Kuzłaja w swětle dnja
Němsko-Serbske ludowe dźiwadło hotuje so na 29. Budyske lětne dźiwadło. Premjera musicala „Alice im Wunderland“ wotměje so jutře za tydźeń. Dohromady chcedźa jón hač do 20. julija 35 króć pod hołym njebjom na Budyskim Hrodźe předstajić.
Budyšin (SN/bn). Zakład za hru twori klasikar fantastiskeje literatury Lewisa Carrolla, kotryž staj Janet Yates Vogt a Mark Friedmann w lěće 2015 za jewišćo wobdźěłałoj. Zastupjerjam medijow předstajichu titulnu rólu alternujo sćělesnjacej Julia Leinweder a Julia Klingnerec, Měrko Brankačk jako „Wrótny kłobukar“, István Kobjela jako „Pozdatna nopawa“ kaž tež Larissa Ruppert a Leoni Mann jako dwójnikaj „Dideldum“ a „Dideldei“ předwčerawšim wurězk z inscenacije. Prěni zaćišć: Přećeljo kóždolětneho spektakla měli na swoje kóšty přińć, znawcam kiwaja wospjet tójšto popkulturnych referencow a někotražkuli pokazka na dotalne lětne produkcije NSLDź.
Stawizny serbskeje drasty znazorniła
Chronika w kniharni dóšła
Akterojo serbskeho kreatiwneho hospodarstwa so zešli
Slepo (AK/SN). Serbska identita móže po mnohostronskich pućach nastać a so posrědkować. Za to trjebaja wuměłcy wobstajnu wuměnu. To wopokaza so wospjet minjenu sobotu we wobłuku 27. zetkanja syće TAKATAK w Slepom.
Drjeworězbar a hosćićel Thomas Schwarz je zetkanje zhromadnje ze Zwjazkom serbskich wuměłcow, z towarstwom Kreatiwna Łužica a z projektom strukturneje změny „regeneracija – reprodukcija – inowacija“ wuhotował. Něhdźe 20 zajimcow je so na nim wobdźěliło, mjez druhim Jan Lorenc z projekta „drasta digital“, tworjacy wuměłc Jörg Tausch a hudźbnik Jacke Schwarz.
Wjelorake wjerški po cyłej Łužicy
Choćebuz (AK/SN). W najstaršej briketowni Europy, dźensnišim techniskim pomniku „Louise“ w Domsdorfje (wokrjes Łobjo-Halštrow), zahaja 24. awgusta z hudźbno-literarnym dźiwadłowym kruchom „Sonettfabrik“ lětuši Łužiski festiwal. Hač do 31. septembra wabi 20 produkcijow kulturnje zajimowanych na dohromady 31 zarjadowanjow w Hornjej a Delnjej Łužicy, kaž intendant Łužiskeho festiwala Daniel Kühnel minjenu wutoru na předstajenju programa w Choćebuzu zdźěli. Festiwalowe hesło „sebje-wědomi“ zwjazuje poetisku rěč z rěču wšědneho dnja, wón wuzběhny a doda: „Njech pohnuwa wone wopytowarjow k rozmyslowanju“.
Program wopřijima a dźiwadłowe, wuměłske a literarne předstajenja kaž tež koncerty, sceniske čitanja a rjad filozofiskich rozmołwow pod titulom „Łužica labor“. Tři miliony eurow festiwalneho budgeta financuje organizaciski team mjez druhim z pomocu srědkow fondsa za změnu strukturow, kulturneho spěchowanja krajow Braniborskeje a Sakskeje kaž tež dochodow z předanje zastupnych lisćikow.
Schuster politiki dla wotstupi
Njeswačidło (SN/mb). Wobydlerjo Njeswačidła su nětko w gmejnskim łopjenje zhonili, čehodla wjesnjanosta Gerd Schuster (CDU) po 24 lětach w zastojnstwje dočasnje wotstupi. Jeho štwórta wólbna perioda by so hakle 2029 skónčiła. Tola Schuster je, kaž piše, „krajneho radu prosył, mje 1. septembra do wuměnka pušćić.“ Tohodla maja ludźo 7. septembra naslědnika wolić.
Jako wjesnjanosta dyrbiš zakonje stata wukonjeć, štož pak Schuster hižo zamołwić njemóže. Financna kriza Njeswačidła njeje wuslědk njeporadźeneho wobchadźenja z financami, ale „změnjenych normow a standardow a dale a wjac socialnych a druhich wudawkow. Tute kraj a Zwjazk njenarunatej, byrnjež to zakonsce předwidźane było.“ Tomu so kritiske hospodarske połoženje přidruža – dochody z přemysłoweho dawka spaduja. To mała gmejna hižo njeznjese. Zo dyrbja nětko na přikład skromnu podpěru čestnohamtskim šmórnyć, njeje z wida Schustera akceptabelne. Wšako to wopačny zaćišć posrědkuje, mjenujcy, zo su fenki za wjesne žiwjenje na krizy gmejnskich financow wina.
Redakciski system zeznali
Štwórty koncert, štyri wjerški
Budyšin (CRM/SN). Na mjeztym štwórty sinfoniski koncert sezony přeprosy Serbski ludowy ansambl předwčerawšim do swojeho domu. Žurla běše bohužel jenož snadnje wobsadźena. Program wšak běše wšo druhe hač skromny. Dobry zawod do njeho poskić w fojeru do zahajenja Syman Hejduška. A štyri jara wšelakore a zawěrno derje wubrane sinfoniske kompozicije nańdźechu tak skedźbliwy a zajimowany publikum.
Štó chowa so za mjenom Élisabeth Jacquet de La Guerre? Jako drje prěnja žona spisa wona před něhdźe 300 lětami w Parisu barokowu operu „Cephale et Procris“. Z njeje zahra orchester SLA pod nawodom Kathariny Dickopf uwertiru, spisanu we wozdobnym francoskim stilu. Hudźba dopomina na frapěrowace wašnje na elegancu Jeana-Baptista Lullyja.
