Robotika w Zagrebje
Delnjoserbski gymnazij Choćebuz steji w oktobrje w fokusu telewizijneho magacina Łužyca. Na jednym boku je situacija pobrachowacych pedagogow dla nadal napjata, na druhim wšak pokazuje wuspěch na polu robotiki, zo njetrjebaja so chowancy kubłanišća wubědźowanjow na europskej runinje bojeć. Tak portretuja šulerjow 6. lětnika Milu Heinzojc a Williama Buchana, kotrajž staj so za lětuše finale World Robot Olympiad w Zagrebje kwalifikowałoj. Dalšej přinoškaj wobswětlujetej „prawe serbske žiwjenje“ we wobłuku domizniskeho a drastoweho swjedźenja w Bórkowach kaž tež w historiskim słowjanskim sydlišću Dešnjanskeho towarstwa Stary lud.
Telewizija RBB wusyła Łužycu jutře, sobotu, w 13.25 hodź. Wospjetowanje na samsnym sćelaku slěduje zajutřišim, njedźelu, w 7.30 hodź. Telewizija MDR pokaza magacin sobotu, 26. septembra, w 12 hodź. W mediatece ARD je aktualna Łužyca wot jutřišeho cyłe lěto kóždy čas přistupna.
Wuhladko 25 lět
Jězorina, Miłoćicy a šokoloda
Telewizijny magacin Łužyca zwaži so w awgusće na spagat: Moderator Christian Mattheé postrowi přihladowarjow z łódźe Wilde Hilde, kotraž jako najnowša turistiska atrakcija po Łužiskej jězorinje jězdźi. We hłubinach tychle wodźiznow chowaja so powostanki tójšto wsow, kotrež su so brunicy dla zhubili. W tym zwisku přepytuje zhromadnje z dr. Lutzom Laschewskim ze Serbskeho instituta, w kotrej měrje so srědki za změnu struktury na dobro serbskich projektow nałožuja. Dalšej temje wusyłanja stej mjez druhim lětuši festiwal Witaj w Miłoćicach a wopyt dźěći Witaj-campa w šokoladowej fabrice.
Telewizija RBB wusyła Łužycu jutře, sobotu, w 13.20 hodź. Wospjetowanje na samsnym sćelaku slěduje zajutřišim, njedźelu, w 7.30 hodź. Telewizija MDR pokaza magacin sobotu, 22. awgusta, w 12 hodź. W mediatece ARD je aktualna Łužyca wot jutřišeho cyłe lěto kóždy čas přistupna.
Samostatnosć, Wawrik a Niža Wjes
Hłowny přinošk přichodneho wusyłanja telewizijneho magacina Wuhladko wěnuje so młodym předewzaćelam z Łužicy, kiž su so wuspěšnje na často dosć riskantny krok do samostatnosće zwažili. Dalše ćežišćo je nowa wuchowanska centrala w Zdźěri, hdźež chcedźa přichodnje tež serbscy sanitetarjo słužbu wukonjeć. Pod nadpismom „Potajnstwo Kanečanskeje kapałki“ podadźa so telewiznicy zhromadnje z potomnikami Jurja Wawrika a ze stawiznarku Lubinu Malinkowej na slědy serbskeho rjemjeslnika, kiž bě před 150 lětami pěši do Roma putnikował a swoje dožiwjenja w (dźensa jónkrótnym) dźeniku dokumentował. Nachilace so lěćne prózdniny słuža jako wuchadźišćo za krótku, magacin skulojćacu reportažu „Dowol před domjacymi durjemi“, portretowacu wjacorych „přeswědčenych campingowarjow“, kotřiž dadźa sej idylku wokoło Nižeje Wsy lubić.
Drasta, domizna, identita
„Móc drasty“ resp. „Die Macht der Tracht“ je titul reportaže, z kotrejž wěnujetaj so Britta Wulf a Rajner J. Nagel prašenju, „što začuwaš, chodźiš-li serbsce hotowany“. Składnostnje Němskeho dnja drasty, kotryž wotmě so njedawno w Błótach, přepytowaštaj „kotru móc wašnje so drasćić wuprudźuje, što wone wo nastajenju domiznje napřećo kaž tež wo swójskej identiće wupraja a hač resp. čehodla chcedźa serbsce chodźacy cyle jasnje signalizować, zo takrjec k tomu słušeja“. Komplementarnje wotbłyšćujetaj wonkowny wid ludźi na serbsku drastu.
