Komunam hroža problemy
Bertelsmannowa załožba połoženje wokrjesow přepytowała
Drježdźany/Podstupim (dpa/SN). Poměrnje wysoke dawkowe sadźby so na pjenježne połoženje sakskich komunow lědma wuskutkuja. Loni docpěchu dawkowe dochody komunow znowa jenož 60 procentow zapadoněmskeho niwowa. Tole zwěsća Bertelsmannowa załožba w dźensa wozjewjenej Komunalnej financnej rozprawje. Na wobydlerja ličene su sakske komuny 778 eurow dawkow wuzbytkowali. W cyłoněmskim přerězku wučinja tale suma 1 178 eurow. Lipsk na přikład zaběra hladajo na dawkowe dochody 84. městno wšěch 103 bjezwo- krjesnych městow. Při tym je Sakska pola ležownostneho a přemysłoweho dawka mjez tymi krajemi, kotřiž sej najwjace žadaja. Tole pak na cyłkownje snadnych dochodach ničo njezměni. Na kóncu stej hospodarska struktura a hódnota imobilijow rozsudnej za to, kelko pjenjez komuny z dawkami woprawdźe zasłužeja, rěka w rozprawje załožby.
To a tamne (09.08.17)
Swojich dobrych kucharskich kmanosćow dla njeje Thailandźan do němskeho jastwa trjebał. Kaž zwjazkowa policija w Karlsruhe zdźěla, bě sudnistwo 43lětneho mjeńšich njeskutkow dla k 3 800 euram chłostaja abo sto dnjam jastwa zasudźiło. Dokelž njemóžeše wón pokutu zapłaćić, běchu jeho zajeli. „Chětro zadwělowany“ Thailandźan na to swojeho šefa, hosćencarja w Karlsruhe, telefonisce wo pomoc prošeše. Tón žadanu sumu bjez wahanja zapłaći, dokelž „tajkeho dobreho kucharja nihdźe wjace njenamakaš“.
W 52 dnjach 5 000 kilometrow běžała je 59lětna žona w USA. Yolanda Holder z kaliforniskeho Corona bě so 18. junija w New Yorku na puć podała. Minjenu nóc je pućowanje po 4 988 kilometrach skónčiła. Sportowča zmištrowaše wšědnje něhdźe sto kilometrow a popřa sej w nocy jenož krótki wotpočink.
Nowy arcybiskop Mailanda
Vatikan (B/SN). Mailandski swjećacy biskop a generalny wikar Mario Enrico Delpini je nowy arcybiskop diecezy. Bamž Franciskus je jeho 7. julija pomjenował. Runočasnje přiwza bamž próstwu kardinala Angela Scoly, kiž chcyše starobnych přičin dla wotstupić. Scola bě najwjetšu diecezu Italskeje z pjeć milionami katolikami šěsć lět nawjedował.
Kardinal ma posrědkować
San Salvador (B/SN). Nowy pomjenowany kardinal Gregorio Rosa Chavez z El Salvadora ma po woli bamža być z posrědnikom mjez Južnej a Sewjernej Koreju. To rjekny swjećacy biskop San Salvadora na Božej mši ze salvadorijanskimi biskopami. Bórze poda so wón do Seoula, zo by so tam wo aktualnej situaciji informował.
Biskop starosći so wo katolikow
Fulda (B/SN). Biskop Regensburga Rudolf Voderholzer starosći so wo rólu katolikow w němskej politice. Politiska wjetšina za „Mandźelstwo za wšěch“ da w nim starosć rosć, zo stanu so katolikojo w politice w kraju bjezdomni, rjekny Vorderholzer před něhdźe 1 300 wobdźělnikami na kongresu „Radosć na wěrje“ we Fuldźe na tamnišim forumje němskich katolikow.
Krajny sejm rozpušća
Hannover (dpa/K/SN). Knježerstwoweje krizy w Delnjej Sakskej dla krajny sejm 21. awgusta rozpušća. Wo tym chcedźa zapósłancy zajutřišim, štwórtk, na wurjadnym posedźenju wuradźować. K nowowólbam ma dóńć 15. oktobra. Zawiniła je knježerstwowu krizu zapósłanča Elke Twesten, kiž bě pjatk zdźěliła, zo z frakcije Zelenych přestupi k CDU. Z tym bě čerwjeno-zelene knježerstwo ministerskeho prezidenta Stephana Weila (SPD) wjetšinu jednoho hłosa zhubiło.
Schulz pućuje po wuchodźe
Berlin (dpa/K/SN). Kandidat SPD za kanclerstwo Martin Schulz je wot dźensnišeho na štwórtym a poslednim wot- rězku swojeje lěćneje wuprawy. Po Bayerskej, Sewjerorynsko-Westfalskej a Hamburgu je wón nětko w Sakskej, Durinskej, Saksko-Anhaltskej a Braniborskej na wiziće. W Jenje wopyta wón domske, w kotrymž wjacore generacije bydla, a wobdźěli so na zahrodnym grilowanju.
Horco hišće do njedźele
„Rentu bych rady dožiwił“ steješe na jednym z plakatow dźensa ...
