Budyšin/Serbin (SN). Wot tohole měsaca wobohaća wosebity dar z Texasa zběrku Budyskeho Serbskeho muzeja. Jedna so wo model originalneho zwona „Wendish Bell“, kotryž steji hižo mnohe lěta na kampusu Uniwersity Concordia w Texasu. Original, zhotowjeny swój čas w Gruhlec lijerni w Małym Wjelkowje, běchu 1854 wupućowarjo z Łužicy do Serbina sobu wzali. Zwón wisaše mnohe lěta na wěži Božeho domu The First Wendish Church, kotryž bě prěnja Serbska cyrkej, a pozdźišeje St. Pauls Lutheran Church w Serbinje. Ta słuša do rjadu „pomolowanych cyrkwjow“ w centralnym Texasu. Do njeje wabja wurazliwje z pokazku, zo běchu ju něhdyši serbscy zapućowarjo słowjanskeho pochada z Łužicy natwarili. W pućnikach maja cyrkej za wosebje wobhladanjahódnu.

Budyšin (SN/JaW). Znowawobsadźenje intendancy steješe dźensa w srjedźišću nazymskeho wuradźowanja rady Załožby za serbski lud w Budyskim Serbskim domje. W zjawnosći zdawna wočakowany bě rozsud rady, štó naslěduje Milenu Vettrainowu jako intendant abo intendantka Serbskeho ludoweho ansambla.

Byrnjež załožbowa rada hnydom na spočatku posedźenja wo intendantstwje SLA wuradźować chcyła, njeje hač do připoł­dnja a tak hač k redakciskemu kóncej k doskónčnemu rozsudej dóšło. Hač do kónca njeběše jasne, hač mjeno noweho intendanta abo noweje intendantki SLA wozjewja. Přičina njejasnosće je, zo njeje zrěčenje hišće podpisane, kaž Serbske Nowiny zhonichu.

Rozjimali su dźensa mjez druhim naćisk hospodarskeho plana załožby za lěto 2018 a z nim zwjazane priority. Za­běrali su so čłonojo gremija dale ze srjedźodobnym financnym planowanjom załožby hač do lěta 2020, a skónčnje su čłonojo tež wo próstwje wo spěchowanje wólbow Serbskeho sejma tematizowali. Wo wuslědkach zhoniće w jutřišim wudaću.

Po zdobyću Zymskeho palasta w Pětrohrodźe a wozjewjenju dekreta wo měrje 8. nowembra 1917 rano schadźowaše so 2. wšoruski kongres sowjetow samsny dźeń wječor znowa pod nawodom bolšewika Lewa Kamjenjewa. W prezidiju zabra rjad dalšich načolnych bolšewikow městno. Do nich słušachu Wladimir I. Lenin, Lew D. Trockij (prawe mjeno Bronstein), Grigorij J. Sinowjew, kiž bě so z Leninom w aprylu 1917 ze Šwicarskeje nawróćił, pozdźiši ludowy komisar nutřkowneho a šef sowjetskeho knježerstwa Aleksej I. Rykow, Anatolij W. Lunačarskij (ludowy komisar za kulturu) a prěnja ministerka swěta Aleksandra M. Kollontaj. Józef W. Stalin njebě pódla. Wón je pozdźišo twjerdźił, zo bě w Oktoberskej rewoluciji prawa ruka Lenina. Druhi nawoda rewolucije, předewšěm wobrónjeneho boja, pak bě Lew Trockij, syn najenka ryćerkubła a prěni ludowy komisar za wonkowne naležnosće a zakitowanje. Stalin da jeho 21. awgusta 1940 w Mexiku zamordować a je tež Kamjenjewa, Sinowjewa, Rykowa a dalšich starych bolšewikow 1936 a 1937 njewinowatych k smjerći zasudźić dał.

Ekonomaj a bestseller-awtoraj Matthias Weik a Marc Friedrich běštaj wčera wječor z hosćom Budyskich rozmołwow w Budyskej ludowej bance a staj tam ryso­wałoj, hdźe wšudźe w našim hospodarskim systemje klaca.