To a tamne (15.08.17)
Wulke zbožo mějachu zawčerawšim pasažěrojo ćaha w Słowakskej. Tam bě so lokomotiwa spěšnika wotpowěsnyła a sama dale jěła. Awtomatiski system pak je ćah borzdźił, kotryž skónčnje zasta. Přiwšěm dyrbjachu pasažěrojo dlěje hač dwě hodźinje čakać, prjedy hač bu narunanska lokomotiwa pósłana. Jako přičinu njewšědneho podawka mjenowaše rěčnik železniskeje towaršnosće, zo drje bě material přetrjebany.
Připowěšak nakładneho awta połny šokolody, kotryž běchu njeznaći minjeny kónc tydźenja pola Marburga pokradnyli, je dale zhubjeny. Z připowěšakom pobrachuja tež 20 tonow šokolodźanych jejkow, nutella a dalše słódkosće. Hódnota rubizny wučinja 50 000 do 70 000 eurow. Nětko pyta policija za swědkami. W bjezposrědnjej bliskosći je so nimo toho dalše nakładne awto zhubiło.
Mortwi při nadpadźe
Ouagadougou (dpa/K/SN). Njedźelu w pózdnich nócnych hodźinach su třo njeznaći wobrónjeni mužojo w stolicy Burkina Faso Ouagadougou hosćenc „Istanbul“ nadpadnyli a tam z awtomatiskich bróni na hosći třěleli. Při tym je 18 ludźi žiwjenje přisadźiło a 15 wosobow zranjenja poćerpjeło. Mjez smjertnymi woporami staj jedyn Francoza a jedyn Turka. Dwaj nadpadnikaj buštaj zatřělenaj. Atentat su prawdźepodobnje dźihadisća skućili.
Wuradźuja wo Sewjernej Koreji
Brüssel (dpa/SN). Społnomócnjena EU za wonkowne naležnosće Federica Mogherini je krizy Sewjerneje Koreje dla wurjadne posedźenje za wěstotne prašenja zamołwitych wulkopósłancow Europskeje unije zwołała. W rozmołwje chcychu wo „móžnych dalšich kročelach“ EU wuradźować, kaž jeje rěčnica zdźěli. Kriza bě so minjene dny přiwótřiła, po tym zo bě prezident USA Sewjernej Koreji masiwnje hrozył. Ta bě připowědźiła třěleć rakety na pacifisku kupu Guam, na kotrejž maja USA wojerske zepěranišćo.
Přepytuje politiku Chiny
Předsyda frakcije Lěwicy w Sakskim krajnym sejmj Rico Gebhardt je ...
Trump kritizowany a zakitowany
Schulz widźi so jako zwjazkowy kancler
Pomocnicy wuchowanje ludźi přetorhnyli
Rom (dpa/SN). Wěstotnych rizikow w Srjedźnym morju před pobrjohom Libyskeje dla su wjacore pomocne organizacije swoju misiju, wuchować migrantow, přetorhnyli. Jedyn dźeń po wotpowědnym připowědźenju organizacije Lěkarjo bjez mjezow přizamknyštej so wčera tež organizaciji Sea Eye a Save the Children. „Hłowna přičina je změnjene wěstotne połoženje w zapadnym dźělu Srjedźneho morja“, zdźěli Regensburgska Sea Eye.
To a tamne (14.08.17)
Drohe sportowe awto zešrotował je muž na probowej jězbje minjeny pjatk w Załomju. 46lětny bě so z 510 PSsow sylnym wozom typa Alfa Romeo na mokrej dróze suwać započał, do wjacorych štomow zrazył a skónčnje na ležownosći stejo wostał. Šofer a sobu jěducej wosobje wostachu njezranjeni. Policija pak trochuje wěcnu škodu na 70 000 eurow. Telko awto hižo w swojim zakładnym wuhotowanju płaći.
Štyrilětny pachoł je swoju mać a jeje znatu w Göppingenje z bydlenja na balkon wuzamknył a so na to spać lehnył. Jako wonej něšto pozdźišo pytnyštej, zo su durje zawrjene, hólčk hižo hłuboko a kruće spaše. Žonje zawołaštej tuž policiju. Po tym zo su zastojnicy na to podarmo při durjach bydlenja klinkali, dyrbješe wohnjowa wobora zamk durjow namócnje wułamać.
China zasudźa manewer USA
Peking (dpa/SN). China je manewer wójnskeje łódźe USA w juhochinskim morju raznje zasudźiła. Ničak „USS John S. McCain“ je so ilegalnje do kónčiny wokoło kupow Spratly zadobył, kritizuje wonkowne ministerstwo w Pekingu. Tole suwerenitu a wěstotu Chiny chutnje wohrožuje, rěčnik wonkowneho ministerstwa zdźěli. China wobhladuje morjo wokoło kumštnje nasypanych kupow jako swój teritorij. USA tole njeakceptuja, mějo potrjechene pasmo za mjezynarodne, w kotrymž smědźa wšitke łódźe jězdźić.
Wo ćěkancach rěčeli
Berlin (dpa/SN). Zwjazkowa kanclerka Angela Merkel (CDU) je dźensa komisara UNO za ćěkancow Filippa Grandija přijała. W rozmołwje wobrěčachu spochi přiběracu ličbu ćěkancow po wšěm swěće. W běhu dnja chcychu wo wuslědkach rozmołwy informować. Po trochowanju UNO je loni po wšěm swěće 65,5 milionow ludźi před wójnu, namocu a přesćěhanjom ćěkać dyrbjało, 300 000 wjace hač lěto do toho. Wot lěta 1997 je so ličba ćěkancow tak podwojiła.
Žurnalisća zajeći
