerski prezident Benjamin Netanjahu wobydlerjow Gazy namołwjał, zo maja město wopušćić. „Smy was warnowali, zmińće so wot tam“, wón rjekny.
Israelske wójsko je wčera w Gazy něhdźe 30 wysokodomow zničiło, zo by infrastrukturu Hamas wotstroniło a wojakam puć do města runało. W Gazy bydli něhdźe milion Palestinjanow.
Zelenskyj za lěpši powětrowy škit
Kijew (dpa/SN). Do dźensa so zahajaceho zetkanja kontaktneje skupiny na dobro Ukrainy je ukrainski prezident Wolodymyr Zelenskyj klučowe zaměry za rozmołwy postajił. „Zesylnjenje powětroweho škita je najwažniši zaměr tutoho ‚Ramsteinoweho zetkanja‘ a scyła našich kontaktow z Europu a USA“, rjekny Zelenskyj w swojim wječornym widejowym poselstwje. Na konferency wobdźěli so ukrainski zakitowanski minister Denys Šmyhal. Nimo toho wočakuja němskeho zakitowanskeho ministra Borisa Pistoriusa (SPD) a jeho britiskeho kolegu Johna Healeyja.
Ruska je kónc awgusta swoje powětrowe nadpady z trutami a raketami na objekty w Ukrainje zesylniła a při tym njedostatki ukrainskeho powětroweho zakitowanja wotkryła. Hakle předwčerawšim, njedźelu, bě raketa typa Iskander do třěchi hłowneho twarjenja ukrainskeho knježerstwa zrazyła a woheń zawinowała. Stolica Kijew pak je wosebje škitana. Němska je jim wulki dźěl rakety wotwobaracych systemow přewostajiła.
Choćebuz a Žitawa poručenej
Nowy „Marco Polo 2026“ chwali sej nowe a mało znate dowolowe kónčiny
Ostfildern (dpa/SN). Choćebuz ze swojim Liškowskim jězorom a Žitawske horiny poručuje nowy pućowarski přewodnik „Marco Polo Trendguide 2026“ jako dowolowej cilej. Wobě městnosći stej mjez 15 najlěpšimi pućowanskimi pokiwami w nowym lěće w Němskej, Awstriskej a Šwicarskej.
Kniha „Dokal pojědźemy 2026“ předstaja 40 móžnosćow pućowanja po wšěm swěće. Jedyn z kriterijow nowych pokiwow je fakt, zo su městnosće hišće w dalokej měrje nowe a njewotkryte abo zo zmóžnjeja nowy wid na staroznate.
W Choćebuzu chwala sej fachowcy turizma nowy kumštnje zapołoženy Liškowski jězor (Ostsee). Tule je so přeborkana a zničena přiroda zaso wočerstwiła. „Powostanki wudobywanja brunicy su pjeć lět z wodu Sprjewje pjelnili. Nětko ma tule najwjetši kumštny jězor Němskeje nastać. Přichodne lěta natwarja nad Liškowskim jězorom maritimny měšćanski kwartěr: přibrjohi, přistawy za čołmy kaž tež kolesowarske a pućowanske šćežki.
Drohi a dołhi proces
Chrupalla:AfD 2029 knježi
Abendsberg (dpa/SN). Předsyda AfD Tino Chrupalla je wot tym přeswědčeny, zo budźe AfD knježerstwowu zamołwitosć w Němskej přewzać. Za to je strona, po jeho měnjenju, na najlěpšim puću. Jeli nic klětu w Saksko-Anhaltskej, potom to najpozdźišo 2029 na zwjazkowej runinje zdokonja, rjekny Chrupalla na politiskim rańšim piwje swojeje strony a delnjobayerskim Abendsbergu před wjacorymi stami přihladowarjow. AfD ma po jeho słowach rozrisanja a wobsahi, kotrež chcedźa ludźo słyšeć. Němska budźe bórze módra, rjekny wón hladajo na barbu AfD. Bayerskeho ministerskeho prezidenta wusměšowaše Chrupalla jako „keklerja“, runje tak kaž zwjazkoweho kanclera Friedricha Merza. Chrupalla a předsydka frakcije AfD w bayerskim krajnym sejmje Katrin Ebner-Steiner žadaštaj sej wotsunjenja migrantow we wulkej měrje. Wšitcy kriminelni wukrajnicy a wšitcy bjez prawa na trajne přebywanje měli hić.
Ebner skoržeše nimo toho na stat, kotryž ludźi kontroluje a jim swoje měnjenje nanuzuje. Swoboda měnjenja płaći wočiwidnje jenož hišće za tych, kotřiž měnjenje knježerstwa zastupuja, wona rjekny.
Hrajnu dobu z koncertom zahajili
Rozmołwy 35 lět po rewoluciji
Podstupim (dpa/SN). 35 lět po měrniwej rewoluciji a zjednoćenju Němskeje čuja so po měnjenju społnomócnjeneho za předźěłanje diktatury NDR mnozy w bywšej NDR ze swojimi problemami njesłyšani. Ludźo, kotřiž su w diktaturje politisku njesprawnosć dožiwili, hišće dźensa jara pod tym ćerpja, „zo jich ból w towaršnosći lědma na wědomje bjeru“, Maria Nooke rjekny.
Społnomócnjena Braniborskeje za předźěłanje sćěhow komunistiskeje diktatury chce so tuž składnostnje 35. róčnicy jubileja jednoty Němskeje z potrjechenymi w Braniborskej rozmołwjeć. Wona nochce nikoho powučić, ale město toho historiske zarjadowanje a wosobinske nazhonjenja ludźi zwjazać, tak Nooke. Dale chce puć k změnje systema wuslědźić a kak je so tuta na žiwjenje ludźi wuskutkowała.
Prěnju rozmołwu tajkeho razu planuja 20. septembra w cyrkwi swj. Marije w Granseeju. 16. septembra přijědźe skupina slědźerjow do błótowskeho Lubnjowa. Tam chcedźa z ludźimi rěčeć, kotřiž su tehdy w sowjetskim wobsadniskim pasmje politisce přesćěhowali.
