Dalši ćišć z Brüssela na Waršawu
Komisija EU nowe jednanje přećiwo Pólskej a Rumunskej zahajiła
Brüssel (dpa/SN). W zwadźe wo zachowanje njewotwisneje justicy w Pólskej a Rumunskej komisija Europskeje unije ćišć dale zesylnja. Brüsselska instanca je minjeny tydźeń dalše přepytowanja přećiwo Pólskej systematiskeho politiskeho wobwliwowanja sudnikow přez knježerstwo dla zahajiła. Nimo toho hrozy komisija EU Rumunskej z naprawami, dyrbjał-li kraj korupcije dla zasudźenemu politikarjej chłostanje spušćić.
Prawnostatnosć we wšitkich čłonskich statach Europskeje unije je rozsudna za dalewobstaće zhromadźenstwa, rjekny wiceprezident komisije EU Frans Timmermans. Nažel ma unija na tym polu dźeń a wjetše problemy. Tu dyrbjało so wjace činić. W komisiji debatuja tuchwilu wo raznišich naprawach přećiwo krajam, kotrež zakładne hódnoty a prawidła ranja. Konkretne namjety chcedźa pak hakle w juniju předpołožić.
To a tamne (08.04.19)
Zwada mjez dźěćimi na hrajkanišću před hosćencom w badensko-württembergskim Lottstettenje je w bijeńcy mjez dorosćenymi z wjacorymi zranjenymi wuwjercholiła. Po tym zo běchu so starši do zwady dźěći měšeli, so nalada mjez nimi přiwótři. W hosćencu so dale wurěčowachu a so skónčnje bijachu. Šesćo so zranichu, třo dyrbjachu samo do chorownje. W hosćencu bičcy tójšto rozbichu. Policija je z wjacorymi zastojnikami zapřimnyła.
Kurioznu wurěč měješe smaler w Awstriskej, jako jeho policisća přespěšneho jězdźenja dla zadźeržachu. Zastojnikam 27lětny rozłoži, zo chcyše awto sušić, po tym zo bě je runje wumył. Wón bě na dróze ze 118 km/h po puću, na kotrejž je 60 km/h dowolenych. „Awto bě woprawdźe mokre“, zastojnicy wobkrućichu. Přiwšěm dyrbi šofer pokutu płaćić a jězbnu dowolnosć na dwaj tydźenjej wotedać.
Brexit na 30. junij přestorčić
London (dpa/SN). Britiska premierministerka Theresa May wo to prosy, wustup kraja z Europskeje unije na 30. junij přestorčić. To pisa wona w dźensa wozjewjenym lisće prezidentej rady EU Donaldej Tuskej. Poprawom měješe Wulka Britaniska hižo 12. apryla Europsku uniju wopušćić. May je přesłapjena, zo njeje brexit hišće „wuspěšny a rjadowany“. Tusk je so mjeztym za to wuprajił, jón wo cyłe lěto přestorčić.
Chcedźa Tripolis zdobyć
Tripolis (dpa/SN). Wliwapołny libyski general Chalifa Haftar je swojim jednotkam přikazał, stolicu Tripolis zdobyć. We widejowym poselstwje rěčeše wón wo „operaciji k wuswobodźenju Tripolisa“. W stolicy sedźi mjezynarodnje připóznate knježerstwo, kotrež z Haftarom wo móc w kraju wojuje. Toho jednotki su minjeny čas wulke dźěle Libyskeje zdobyli a steja 30 kilometrow před Tripolisom.
Za spěšniši twar milinowodow
Zwjazkowy prezident Frank-Walter Steinmeier (naprawo) přebywa ...
Wjetšina ludźi brexit wobžaruje
Zeleni kritizuja naćisk ministerki za Bafög
Zastrow namołwja Saksku
Miliony trěbne
To a tamne (05.04.19)
Joggingowe cholowy zakazali su na realnej šuli w sewjerorynsko-westfalskim Bad Oeynhausenje. Wjacori šulerjo běchu zas a zaso w šěrych šlapotatych cholowach na wučbu přišli. Mjeztym je so šulska konferenca za zakaz wuprajiła, a přirady staršich, wučerjow kaž tež šulerjow su tomu přihłosowali. Wučerjo smědźa šulerjow trójce napominać, štwórty raz sćelu jich domoj so předrasćić.
Spisowaćel Theodor Fontane jako amplowe znamješko je wot dźesnišeho w ródnym měsće Neuruppinje widźeć. Składnostnje 200. narodnin sławneho syna města su sej zamołwići zajimawostku wumyslili. Ample maja wobchad pěškow na Fontanowym naměsće rjadować. Widźeć je silueta Fontany jónu pěši z kobłukom a kiješkom a jónu stejo z kłobukom w ruce. Wuwzaćne rjadowanje płaći hač do kónca lěta.
NATO swjeći a so wadźi
Washington (dpa/SN). Přewodźane wot kritiki USA na Němskej su so we Washingtonje swjatočnosće k 70. róčnicy załoženja NATO zahajili. Generalny sekretar Jens Stoltenberg dopominaše w swojej narěči na zaměr zwjazkarstwa za měr a demokratiju. Do toho bě wiceprezident USA Mike Pence němske brónjenske wudawki jako přesnadne kritizował. Zwjazkowy wonkowny minister Heiko Maas (SPD) wumjetowanja wotpokaza.
Brexit ze zakonjom přestorčić
London (dpa/SN). Delnja komora britiskeho parlamenta je zakoń schwaliła, kotryž knježerstwo nuzuje wustup kraja z Europskeje unije přestorčić. Strony přesahowaca skupina zapósłancow chce tomu zadźěwać, zo dóńdźe k brexitej bjez zrěčenja. Premierministerka Theresa May bě hižo připowědźiła, zo chce w Brüsselu wo podlěšenje termina hač do 22. meje prosyć. Poprawom je wustup 12. apryla předwidźany. Jasne wšak njeje, hač tamne staty EU namjetej May přihłosuja.
Wo migraciskej politice rěčeli
