To a tamne (30.08.17)
Makaberne njedorozumjenje susodkow je wulku pytansku akciju kriminalneje policije za ćěłami ćěšenkow na priwatnej ležownosći w durinskim Schkölenje zawiniło. Při płoće rozprawješe žona susodce wo rowčkach swojeju „dźěćatkow“ na zahrodźe. A ta zawoła hnydom policiju. Zastojnicy pytachu tuž za dźěćacymi ćěłkami, nańdźechu pak jenož dwaj zahrjebanej psaj. Kaž so wukopa, bě wobsedźerka zahrody psaj jako swojej „dźěsći“ pomjenowała.
Nimale poł žiwjenja bjez jězbneje dowolnosće z awtom jězdźił je 61lětny Erfurćan. Dokelž njebě připasany, jeho nětko policija zadźerža a kontrolowaše. Kaž wón sam přizna, njebě pruwowanje za dowolnosć wjacore razy wobstał. Tohodla je něhdźe 30 lět bjez tajkeje jězdźił. Nablaku jemu zastojnicy zakazachu dale jěć a klučik awta sej hnydom zdźeržachu.
Cyž: Podpisma dale zběramy
Zetkanje ze zwjazkowym prezidentom Steinmeierom planowane
Berlin (SN/JaW). Mjeńšinowa rada Němskeje, kotrejž přisłušeja zastupnicy štyrjoch připóznatych narodnych mjeńšin Němskeje Frizow, Serbow, Danow a Sintow a Romow, chcedźa so 21. septembra ze zwjazkowym prezidentom Němskeje Frankom-Waltherom Steinmeierom zetkać. To připowědźi na kromje dnja wotewrjenych duri zwjazkoweho knježerstwa minjeny kónc tydźenja w Berlinje wiceprezident Federalistiskeje unije europskich narodnych mjeńšin (FUEN) Bjarnat Cyž. Na wuradźowanju rady zańdźeny pjatk w Berlinje běchu wo temach rozwažowali, kotrež chcyli w połdrahodźinskej rozmołwje načeć. „Chcemy knjezej Steinmeierej zwuraznić wočakowanja mjeńšin na jeho funkciju, hdyž je jako najwyši reprezentant Němskeje po puću. Předewšěm, zo mjeńšinowopolitiske temy narěči wšudźe tam, hdźež je to móžno. Zdobom chcemy jemu poskićić, wužiwać za to informacije, kotrež wot čłonow FUEN dóstawamy“, rjekny Bjarnat Cyž. Jako přikład mjenowaše wón aktualne połoženje na Ukrainje.
Namołwa k wujednanju
Lipsk (B/SN). Swětowa zhromadnosć reformowanych cyrkwjow je na swojej generalnej zhromadźiznje w Lipsku Južnu a Sewjernu Koreju namołwjała so wujednać. Srjedźodobnje měli tež USA swoje jednotki z korejskeje połkupy wotćahnyć. Južnokorejski delegat Lee Jaechun namjetowaše jako zaměr měrliweje koeksistency šěroke ludowe hibanje bjez wobdźělenja wulkomocow. Ri Jongro z křesćanskeje federacije Sewjerneje Koreje rjekny, zo USA połoženje na połkupje z wotmysłom přiwótřeja. Tak njebudźe próca wo měr ženje wuspěšna.
Fasada cyrkwje w porjadku
Drježdźany (B/SN). Wonkownosć pěskowca Drježdźanskeje cyrkwje Našeje knjenje je intaktna. To pokaza přepytowanje cyrkwje, zdźěli załožba. Přepytowali běchu fasadu a kuplu za stawom kamjenjow, zamazanja, zakryće z blachom a błyskowy škit. Prěni raz po pjeć lětach bu kompletna fasada zaso zbliska posudźowana. Załožba dźěła za to z inženjerami hromadźe, kotřiž běchu hižo při nowonatwarje pódla. „Z cyłkownym stawom „wonkowneje kože“ smy my jara spokojom“, rjekny architekt Thomas Gottschlich.
Kemše w awće sobu swjećić
Petry nima hižo imunitu
Drježdźany (dpa/SN). Skóržba přećiwo šefinje Alternatiwy za Němsku Frauke Petry podhlada wopačneje přisahi je móžna. Sakski krajny sejm je dźensa imunitu politikarki zběhnył. „Nichtó njebě přećiwo tomu,“ zdźěli parlamentariski rěčnik Ivo Klatte. Drježdźanske statne rěčnistwo wočaknje nětko oficialnu informaciju a pruwuje dalše postupowanje.
Raketa Japansku přelećała
Seoul/Tokio (dpa/K/SN). Njedźiwajcy toho, zo swět testy Sewjerneje Koreje z raketami zasudźa, je Pjönjang dźensa rano dalšu balistisku raketu wutřělił, z čimž konflikt dale přiwótřa. Tale raketa je Japansku přelećała a po 2 700 kilometrach do Atlantika padnyła. Japanska ma tele počinanje za bjezpřikładne wohroženje. Premier Shinzo Abe připowědźi, zo přewjedźe knježerstwo wšitko trěbne za škit ludnosće. Prezident USA Donald Trump je za to podpěru přilubił.
