Serbske institucije su list pisali. W nim namoł­wjeja Braniborsku a Saksku wjac za serbskosć w kubłanskimaj systemomaj činić, dokelž kwalita serbšćiny mjez wotchadnikami šulow woteběra. A to njeza­le­ži na wučerjach, ale – a to tež ja tak widźu – na wuměnjenjach, z kotrymiž maja so wučerjo bědźić, předewšěm na pobrachowacych serbšćinarjach. Nimo toho mam zaćišć, zo je wučba serbšćiny w někotrych šulach přeco hišće připlack, kotryž dyrbja znjesć – jako by do žwjenkačka stupił, a tón nětko na póduši lěpi. Mam akciju institucijow za dobru. Dźiwam so jenož kritiki dla, zo njebě to ze zwjazkowym před­sydstwom a serbskimaj radomaj dorěčane. Jim k rozmyslowanju praju: Wjeselće so, zo je skónčnje něchtó na problem skedźbnił. A: Dyrbimy da wšitko ze serb­skimi (Domowinskimi) gremijemi dorěčeć? Njejsmy da dorosćeni zrali ludźo, kotřiž­ smědźa sami a w swójskej zamołwitosći wustupować. Janek Wowčer

Praha (dpa/SN). Zapósłancej čěskeho parlamenta Miloslavej Roznerej wumjetuja našćuwanje ludu. Statne rěčnistwo je dom zapósłancow w Praze mjeztym prosyło chłostanskoprawnisku imunitu 41lětneho zběhnyć, rozprawja nowina Pravo. Politikar prawicarskeje strony „Swoboda a direktna demokratija“, kotraž ma čěsku skrótšenku SPD, bě ně­hdyše dźěłowe lěhwo za Sintow a Romow za čas nacionalizma w juhočěskich Letach „njeeksistowace pseudokoncentraciske lěhwo“ mjenował.

Pikantne na cyłej wěcy je, zo je Rozner sam čłon imunitneho wuběrka parlamentneje komory, kotryž ma wo zbě­hnjenju imunity rozsudźić. W Čěskej je zaka­zane nacionalsocialistiske ludomordarstwo prěć. Za to hrozy jastwo hač do třoch lět. Lěhwo Lety wobsteješe wot lěta 1940 do 1943 za čas němskeje okupacije. Wjace hač 300 jatych je w nim zahinyło. Sta dalšich dowjezechu do zaničowanskeho lěhwa Auschwitz. Po wjelětnych protestach wobydlerjow su w měrcu kormjernju swini zawrěli, kotraž wot 1970­tych lět na terenje bywšeho lěhwa steješe. Nětko ma tam wopomnišćo nastać.

Z hnydom dźewjeć psami w awće je policija šofera wosoboweho awta w Heilbronnje zadźeržała. Do toho bě wón jej spodźiwneho wašnja jězdźenja dla napad­nył. Mały chihuahua łažeše po jeho ramjenjomaj. Pjeć dalšich psyčkow sedźeše pódla a stajnje na njeho skakaše. Štyri wulke psy sedźachu na zadnjej ławce, běchu pak připasane. Zastojnicy mužej kazachu małe psy w kófrowym rumje přiwjazać. Přiwšěm dyrbi z chłostanku ličić.

Hač runje dorost wočakowachu, abo hač mějachu druhe přičiny: Paduši su w sakskim Auerbachu pjelchi w hódnoće 240 eurow spakosćili a so z awtom zminyli. Njeznaći wzachu rubiznu z kisty, ko­traž­ před drogeriju w Auerbachu w Vogtlandskim wokrjesu steješe. Po zda­ću pak mě­jachu nadobo „cholowy połne“ a wotjědźechu z kwičatymi kolesami, kaž swědcy wobkedźbowachu.

Budyšin/Ralbicy (SN/JaW). Křesćansko-demokratiska unija CDU w Sakskej ma wot tohole tydźenja noweho prominentneho serbskeho čłona: Dawida Statnika, kiž wšak je zdobom předsyda Domo­winy. Ralbičan sam je na naprašowanje našeho wječornika swój zastup do strony wobkrućił. Wulku wažnosć kładźe wón na to, zo „nima sakska CDU předsydu Domowiny za čłona, ale priwatnu wosobu Dawida Statnika. Hižo dlěje sym so z mysličku nosył do jedneje strony zastupić, dokelž měnju, zo ma so čłowjek tež towaršnostnje angažować“, Statnik swój krok rozłoži. Lochki jemu rozsud při­wšěm njebě. „Dołho rozmyslowach wo tym, kotra strona mojim wosobinskim zaměram a idealam najbóle wotpowě­du­je, a to bě skónčnje CDU.“ Kaž SN zhonichu, chce Statnik k přichodnym wólbam wokrjesneho sejmika za CDU nastupić. Ralbičan pak to ani njewobkrući, ani njedementowaše.