Na knižne wiki do Krakowa

Mittwoch, 25. Oktober 2017 geschrieben von:
Přihoty su wotzamknjene, dźensa podatej so jednaćelka Marka Maćijowa a wotrjadnica za rozšěrjenje Ludoweho nakładnistwa Domowina Manja Bujnowska (na foće) do Krakowa, hdźež zahaja so jutře 21. knižne wiki Book Fair 2017. Wone su najwjetše nakładnistwowe wiki w Pólskej a witaja wopytowarjow hač do njedźele na terenje expo. LND je tam třeći raz zastupjene. Ćežišćo je lětsa wudaće „Wótmólowane“ z historiskimi fotografijemi serbskeje Delnjeje Łužicy. Foto: SN/Maćij Bulank

Ideje pytane

Mittwoch, 25. Oktober 2017 geschrieben von:

Budyšin (SN). Budyske „partnerstwo za demokratiju“ (PfD) pyta projektowe ideje. Wone měli so za zhromadne žiwjenje wšěch ludźi w sprjewinym měsće zasadźeć, demokratiske procesy spěchować a njepřećelskosći napřećo ludźom, na kotrežkuli wašnje tež přeco, znapřećiwić. Spěchowane budu prawokmane, powšitkownowužitne, njestatne organizacije a towarstwa, skutkowace w měsće Budyšinje. Pozadk je, zo bu tudyše partnerstwo za demokratiju w běhu lěta ze wšitkimi trěbnymi gremijemi wutworjene. PfD Budyšin přijimuje próstwy za tři spěchowanske wobłuki – w akciskim a inciatiwnym fondsu za projekty ze spěchowanskim wobjimom hač do 20 000 eurow, w młodźinskim fondsu za projekty młodostnych a młodych dorosćenych hač do 27 lět a w fondsu za mikroprojekty z wobjimom hač do 500 eurow.

Přewodny wuběrk wo přizwolenju srědkow rozsudźi. Próstwowy formular namakaće pod www.pfd-bautzen.de. Koordinowanišćo na to skedźbnja, zo je trjeba so wobšěrnje z informacijemi pod FAQ zaběrać. Přichodny termin zapodaća próstwy je 15. januar 2018.

Kompromis poskićili

Mittwoch, 25. Oktober 2017 geschrieben von:

Erbil (dpa/SN). W konflikće z Bagdadom wo awtonomiju irakskich Kurdow je jich regionalne knježerstwo dźensa w nocy kompromis poskićiło. Tak chce referendum wo njewotwisnosć najprjedy raz cofnyć, zo bychu rozmołwy z irakskim knježerstwom­ „šansu“ měli. Kurdojo chcedźa dalšej wójnje zadźěwać, kaž w zdźělence z Erbila pišu. W samsnym času su připowědźili, zakónčić hnydom wšitke wojerske operacije w regionje.

Steinmeier w Ruskej

Berlin/Moskwa (dpa/SN). Jako prěni zwjazkowy prezident po sydom lětach je so Frank-Walter Steinmeier dźensa rano na dźěłowy wopyt do Ruskeje podał. W stolicy chcyše so mjez druhim z prezidentom kraja Wladimirom Putinom zetkać. Přičina wopyta Steinmeiera je reformaciski jubilej, ke kotremuž ruske knježerstwo Katedralu swj. Pětra a Pawoła w Moskwje Ruskej ewangelsko-lutherskej cyrkwi wróći. Steinmeier bě so jako wonkowny minister zhromadnje z němskej ewangelskej cyrkwju za to zasadźał.

Dwěluja na fairnym jednanju

Dźewjaty raz je Körnerowe towarstwo Myto Georga Körnera spožčiło, tónkróć bu třěšny zwjazk Łužiskich Serbow Domowina wuznamjenjeny. Na njedawnej swja­točnosći k 300. narodninam fararja a chronista Georga Körnera porěčachu mjez druhim sakski ewangelski krajny biskop dr. Carsten Rentzing, sakska mi­nisterka za socialne­ naležnosće Barbara Klepsch (CDU), znaty slawist prof. dr. Karlheinz Hengst kaž tež předsyda Domowiny Dawid Statnik (na foće naprawo). Wón je myto w rudnohórskim městačku Bockau zdobom přijał. Foto: Leńka Thomasowa

Glaser trójce njewoleny

Mittwoch, 25. Oktober 2017 geschrieben von:
Berlin (dpa/SN). Prěnje konstituowace posedźenje zwjazkoweho sejma wčera w Berlinje je so hnydom wo eklat postarało. Trójce za sobu njeje pjeć frakcijow CDU/CSU, SPD, FDP, Zeleni a Lěwica kandidata AfD wo zastojnstwo wiceprezi­denta sejma Albrechta Glasera woliło. Městno prawicarskopopulistiskeje strony w prezidiju sejma wostanje tuž najprjedy raz njewobsadźene. Bywši financny mi­nister Wolfgang Schäuble bu z 71,2 procentomaj za prezidenta zwjazkoweho sejma­ wuzwoleny, štož je druhi najsłabši­ wuslědk minjenych 60 lět. Nimo AfD běchu zapósłancy znajmjeńša jedneje dalšeje frakcije přećiwo njemu hłosowali. Ze 709 zapósłancami cyłkownje šěsć frakcijow je zwjazkowy sejm tak wulki a wjelestronski kaž hižo 50 lět nic.

