„Na kóncu jenož přehračcy“
Sankcije USA přećiwo Ruskej němske hospodarstwo starosćeja
Berlin/Frankfurt n.M. (dpa/SN). Němske hospodarstwo warnuje před sćěhami najnowšich sankcijow USA přećiwo Ruskej. „Wažne projekty k zastaranju ludźi z energiju móhli wohrožene być, njedyrbjało-li němskim předewzaćam hižo dowolene być, na ruskich płunowodach sobu dźěłać směć“ rjekny wotrjadnik Němskeje industrijneje a wikowanskeje komory za wonkowne naležnosće Volker Treier powěsćerni dpa. Tole by němske hospodarstwo čućiwje trjechiło.
Nowe chłostanske naprawy USA přećiwo Ruskej, kotrež njeběchu z Europskej uniju dorěčane, měrja so mjez druhim na za Rusku wažny energijowy sektor. Wone móhli pak tež firmy z druhich krajow potrjechić, kotrež so na porjedźenju, ponowjenju a wutwarje ruskich pipelinow wobdźěleja. Tež němske předewzaća su tam aktiwnje zapřijeći.
To a tamne (07.08.17)
„Dyrbju najprjedy raz spać hić. Sym dospołnje pjany“. Z tutymi słowami je so šofer wosoboweho awta w Jenje po njezbožu rozžohnował, přepodawši ludźom swój wupokaz. Do toho bě 32lětny z wotmachom do parkowaceju awtow zrazył. Spać wšak zawinowar njezboža wulce njemóžeše, dokelž jeho policisća wopytachu. Woni wzachu jeho k přepytowanju kreje sobu na stražu. Tam zahajichu tež přepytowanske jednanje přećiwo njemu.
Najwjetše parkowanišćo kolesow Nižozemskeje su dźensa w Utrechće wotewrěli. W podzemskim twarjenju před dwórnišćom města je najprjedy raz městno za 6 000 kolesow. Po rozšěrjenju ma tam 2018 samo 12 500 kolesow stać. Tak by parkowanišćo w měsće ze 340 000 wobydlerjemi najwjetše po wšem swěće było. W Nižozemskej je wjace kolesow hač wobydlerjow.
Wotpokazuje wumjetowanja
Tel Aviv (dpa/SN). Israelski ministerski prezident Benjamin Netanjahu je wšitke wumjetowanja wobšudnistwa, njeswěry a wobtykliwosće wotpokazał. Jeho běrow rěčeše wo njewoprawnjenych twjerdźenjach, kaž israelski rozhłós rozprawja. Po informacijach medijow bě Netajahu wot předewzaćelow wospjet dary přijimował. Nimo to je wón pječa spytał rozprawnistwo medijow wobwliwować.
Znowa konwoj nadpadnjeny
Kabul (dpa/SN). Při dalšim sebjemordarskim bombowym atentaće na konwoj NATO w Afghanistanje w běhu dweju dnjow su dźensa wojaka a třoch ciwilistow morili. To je rěčnik policije w prowincy Kabul wobkrućił. K narodnosći morjeneho wojaka wón ničo njezdźěli. Skućićel bě so konwojej pěši bližił a bě po wuprajenjach swědkow jako žona zdrasćeny. Hakle srjedu běštaj při nadpadźe na patrulju wojakaj z USA padnyłoj.
General Haftar hrozy Italskej
Swoju kreatiwnosć a wušiknosć dopokazała je skupina holcow minjene ...
Aldi wšitke jeja z předawarnjow wzał
Seehofer z ultimatumom
Trump: Afera wunamakanje demokratow
Washington (dpa/SN). W aferje móžnych kontaktow prezidenta USA Donalda Trumpa k Ruskej dla je wurjadny přepytowar Robert Mueller po informacijach medijow tak mjenowanu Grand Jury zasadźił. Gremij započa minjene tydźenje dźěłać, kaž Wall Street Journal piše, powołujo so na interne informacije. Nowinje je tale kročel zdobom znamjo, zo Mueller swoje přepytowanja rozšěrja a intensiwuje. Sćelak CNN rozprawja, zo je gremij hižo prěnje wosoby w zwisku ze zetkanjom najstaršeho syna Trumpa z ruskej prawiznicu na přesłyšowanje skazał. Nimo toho chce Grand Jury wotpowědne dokumenty wuhódnoćić.
To a tamne (04.08.17)
Z palacym acetonom je muž w Großröhrsdorfje spytał špundowanje rjedźić a by při tym skoro bydlenje zapalił. 26lětny je maćiznu na laminatne špundowanje kidnył a zapalił, dokelž bě přeswědčeny, zo budźe laminat tak wosebje čisty. Spěšnje so tež acetonowa bleša zapali. 26lětny ćisny ju na to z woknom a podusy płomjenja z nohu, při čimž so zrani. Nětko wšak dyrbi so lochkomyslneho zapalerstwa dla zamołwić. Test alkohola wunjese 1,8 promilow.
Wulki dźeń w Hamburgskim zwěrjencu Hagenbeck: Hnydom štyri małe tigry z cyle mjechkim kožuchom móžachu wopytowarjo wčera we wonkownym arealu wobdźiwać. Wot časa poroda 15. junija běchu ze swojej maćerju Marušku schowane byli. Tele štyri młodźata su wulki wuspěch. 15 lět dyrbješe zwěrjenc tam na dorost tigrow čakać.
Šćuwaja ze wšěch stron přećiwo Madźaram
Közseghaza je madźarski wuraz a wopisuje gmejnski zarjad. Tónle napis bě před měsacami hišće na twarjenju gmejnskeho zarjada w Csikkozmásu/Cozmeniju widźeć, dyrbjachu pak jón wotstronić: Towarstwo z Bukaresta je přećiwo napisej skoržiło a na wšěch instancach prawje dóstało.
Jenož Közseghaza bě na fasadźe stało, nic pak tež rumunski wotpowědnik. Spřećiwja so tole rumunskemu prawu? Předpisane dwurěčne taflički su zdawna hižo při zachodźe do zarjada připrawjene, napis na fasadźe bě skerje historiski element: Radnica bu 1943 natwarjena, jako přisłušeše sewjerna Sedmihródska krótki čas zaso Madźarskej. Wobydlerstwo tam wobsteji po 96 procentach z madźarskich Szeklerow, tohodla napis tež ženje nikoho mylił njeje.
Etniske rjedźenja napřećo Rumunam?
Pozadk
Narodna rada Szeklerow je nadstronska platforma. Na wsach a w městach wola delegatow do lokalnych sekcijow na teritoriju historiskich zarjadniskich jednotkow, stólcow (szek). Woni wola čoło narodneje rady. Tuchwilny prezident je Izsák Balázs. Radu podpěruja předewzaćeljo a Madźarska.
Szeklerski kraj leži w zapadnym dźělu Sedmihródskeje. Wón wupřestrěwa so po třoch z cyłkownje 41 wokrjesow, do kotrychž je Rumunska rozrjadowana. 900 000 ludźi tam bydli, 630 000 z nich su madźaršćinu rěčacy Szeklerojo. Jich podźěl wobstajnje woteběra, a to jako sćěwk industrializaciskeje politiki komunizma a připućowanja ze Staro-Rumunskeje. Szeklerojo wutworichu w srjedźo- a nowowěku z madźarskim zemjanstwom a ze Sedmihródskimi Saksami narodnu federatiwnu wustawu z dalokosahacym samopostajowanjom. Wona bu kónc 19. lětstotka rozbita. Wot časa přirjadowanja k Rumunskej 1918 bě njeličomnych žadanjow za awtonomiju kraja Szeklerow.
