SSW wabi w swojim wólbnym programje za Załožbu za friziski lud
W Schleswigsko-Holsteinskej wola njedźelu nowy krajny sejm. Wolerjo móža mjez kandidatami z 13 stron a wólbnych zjednoćenstwow rozsudźić. Wo dobry wuslědk wojuje tež Južnoschleswigski wolerski zwjazk (SSW), kotryž twori hromadźe z SPD a Zelenymi tučasne krajne knježerstwo.
Flensburg (SN/at). Krajna lisćina SSW wopřijima mjena wosom žonow a 15 muži. Načolna trójka Lars Harms, Jette Waldinger-Thiering a Flemming Meyer přisłuša hižo w nachilacej so wólbnej periodźe krajnemu sejmej w Kielu. SSW sadźa na wobstajnosć, přiwšěm su mjez prěnimi dźesaćomi lisćiny třo młodźi ludźo. Načolny kandidat Harms je w rozmołwje ze Serbskimi Nowinami dobreje nadźije, „snano přez wurunanski mandat dalšeho kandidata, 35lětneho Christiana Dirschingera, do parlamenta dóstać“. Z Christopherom Andresenom (19, městno 7) a Henriettu Boysen (městno 10), 18lětnej dźowku Thede Boysena, bywšeho nawody mjeńšinoweho sekretariata, signalizuje SSW młodym wolerjam, zo tež jich zajimy chutnje bjerje.
Mjeztym 35 mortwych
Teheran (dpa/K/SN). Po rozbuchu płuna we wuhlowym podkopku na sewjeru Irana je znajmjeńša 35 hórnikow zahinyło. Ličbu mortwych je iranski minister za dźěło Ali Arbei mjeztym wobkrućił. Wjace hač 70 ludźi so wčera při njezbožu w podkopku Chosh-Bejlagh zrani. 26 dalšich dźěłaćerjow je hišće zasypanych. K eksploziji bě prawdźepodobnje přez nahromadźenje płuna w podkopku dóšło, na čož so šacht sypny.
Žane terminy wot nazymy
London (dpa/SN). Wulkobritaniski princ Philip (95) je připowědźił, zo so wot nazymy wšitkich oficialnych terminow wzda. Tole zdźěla Buckinghamski palast w Londonje. Do toho běchu wšitkich sobudźěłaćerjow palasta krótkodobnje k wurjadnej zhromadźiznje zwołali. Princ Philip, kiž budźe w juniju 96 lět, je hišće wčera kriketowy klub wopytał, hdźež bě najlěpšeje nalady.
Wjele antibiotikow we wodźe
Po puću k nowej brunicowej jamje je tónle hoberski wuhlowy bager ...
Macron w debaćelěpje wobstał
Pad wuswětla na najwyšej runinje
Zrěčenje hotowe
To a tamne (04.05.17)
Policistam dźěło wolóžił je paduch, po tym zo bě swój wupokaz zhubił. 16lětny bě so z dalšimaj młodostnymaj w nocy na njedźelu w badensko-württembergskim Lörrachu do napojowych wikow zadobył a tam 13 blešow alkohola w hódnoće 500 eurow pokradnył. Policisća namakachu na městnje njeskutka wupokaz teenagera a wopytachu jeho. W jeho stwě nańdźechu dźěl alkohola, zbytk pola sobuskućićela.
Njedowoleny kónctydźenski wulět z awtom změje za 18lětneho njelubozne sćěhi: Praktikant Erfurtskeho awtoweho domu bě sej wóz za wulět „wupožčił“ a z nim na wšě 2 000 kilometrow po puću był. Dokelž činješe to bjez jězbneje dowolnosće, nima nětko jenož mjerzanje ze šefom, ale tež z policiju. Młodostny ma z dwěmaj skóržbomaj ličić. Hač je wón hišće praktikant, njeje znate.
Šansa za cyrkej
Drježdźany (B/SN). Strachi wo eksistencu, niske mzdy, problemy z partnerami – to je wšědny dźeń poradźowarki samodruhich. K tomu přińdu zakonske změny, mjerzanje ze zarjadami. Wo tym rěčachu poradźowarki samodruhich Carity z Drježdźansko-Mišnjanskim biskopom Heinrichom Timmereversom. Wosebje ćežko maja so poradźowarki ze samodruhimi ćěkančemi cuzeje rěče, wašnjow a kultury dla. Nimale połojca žonow, kotrež su loni katolsku poradźowarnju wopytali, je bjez konfesije. To je wulka šansa za cyrkej. „Móžemy z našimi zarjadnišćemi přinošować k ewangelizaciji“, biskop Timmerevers wuzběhny.
Bamž žada sej měr a sprawnosć
Vatikan (B/SN). Bamž Franciskus napominaše w swojim jutrownym poselstwje, so sylnišo zasadźeć za měr, sprawnosć, za škit ćěkancow a kónc hłodu w Južnej Africe. „My wšitcy zhubimy prawy puć, hdyž damy so wot hrěcha zawjesć a kaž zhubjene wowcy wokoło błudźimy“, rjekny bamž jutry na Pětrowym naměsće.
Spěw reformacije jako popsong
Kontrola na městnje
Berlin (dpa/K/SN). Ministerka za zakitowanje Ursula von der Leyen (CDU) wopyta dźensa w francoskim Illkirchenje kasernu Zwjazkoweje wobory, w kotrejž je terorizma podhladny oficěr Franco A. słužił. Wona chce so na městnje rozhladować, w kotrej měrje a kak je tam prawicarstwo rozšěrjene było. Rěč je wo cyłej prawicarskej syći, kradnjenju municije a hokatych křižach. Swój wopyt USA bě ministerka krótkodobnje wotprajiła.
Hamburg budźe zetkanišćo
Moskwa (dpa/SN). Prezidentaj Ruskeje a USA Wladimir Putin a Donald Trump chcetaj so 7. julija na kromje wjerška G 20 w Hamburgu prěni raz zetkać. Na to staj so wonaj wčera telefonisce dojednałoj. Přezjednaj staj sej tež wo tym byłoj, wobjednać konflikty w Syriskej a na korejskej połkupje. Putin je Trumpa napomnił k zdźeržliwosći, zo njebychu so napjatosće Sewjerneje Koreje dla dale přiwótřili. To rozprawja ruska powěsćernja TASS, powołaca so na Krjeml.
Milinarnje zmodernizować