Na zakłady financneje politiki so dojednali

Mittwoch, 25. Oktober 2017 geschrieben von:
Berlin (dpa/SN). CDU, CSU, FDP a Zeleni su so wčera wječor na daloko sahace zakłady financneje politiki jamaiskeje koalicije dojednali. Zaměraj stej žadyn nowy dołh a wurunany etat, rěka w dokumenće, na kotryž so strony dorozumichu. Jedyn­ z dypkow je, zo njebudu žane nowe substancne dawki zawjedźene. Tak drje stej we wólbnym boju Zelenych žadany dawk za wosebje bohatych, štož bě zdobom diskutowany financnopolitiski zadźěwk za Uniju a FDP, po wšěm zdaću z blida. Dale su zastupjerjo stron móžneje jamaiskeje koalicije wo tym wuradźowali, kak móhli dawkipłaćerjow wolóžić, předewšěm swójby z dźěćimi kaž tež ludźi ze snadnej a srěnjej mzdu.

Mjeńšiny 20 lětpřipóznate

Mittwoch, 25. Oktober 2017 geschrieben von:

Bayreuth (SN). Rada štyrjoch awtoch­tonych mjeńšin a ludowych skupin w Němskej je minjeny pjatk na zarjadowanje k 20. róčnicy zakonskeho připó­znaća narodnych mjeńšin w Němskej přeprosyła. Wědomje su so organizatorojo za zarjadnišćo zwonka sydlenskeho ruma mjeńšin rozsudźili, zo bychu w druhich kónčinach Zwjazka na mjeńšiny skedźbnili a regionalnu rěč delnjoněmčinu wuzběhnyli.

Bój wo stejnišćo

Mittwoch, 25. Oktober 2017 geschrieben von:
Zhorjelc (dpa/SN). Hladajo na móžne zawrěće Zhorjelskeho zawoda Siemens, hdźež zhotowjeja turbiny, je so krajny rada­ wokrjesa Zhorjelc Bernd Lange (CDU) na nawodnistwo koncerna wobroćił. „Zawrěće njeakceptujemy. Tajke signale ludnosći zesylnjeja hněw na region“, rjekny Bernd Lange póndźelu w Zho­rjelcu. Dźensa zetka so wón ze zawodnej radu, zo by so wo dalšich kročelach wobhonił. Hižo minjeny kónc tydźenja bě so krajny rada ze sobudźěłaćerjemi stej­nišća Siemens rozmołwjał a zhonił, zo maja poprawom dosć nadawkow. Tež sakski ministerski prezident Stanisław Tilich (CDU) chce so za to zasadźić, zo so zawod w strukturnje słabym regionje zachowa.­

To a tamne (25.10.17)

Mittwoch, 25. Oktober 2017 geschrieben von:

Za chětro absurdnu probu zmužitosće žněja štyrjo mužojo w Awstralskej směch a kritiku. W přistawje Port Douglas płuwachu woni do paslow za krokodile. Tam so fotografowachu a stajichu fota do interneta, hdźež so spěšnje rozšěrjachu. Z paslemi chcychu městni zamołwići štyri metry dołheho krokodila popadnyć, kotryž bě njedawno 79lětnu žonu morił. Mužojo, za kotrymiž hišće pytaja, maja za swoju „hłupu a ilegalnu“ akciju z pokutu 15 000 dolarow ličić.

Wosrjedź wulkoměsta šotiske horiny dožiwić móža ludźo nětko w New Yorku. Na dwórnišću Grand Central Station je modowe předewzaće škleńčanu chěžu z wotpowědnymi wobstejnosćemi, kaž dešćom a mochom horin, wuhotowało. Wosebita modowa drasta ma zajimcow tam před włóžnym powětrom škitać.

Wola nowy prezidij sejma

Dienstag, 24. Oktober 2017 geschrieben von:

Berlin (dpa/SN). Nowowuzwolenemu Němskemu zwjazkowemu sejmej hrozy dźensa na konstituowacym posedźenju w Berlinje rozestajenje. Na dnjowym porjedźe steja wólby prezidija. Dotalny financny minister Wolfgang Schäuble (CDU) ma so z prezidentom zwjazkoweho sejma stać. Jako jeho zastupjerja je strona AfD swojeho kandidata Albrechta Glasera namjetowała. Hižo do posedźenja su wšitke tamne frakcije sejma signalizowali, zo to njepodpěruja.

Financy tema wuradźowanjow

Berlin (dpa/SN). Unija, FDP a Zeleni chcedźa na zhromadnym wuradźowanju prěni raz wo łoskoćiwych temach, kaž su to dawki, financy a etat, diskutować. Jasne je, zo nochcedźa wšitke tři strony žane nowe zadołženje Zwjazka. Wo tym, kak móhli to docpěć, su předstawy chětro rozdźělne. Po financach rozjimaja zastupjerjo stron europsku politiku.

Zahaja rozmołwy

Serbska debata

Neuheiten LND