Telewizija RBB wusyła Łužycu jutře, sobotu, w 13.20 hodź. Wospjetowanje na samsnym sćelaku slěduje zajutřišim, njedźelu, w 7.30 hodź. Telewizija MDR pokaza magacin sobotu, 25. julija, w 12 hodź. W mediatece ARD je aktualna Łužyca wot jutřišeho cyłe lěto kóždy čas přistupna.
Šule, sorny, skały a jubilej
Ćežišćowa tema telewizijneho magacina Wuhladko w juliju je nadal napjate połoženje na serbskich šulach pobrachowacych wučerjow dla. W srjedźišću steji při tym hrožace wobmjezowanje dwurěčneje wučby kaž tež nuznje trěbne změny w kubłanskim systemje, kajkež sej fachowcy hižo dołho žadaja. Takrjec narodninski přinošk wěnuja 70. róčnicy poswjećenja Serbskeho domu w Budyšinje. Nimo toho wobswětluja wuchowanje sornjatkow z pomocu trutow a wěnuja so prašenju, čehodla so ludźo přewšo rady we łužiskich skałach kupaja, byrnjež to zdźěla za žiwjenje strašne było.
Telewizija MDR wusyła Wuhladko jutře, sobotu, w 12 hodź. Wospjetowanje na samsnym sćelaku slěduje póndźelu, 6.julija, w 7.40 hodź. Telewizija RBB pokaza magacin sobotu, 11. julija, w 13.20 hodź. W mediatece ARD je aktualne Wuhladko wot jutřišeho cyłe lěto kóždy čas přistupne.
Emocionalne wurězki
Tematiske ćežišćo telewizijneho magacina Wuhladko w juniju su „emocionalne wokomiki w Kamjenskej chorowni tež za serbske sobudźěłaćerki a baby“. Mustwo Wuhladka je podawki z kameru přewodźało.
Telewizija MDR wusyła Wuhladko jutře, sobotu, w 12 hodź. Wospjetowanje na samsnym sćelaku slěduje póndźelu, 8. junija, w 6.50 hodź. Telewizija RBB pokaza magacin sobotu, 13. junija, w 13.20 hodź. W mediatece ARD je aktualne Wuhladko wot jutřišeho cyłe lěto kóždy čas přistupne.
Skjarbošc a wudma
Šok, woheń, meja a kurs
Ćežišćo mejskeho wudaća telewizijneho magacina Wuhladko je zawrjenje porodneje stacije Kamjenskeje chorownje. Mjez druhim wobswětluja přičiny mnohim njezrozumliweho kroka a sposrědkuja reakcije na njón. Dalše přinoški wěnuja wot wohenja wobškodźenemu wětrnikej w Chrósćicach, pozadkam stajenja a mjetanja meje kaž tež ferialnemu kursej serbšćiny z wida dźěćaceho reportera.
Telewizija MDR wusyła Wuhladko zajutřišim, sobotu, w 12 hodź. Wospjetowanje na samsnym sćelaku slěduje póndźelu, 4. meje, w 6.45 hodź. Telewizija RBB pokaza magacin sobotu, 9. meje, w 13.15 hodź. W mediatece ARD je aktualne Wuhladko wot zajutřišeho cyłe lěto kóždy čas přistupne.
Serbuje-li KI ...
„Gaž KI powěda serbski ...“ je titul filma, kotryž je w aprylu jenički přinošk telewizijneho magacina Łužyca. W nim wěnujetaj so Anja Kochojc-Schwarz a Luka Golinski „rewoluciji, kajkuž kumštna inteligenca za serbšćinu lubi“. Na přikładach programow Copilot abo ChatGPT demonstrujetaj, zo hodźa so z nimi přełožki do a z delnjoserbšćiny mjeztym nimale perfektnje zhotowjeć, štož „móhło přiswojenje rěče bjezdwěla přisporjeć“. Na druhim boku wšak jewja so grawěrowace zmylki, „štož móže so předewšěm na małe rěče fatalnje wuskutkować“. Film pyta tuž za wotmołwu na prašenje, hač su w tym zwisku „strachi wjetše dyžli móžny wužitk“.
Telewizija RBB pokaza Łužycu jutře, sobotu, w 13.15 hodź. Wospjetowanje na samsnym sćelaku slěduje zajutřišim, njedźelu, w 7.30 hodź.
Telewizija MDR wusyła magacin sobotu, 25. apryla, w 12 hodź. W mediatece ARD je aktualna Łužyca wot jutřišeho cyłe lěto kóždy čas přistupna.
