Dale z třomi serbskimi radźićelemi
W nowym Budyskim wokrjesnym sejmiku budu znowa třo serbscy wokrjesni radźićeljo. Dawid Statnik (CDU) a Jan Budar (Serbske wolerske zjednoćenstwo/SWZ) staj mandat zakitowałoj. Jako třeći wróći so Alojs Mikławšk (CDU) do sejmika, kotremuž bě hižo hač do předposlednjeje wólbneje periody přisłušał. Wšitcy třo buchu w samsnym wólbnym wokrjesu 7 wuzwoleni.
Budyšin (SN/at). Wot stronskich zajimow njewotwisny wokrjesny radźićel móže serbske zajimy dale w Budyskim wokrjesnym sejmiku zastupować. Jan Budar njeje jenož mandat Serbskeho wolerskeho zjednoćenstwa zakitował, wón je z 843 hłosami swój wuslědk z lěta 2019 (508) samo polěpšił. Alojs Mikławšk bu z 3 715 hłosami wuzwoleny, Dawid Statnik z 2 100, 297 mjenje hač před pjeć lětami. W serbskich komunach wólbneho wokrjesa 7 bě CDU znowa najsylniša strona. Najwjetšu dowěru mějachu wolerjo do SWZ z 15,6% hłosow w Chrósćicach. Cyłkownje pak je SWZ ze 4 621 porno 6 065 lěta 2019 nimale štwórćinu hłosow zhubiło.
Straty za Lěwicu wuskutkowachu so tež na rezultat kandidata Hajka Kozela we wólbnym wokrjesu 4. Docpětych 1 096 hłosow (2019: 1 958) njedosahaše za wospjetny mandat w sejmiku.
„Wulke finale“ akcije za sposrědkowanje wjesela
Budyšin (SN/bn). Akcija „Happy monday Bautzen – Wjesoła póndźela Budyšin“ je „najprjedy raz“ zakónčena. Dohromady zličichu na cyłkownje dźewjeć zarjadowanjach něhdźe 3 000 wopytowarjow. Wčerawše „wulke finale“ přiwabi něhdźe 300 zajimcow na Budyske Hłowne torhošćo. Młoda skupina Šwintuchi zahori publikum mjezu druhim z reggaejowej wersiju spěwa „Hołbik dwě běłej nóžce ma“ a adapciju hita band a-ha „Take on me“. Skupina Die Baumschule zamó předewšěm ze swojim dwójce zahratym hitom „In Bautzen wird die Mate knapp“ wopytowarjow do pohiba pohnuć. Za incenaciju Němsko-Serbskeho ludoweho dźiwadła „Na tamnym boku měsačka – Hercy“ zestajana band Zynkofunk zasłuži sej sej z wobdźěłanymaj hitomaj Hercow „Ptačk“ a „Moja luba holčka“ runje tak sylny aplaws kaž z a cappella zanjesenym evergreenom „Fly me to the moon“. Performance duwa Zurück in die Zukunft, z kotrejž wabi zdobom za wustajeńcu „Je přewrót zdokonjany?“, a „kolektiwne přidawanje žonopa“ pod nawodom wuměłče Tanja Krone – mjez druhim nasta z podpěru publikuma z wjacorych družin žonopa zhotowjena mólba – program skulojćištej.
AfD we wokrjesach najsylniša
Kamjenc (dpa/SN). AfD je sej při wólbach wokrjesnych sejmikow we wšitkich dźesać wólbnych wokrjesach wjetšinu zdobyła. Po wuličenju wšitkich hłosow docpěwa wona mjez 27,2 procentomaj w Lipšćanskim wokrjesu a 36,1 procentom w Zhorjelskim wokrjesu, z přehlada krajneho wólbneho nawodu wuchadźa. Tež při wólbach měšćanskich radow je AfD přidobyła. W Drježdźanach a Kamjenicy je wona tohorunja najsylniša móc. CDU wobsadźi nimo Lipska 2. městno.
UNO za měrowy plan Bidena
New York (dpa/SN). Bjezstrašnostna rada UNO je so za plan prezidenta USA Joewa Bidena na dobro přiměra w Gazaskim pasmje wuprajiła. Wotpowědnu rezoluciju je najmócniši gremij UNO w New Yorku schwalił. 14 čłonow je za naćisk hłosowało, Ruska, kotraž ma prawo na weto, je so hłosa wzdała. Dotal njejstej ani israelske knježerstwo ani islamistiska Hamas planej Bidena přihłosowałoj. Wonkowny minister USA Antony Blinken je z teje přičiny na Bliskim wuchodźe.
Islamski teror wulki strach
Zwjazkowy prezident Frank-Walter Steinmeier (naprawo) je wčera z ...
Sebjekritisce ze zašłosću unity so zaběrać
Ochranow (SN/at). Nimale 80 delegowanych a hosći wobdźěli so na synodźe Europsko-kontinentalneje bratrowskeje unity, kotraž schadźuje so pod hesłom „Unita nadźije połna po puću“ wot minjeneho kónca tydźenja hač do 15. junija w Ochranowje. Nimo toho su štyri z cyłkownje pjeć misijowych organizacijow ze wšelakich krajow z wotpósłancami zastupjene.
