To a tamne (28.08.25)
Swojeho 14lětneho syna staj staršej na wróćojězbje z dowola na parkowanišću při awtodróze A 3 w Baworskej zabyli. W Jendźelskej bydlaca swójba bě blisko města Lupburg skrótka pozastała, při tym je so hólc wotsalił, bjez toho zo byštaj staršej to pytnyłoj. Dokelž ležeše šmóratko hólca dale w awće, spyta tón z pomocu druhich šmóratkow swojeju staršeju docpěć. Po dwě a poł hodźinje so drama skónči a hólc staršeju zaso nadeńdźe.
Dokelž bě twarska firma za nowe wjesne srjedźišćo wo tři centimetry přemałe ławki skazała, dyrbješe mała wjeska Wipshausen blisko města Peine kompletne saněrowanje znowa wupisać. Město toho, zo bychu nowe naměsto w septembrje 2024 dotwarili, bu wone tohodla hakle w meji 2025 hotowe. Wyši měšćanosta města Peine so nětko nadźija, zo ławki druheho zmylka dla zaso wottwarić njedyrbja.
Bydlenja bywaja dale a dróše
Drježdźany/Lipsk (dpa/SN). Wotnajerjow bydlenjow dyrbimy tež w přichodźe před přewysokimi podružemi škitać, měni sakska Lěwica. „Zakonske borzdźidło podružow ma tež po lěće 2025 płaćić. W Drježdźanach kaž tež w Lipsku su wiki bydlenjow napjate. Podruže stupaja a bydlenjow za mało pjenjez je přemało“, rjekny zapósłanča krajneho sejma Juliane Nagel powěsćerni dpa.
Politiska eskalacija hrozy
Genf/Teheran (dpa/SN). W rozmołwach wo atomowych brónjach, na kotrychž běchu so zastupjerjo knježerstwow z Irana, Němskeje, Wulkeje Britaniskeje a Francoskeje wobdźělili, njejsu so na prawe wuslědki dojednali. Rěčnik wonkowneho hamta Irana Ismail Baghai rjekny w statnej telewiziji, zo běchu so jenož wo pozicijach wuměnili. Bjez konkretnych wuslědkow hrozy nětko, hladajo na atomowy program Irana, politiska eskalacija.
Trut wopak lećał
Aktiwisća zwjazka „Rheinmetall entwaffnen“ běchu dźensa ...
Do łódźe třělili
Wjace rybow
Wuradźuja wo kubłanskim času
Wjesnjanosća su wažni
To a tamne (27.08.25)
Superstar popoweje hudźby Taylor Swift a hrajer ameriskeje ligi footballa Travis Kelce staj so slubiłoj. „Waša wučerka jendźelšćiny a waš wučer sporta so woženitaj“, pisaštaj wonaj w zhromadnym přinošku na platformje Instagram. Galerija wobrazow tam pokazuje, kak Kelce w zahrodźe z wjele kwětkami před Swift kleći. Z tym wobkrućištaj wonaj, štož běchu sej mnozy fanojo Swift a Kelce hižo dołho myslili.
Wosrjedź Elsaskeje w měsće Sainte-Marie-Aux-Mines njedaloko němskeje mjezy maja nětko małku wersiju sławneje Eiffeloweje wěže, kotraž wšak steji poprawom we wjace hač 400 kilometrow zdalenym Parisu. Wuměnkar Jean-Claude Fassler je w běhu wosom lět model w poměrje 1:10 natwarił. Při tym su jeho swójbny zawod a mnozy dobrowólni pomocnicy podpěrowali.
Prěni nadawk koalicije
Drježdźany (dpa/SN). Sakske mjeńšinowe knježerstwo chce po schwalenju dwójneho etata ambicioněrowane koaliciske zrěčenje zwoprawdźić, rjekny šef sakskeje SPD Henning Homann w Drježdźanach. Prěni a najwažniši nadawk je nětko realizowanje tak mjenowaneho sakskeho fondsa, kotryž ma pjenjezy z wosebiteho zamóženja Zwjazka w Sakskej rozdźělować. Pjenjezy chce knježerstwo za wjacore projekty wužiwać.
Trump pušći guwernerku Fed
Washington (dpa/SN). Prezident USA Donald Trump je připowědźił, zo guwernerku notoweje banki Fed Lisu Cook pušći. To zdźěli wón na swojej platformje Truth Social. Jako přičinu mjenowaše wón w swojim lisće na Cook dosć dopokazow za to, zo je wona w zrěčenjach wo hypotekach wopačnosće podała. Personelny rozsud Trumpa je dźěl jeho kampanje přećiwo Fed, wšako chce wón wodźacu dań znižić.
Parlament so wotpalił