Pro Asyl kritizuje dojednanja
Serbska rada z ministerku Kurth so zetkała
Drježdźany (SN). Sakska statna ministerka za kubłanje Brunhild Kurth (CDU) bě wčera z hosćom Rady za serbske naležnosće. We wobłuku posedźenja, kotrež wotměwa so w krajnym sejmje w Drježdźanach, rysowaše ministerka aktualny staw planowaneho přestrukturowanja Sakskeje kubłanskeje agentury na rjad krajnych zarjadow za šule a kubłanje. Wona wuzběhny, zo maja so wšitke dotalne stejnišća agentury zasadnje zdźeržeć, tak tež Budyske. Po jeje wuprajenju je wotpohlad, paralelne a administratiwne nadawki zjednorić a systematizować. Při tym chcedźa wosebje na regionalnu prezencu Budyskeho zarjada dźiwać, štož ma dotalne kwalitatiwne dźěło agentury dale garantować.
Južny Texas je kaž jězorišćo
Fairny wostać!
Budyšenjo čitaja ze swojeje biblije
Budyšin (SN). Na wosebity rjad zarjadowanjow w Lutherowym lěće přeprošatej katolska wosadna rada a ewangelske předstejićelstwo Pětroweje cyrkwje. Wonej stej šěsć Budyšanow zdobyłoj, kotřiž budu stajnje srjedu we 18 hodź. w tachantskej cyrkwi ze swojeje biblije čitać. 6. septembra započnje z tym zapósłanc Sakskeho krajneho sejma Marko Šiman (CDU). Tydźeń pozdźišo móža zajimcy na Budyskeho wyšeho měšćanostu Alexandera Ahrensa (SPD) słuchać. 20. septembra čita z biblije serbska dźiwadźelnica Petra-Maria Bulankec-Wencelowa. Poslednju srjedu septembra zbliži jednaćel Hornjołužiskich klinikow Reiner Rogowski wopytowarjam jeho najbóle jimace pasaže knihi knihow. Po Gerdźe Lehmannje, jednaćelskim předstejićelu Budyskeje diakonije, 4. oktobra, chce bywša nawodnica Serbskeho gymnazija Rejza Šěnowa 11. oktobra tónle rjad zakónčić.
Biblija je zhromadna kniha ewangelskich a katolskich křesćanow, Budyska tachantska cyrkej jako simaltaneum je jich zhromadny Boži dom.
To a tamne (29.08.17)
Do ćišćaka za kontowe wućahi čilał je muž w delnjosakskim Braunschweigu. Mašinu njemóže pjenježny institut najprjedy raz zasadźić, dokelž je elektronika wobškodźena. Škodu trochuja na wjacore sta eurow. Hižo w februaru bě w Celle k samsnemu padej dóšło, při čimž kamera muža wobkedźbowaše. Jako skućićela wuslědźichu bjezdomneho, kiž bě policiji hižo znaty.
Tři měsacy lětnich prózdnin běchu šulerjej w Estiskej předołhe. Tak napisa wón list kubłanskemu ministerstwu w Tallinnje. „Ja, Aleksander, sej přeju, zo měła so šula 1. awgusta započeć, dokelž hižo njewěm, što mam činić“, hólčec prošeše. W nětko wozjewjenej internetnej wotmołwje ministerstwa dawa kubłanska ministerka Mailis Reps šulerjej pokiwy za lětnje prózdniny. Přeću Aleksandera wšak njemóže wona wotpowědować.
Pjeć alpinistow zahinyło
Krimml (dpa/K/SN). Wčera dopołdnja je skupinu bayerskich krosnowarjow w Salzburgskich Alpach njezbožo trjechiło. Pjeć čłonow teama alpinistow zahiny, jedyn ćežko zranjeny přežiwi. Awstriska policija wěri swědkej, kiž powěda, zo je we wysokosći 3 000 metrow posledni muž skupiny so zawróćić chcył. Při tym je so druhi jeje čłon wobsunył a tamnych 200 metrow sobu do hłubiny storhnył. Nětko chcedźa zastojnicy 75lětneho wuchowaneho alpinista přesłyšować.
Wjele wjac ludźi morił
Oldenburg (dpa/SN). Zasudźeny mordar pacientow Niels H. je snano dalše 84 wosobow morił. Tole zdźělichu dźensa přepytowarjow w Oldenburgu. Sudnistwo bě 40lětneho muža dotal w šěsć padach zasudźiło. Móže-li policija jemu dalše pady dopokazać, je to jedna z najhrózbnišich serijow němskich kriminalnych stawiznow. Policija bě w běhu třoch lět sta aktow pacientow přepruwowała a wjac hač sto ćěłow wuhrjebała, zo bychu za medikamentami pytali, kotrež je Niels H. chorym injicěrował.
Personalny kluč njezměnjeny