Zelenskyj na konferency w Berlinje
Berlin (dpa/SN). Ukrainski prezident Wolodymyr Zelenskyj je do Němskeje dojěł, zo móhł so na mjezynarodnej konferency na dobro nowonatwara Ukrainy wobdźělić. Wón zarjadowanje zhromadnje ze zwjazkowym kanclerom Olafom Scholzom (SPD) zahaji. Popołdnju chcyše so Zelenskyj z narěču na zapósłancow zwjazkoweho sejma wobroćić.
Na konferencu natwara Ukrainy wočakuja 2 000 zastupnikow z něhdźe 60 krajow. Njeje to konferenca darićelow, na kotrejž pjenjezy za natwar Ukrainy zběraja, ale dźe wo to, akterow politiki, hospodarstwa, ciwilneje towaršnosće a mjezynarodnych organizacijow splesć.
„Konferenca pokazuje, zo steji sylny zwjazk za Ukrainu“, rjekny wuwićowa ministerka Svenja Schulze (SPD) powěsćerni dpa. Tež pod wójnskimi wuměnjenjemi je wažne, nowotwar zahajić, wona rjekny. „Ukraina njemóže čakać, doniž njeje wójna nimo. Ludźo trjebaja nětko milinu, wodu, chorownje a třěchu nad hłowu.“ Zelenskyj chcyše tež wo dalšej wojerskej podpěrje Ukrainy rěčeć.
Scholz: Ampla dźěła dale
Strony koalicije wuprajeja zwjazkowemu kanclerej swoju dowěru
Berlin (dpa/SN). Najebać zdźěla dramatiske straty při wólbach Europskeho parlamenta strony amploweje koalicije nowowólby zwjazkoweho sejma wotpokazuja. Nawodnistwa SPD, Zelenych a FDP su wčera zwjazkowemu kanclerej Olafej Scholzej (SPD) dowěru wuprajili. Tón ma najšpatniši wólbny wuslědk socialdemokratow při cyłoněmskich wólbach minjenych 130 lět sobu zamołwić. Hač zhromadnosć naraženeho zwjazka woprawdźe funguje, so najpozdźišo při jednanjach wo etat pokazuje. Hač do 3. julija ma budget zdźěłany być.
Zwjazkowy kancler Scholz je amplu namołwjał, dale dźěłać. „Wólbny wuslědk bě za wšitke knježerstwowe strony špatny“, rjekny Scholz w Berlinje. „Nichtó njeje derje poradźowany, kiž chce so nětko zaso do dnjoweho porjada nawróćić. Zdobom dźe pak wo to, zo dale dźěłamy, zo kraj spochi modernizujemy.“
To a tamne (11.06.24)
Z kolesowej eskortu policije je młody muž w Augsburgu tola hišće dypkownje k wěrowanju na stawnistwo dojěł. Muž bě do toho w měsće parkował. Jako chcyše dale jěć, běchu dróhi demonstracije Christopher Street Day dla zaraćene a ćah ludźi hižo zahajeny. W swojej nuzy wobroći so muž na policiju. Ta pósła dweju zastojnikow na kolesu, kotrajž muža ze zawrjeneho pasma přewodźeštaj, tak zo bě nawoženja dypkownje k wěrowanju.
Chětro wopity šofer wosoboweho awta je w Berlinje-Weddingu hnydom tři parkowace awta wobškodźił, po tym zo bě kontrolu nad swojim jězdźidłom zhubił. Awto so skónčnje přećisny a wosta na třěše ležo. Zranjeneho 45lětneho dowjezechu do chorownje. Při protokolowanju njezboža zastojnikam wóń alkohola napadny. Na to su zawinowarjej krej brali. Wěcna škoda zražkow njeje hišće znata.
Kretschmer: Tak njeńdźe dale
Berlin (dpa/SN). Sakski ministerski prezident Michael Kretschmer (CDU) žada sej po wólbnych wuspěchach AfD na wuchodźe Němskeje wot amploweje koalicije zwjazkoweho kanclera Olafa Scholza (SPD), ale tež wot swójskeje strony jasnu změnu dotalneje politiki. „Kraj trjeba stabilnu demokratiju, kotraž problemy ludźi rozrisa“, rjekny Kretschmer dźensa do posedźenja nawodnistwa CDU w Berlinje. Na nim wobdźěli so tež prezidentka komisije EU Ursula von der Leyen.
Gantz wopušći knježerstwo
Tel Aviv (dpa/SN). Wšelakich měnjenjow přichoda Gazaskeho pasma dla wopušći minister Benny Gantz nuzowe knježerstwo w Israelu, kotrež běchu po terorowym nadpadźe Hamas 7. oktobra wutworili. Gantz bě tež čłon wažneho wójnskeho kabineta. Israelske knježerstwo pak wotstup Gantza njepowali: Ministerski prezident Benjamin Netanjahu ma ze swojim prawicarsko-nabožnym kabinetom dale wjetšinu w parlamenće.
Rozdźělenje přetorhnjene
