Podstupim (dpa/SN). Braniborski krajny sejm je dźensa z přemóžacej wjetšinu wobzamknył, staršiske popłatki za pěstowarnje krok po kroku wotstronić. Po zakonskim naćisku koalicije SPD a Lěwicy njetrjebaja starši wot 1. awgusta najprjedy raz za dźěći w poslednim předšulskim lěće žane přinoški wjace płaćić. Zakonjej přihłosowali su tež zapósłancy Zelenych a CDU. Bjezposrědnje do posedźenja su wobhospodarjerjo dźěćacych dnjowych přebywanišćow před krajnym sejmom demonstrowali, žadajo sej wjace pjenjez.

Dalša wulka tema posedźenja krajneho sejma bě Łužica. We wobłuku aktualneje hodźiny chcychu wo šansach a wužadanjach strukturneje změny po kóncu wudobywanja brunicy we łužiskej kónčinje debatować.

Dźeń a mjenje zajimcow za powołansku samostatnosć

Frankfurt n. M. (dpa/SN). Hladajo na dobre wuwiće dźěłowych wikow so dźeń a mjenje ludźi w Němskej do powołanskeje samostatnosće zwaži. Ličba załožerjow swójskeje eksistency je so loni porno lětu do toho wo 17 procentow na rekordnje najniši staw 557 000 pomjeńšiła, kaž z wčera wozjewjeneho „załoženskeho monitora“ statneje spěchowanskeje banki KfW wuchadźa. Wuprózdnjene dźě­łowe wiki tež přiběrajcy tych poće­žuja, kotřiž su swójsku firmu hižo zało­žili, ­dokelž maja problemy, kmanych sobudźěłaćerjow namakać.

Šef KfW Jörg Zeuner njeliči z tym, zo so połoženje lětsa zasadnje změni. „Tuchwilu njejsu žane impulsy spóznajomne, kotrež móhli tomu polěkować, ličbu załoženjow zaso rozrosć dać.“

Wosebje widźomne je woteběranje załoženjow mjez ludźimi, kotřiž so z přidatnym dźěłom zesamostatnja. Jich ličba je wo 23 procentow na nětko 323 000 ­woteběrała. „Něšto sej přizasłužić je wokomiknje tak lochko kaž hišće nihdy“, w přepytowanju rěka. Ličba tych, kotřiž su so zesamostatnili, dokelž njewidźa ­hinašeho wupuća, je so wo 37 000 na 129 000 ludźi pomjeńšiła.

Berlin (dpa/SN). Zwjazkowe knježerstwo njeje dźensa nowu tak mjenowanu brunicowu komisiju powołało. Planowane wobzamknjenje su njewočakowano zaso z dnjoweho porjada šmórnyli. Rěčnica knježerstwa nochcyše k přičinam najprjedy raz ničo rjec.

Komisija „Rozrost, strukturna změna a dźěło“ ma hač do kónca lěta akciski program zdźěłać. Při tym dźe wo perspektiwy za nowe dźěłowe městna we łužiskej a porynskej kónčinje po kóncu wudobywanja brunicy. Gremij chce so nimo toho z trěbnymi inwesticijemi zaběrać, zo by so strukturna změna radźiła. Nic naposledk dyrbi komisija hač do kónca lěta 2018 kruty termin za kónc wudobywanja brunicy postajić.

Kruwa na twarskich róštach je w Bayerskej zasadźenje wohnjoweje wobory zawiniła. „Pytajo za wotměnu“ dósta so skoćo, z pastwy ćeknywši, na róšty, kotrež běchu při mosće připrawjene. Tam so přełama a wosta tčacy. Dźěłaćerjo ­njeběchu róšty wotpowědnje zawěsćili. Pućowarjo kruwu skónčnje wuhladachu. Dokelž policisća pomhać njemóžachu, natwarichu wohnjowi wobornicy ekstra za nju drjewjany mosćik.

Sněhowy płuh pokradnyli su njeznaći tele dny w hessenskim Melsungenje. Nastroj, kotryž je poprawom jězdźidłam zymskeje słužby přišrubowany, płaći nimale 3 000 eurow. Wón ležeše na twarnišću při kupnicy, kaž policija piše. Što paduši ze sněhowym płuhom při tuchwilnym lětnim wjedrje z 30 stopnjemi chcedźa, to drje wostanje jich potajnstwo.