Wagenknecht wita nahlad Lindnera
Berlin (dpa/K/SN). Předsyda FDP Christian Lindner je swój před někotrymi dnjemi w medijach zwuraznjeny nahlad zakitował, přewzaće čornomórskeje połkupy Krim přez Rusku měć za „trajny prowizorij“. Z tym njewabi wón za „kurs majkanja“ Ruskeje a wón tež njeje za złahodnjenje sankcijow napřećo Ruskej, jeli z jeje strony žane skutki za to njepřińdu, „tola zadźěwać dyrbimy spirali eskalacije“. Po jeho měnjenju wotwisujetej wěstota a derjeměće w Europje tež wot poćahow k Moskwje. Nawjedowacy politikarjo, wosebje CDU/CSU, běchu Lindnera za tajku poziciju raznje kritizowali.
Načolna kanidatka Lěwicy Sahra Wagenknecht porno tomu Lindnerowe nastajenje wuraznje wita. Nowinam Funkoweje medijoweje skupiny wona rjekny, tež za měr a wěstotu w Europje je trjeba, wróćić so k tradicijam politiki wotputanja napřećo Ruskej. „Dopomni-li so FDP na tele wonkopolitiske tradicije, je to witanjahódne“.
Ruska k dialogej zwólniwa
Moskwa kóždežkuli tykanje do wólbneho boja USA wotpokazuje
Moskwa (dpa/SN). W zwadźe najnowšich sankcijow USA dla je ruski wonkowny minister Sergej Lawrow swojemu ameriskemu koleze Rexej Tillersonej zwólniwosć k dialogej signalizował. Ze swojeje strony je tón zwólniwosć tež pola Tillersona zwěsćił, rjekny Lawrow po zetkanju z wonkownym ministrom USA w Manilje. Dotal prawidłownje organizowane zetkanja zastupowaceju wonkowneju ministrow Sergeja Rjabkowa a Toma Shannona k wobćežnym bilateralnym prašenjam měli dale wjesć, rjekny Lawrow powěsćerni Interfax.
Schmidt nadźija so informacijow
Berlin (dpa/SN). W skandalu wo z insektowym jědom Fipronil zanjerjedźenymi jejemi nadźija so zwjazkowy minister za ratarstwo Christian Schmidt (CSU) wuskeho zhromadneho dźěła z Belgiskej a Nižozemskej. „W hranicy přesahowacym wikowanju smy na informacije pokazani. Sym jasnje rjekł, zo wočakuju spěšne informacije a dospołnu transparencu“, rjekny Schmidt sćelakej Antenne Bayern, po tym zo bě wón ze swojimaj kolegomaj w Belgiskej a Nižozemskej telefonował. Schmidt bě jimaj namjetował, fachowcow do krizowych komisijow pósłać. „To rěka, zo pojědu němscy zastojnicy do Utrechta w Nižozemskej a do Belgiskeje, zo bychu so tam wo aktualnym stawje informowali. Tak móžemy w Němskej spěšnišo reagować“, tak Schmidt.
W Belgiskej je razna debata wudyriła, po tym zo bu znate, zo je zarjad za wěstotu žiwidłow FASNK hižo spočatk junija wo podhladnych zanjerjedźenych jejach zhonił, druhe kraje EU pak hakle 20. julija wo tym informował. Mjeztym su miliony zanjerodźenych jejow zničili.
To a tamne (08.08.17)
Sćěna prózdnych zastawnych blešow zbudźi tuchwilu zajim ludźi w Berlinje-Kreuzbergu. Twar je projekt pólskeho bjezdomneho Petrova Chojnackeho, kiž blešu po bleši pódla swojeho spanskeho městna stapluje. Dotal je 44lětny na wšě 3 000 blešow nastajał, docpěć chce 6 000 blešow. Chojnacki tam zhromadnje z pólskim přećelom nocuje. Zajim turistow, kotřiž sćěnu jako fotomotiw wužiwaja, jeho zwjesela. Připódla zawostajeja ludźo pjenježne dary a – dalše bleše.
2,6 tonow prózdnych patronowych kartušow je norwegska policija w bydlenskim mobilu němskeho porika namakała. Prawdźepodobje pochadźeja kartuše z třělanskich halow we kónčinje Nord-Trøndelag, do kotrychž běchu so paduši minjene dny zadobyli. Policija němski porik nětko přesłyšuje. Hódnota mosazowych kartušow wučinja 5 200 eurow.
London dyrbi dale płaćić
Berlin/Brüssel (dpa/K/SN). Wulka Britaniska budźe po sudźenju budgetoweho komisara EU Günthera Oettingera tež po brexiće Europskej uniji přinoški płaćić dyrbjeć. „Tež po wotchadźe 2019 budźe wona za dołhodobne programy płaćić dyrbjeć, kiž buchu do brexita dojednane. Na to je London wjazany a změje tuž znajmjeńša hač do lěta 2020 pjenjez do Brüssela słać. Dołhodobnje změje budget EU brexita dla wšak wob lěto dźesać do 12 miliardow eurow mjenje.
Za lěpše poćahi k Ruskej
Berlin (dpa/SN). Zasadne polěpšenje poměra k Ruskej je sej předsyda FDP Christian Lindner žadał. „Dyrbimy poskitki předpołožić, zo móhł ruski prezident Wladimir Putin swoju politiku změnić, bjez toho zo by jako přěhračk stał“, rjekny Lindner kónc tydźenja nowinarjam. „Wěstota a derjeměće w Europje wotwisujetej wot poćahow k Moskwje“, Lindner zwurazni. „Anektowanu Krim dyrbimy drje najprjedy raz jako dołhodobny prowizorij wobhladować.“ Za swoje wuprajnje je Lindner mjeztym kritiku žnjał.
Migrantki w škitnych domach
