Hnydom sej pokutu žadać
Berlin (dpa/SN). Sewjerorynsko-Westfalska chce sej ranjenja předpisa nastupajo wužiwanje nahubnika w busu a železnicy dla hnydomnu pokutu 150 eurow žadać. To je tamniši wobchadny minister Hendrik Wüst (CDU) připowědźił. Dotal su sej pokutu hakle žadali, hdyž potrjecheni tež po wospjetnym napominanju škit za hubu a nós njewužiwachu. „Žane dołhe diskusije wjace. Dźe wo solidaritu z najsłabšimi w našej towaršnosći“, minister Wüst raznje podšmórny.
FDP skorži připłatka dla
Berlin (dpa/SN). Direktnje po parlamentariskej lětnjej přestawce spočatk septembra chcedźa čłonojo frakcije FDP w zwjazkowym sejmje na Zwjazkowym wustawowym sudnistwje skóržbu přećiwo solidaritnemu připłatkej zapodać. To rjekny městopředsyda frakcije Christian Dürr powěsćerni dpa. Wjacore posudki fachowcow běchu wunjesli, zo zběranje přinoška po decembru 2019 wustawu rani. „Po skónčenju solidarneho pakta za natwar wuchoda bychu wot 1. januara 2020 soli wotstronić dyrbjeli.“
Witaja rozsud Němskeje
Mócny rozbuch libanonsku stolicu střasł
Beirut (dpa/SN). Po hoberskej detonaciji w stolicy Libanona Beiruće z wjace hač sto mortwymi a 4 000 zranjenymi pytaja tam nětko za móžnymi přičinami. Dotal z toho wuchadźeja, zo je wulke mnóstwo eksploziwneho amonijoweho nitrata rozbuchnyło. Něhdźe 2 750 tonow strašneje substancy bě w jednej z halow Beirutskeho přistawa bjez wěstotnych naprawow składowanych, kaž ministerski prezident Hassan Diab zdźěli. Pokazki na politisce motiwowany atentat dotal žane njejsu. Jenož prezident USA Donald Trump je sej ze „swojimi generalemi“ wěsty, zo jednaše so wo „tajke něšto kaž bombu“.
Rozbuch je libanonsku stolicu, kotrejež wobydlerjo tuchwilu wulkeje politiskeje a hospodarskeje krizy dla ćerpja, do hišće wjetšeho chaosa storhnył. Střasenja dla buchu wokna rozbite, wšudźe su njesměrne škody widźomne. Krawjacy ludźo błudźachu po dróhach nutřkowneho města połneho rozwalinow, črjopow a procha. Wulke dźěle přistawa su dospołnje zničene. W Beiruće, hdźež bydla něhdźe 2,4 miliony ludźi, su dwutydźenski nuzowy staw wukazali.
Rekordna ličba koronainfekcijow w Pólskej
Waršawa (dpa/SN). W Pólskej maja telko nowych natyknjenjow z koronawirusom kaž hišće ženje za čas pandemije. Wčera su tam zamołwići 680 nowoinfekcijow w běhu 24 hodźin registrowali, kaž strowotniske ministerstwo informuje. Dotalnu rekordnu ličbu 658 nowych padow běchu minjenu sobotu docpěli. Po oficialnych informacijach je so tam dotal 48 149 ludźi z wiruson natyknyło, 1 738 pacientow je na njón zemrěło.
Wirus so wočiwidnje tež mjez zapósłancami we Waršawje rozšěrja. Třoch čłonow senata, druheje komory parlamenta, su hižo pozitiwnje testowali. Posedźenja parlamenta su přestorčene. Přiwšěm chcedźa jutře planowane zapokazanje a spřisahanje prezidenta Andrzeja Dudy za druhu dobu zastojnstwa pod wěstotnymi naprawami přewjesć. Duda chce přisahu před narodnej zhromadźiznu złožić, kotraž wobsteji z wobeju komorow parlamenta.
Dróhi po sylnym dešću zapławjene
To a tamne (05.08.20)
Psyče howno na čriju je so w SakskoAnhaltskej wo bijeńcu młodeho porika w awće postarało. Krótko do wotjězda bě 23lětna mylnje do hromadki stupiła. Po tym zo bě so do awta sydnyła, dóńdźe k zwadźe z 32lětnym šoferom. Po werbalnym rozestajenju wza žona črij a biješe z nim muža. Na to so wobaj biještaj. Hakle policisća móžachu zwadu skónčić. Wobaj mataj nětko ze skóržbu ranjenja ćěła dla ličić.
Z kosćemi mandźelskeho we wačoku su Armenjanku na Mnichowskim lětanišću zadźerželi. Žona bě po puću z Grjekskeje do swojeje domizny, zo by lěta 2008 zemrěty mandźelski tam swój posledni wotpočink nadešoł. Zastojnicy cła, lěkarka a statny rěčnik pak njemóžachu žane přeńdźenja zwěsćić a su 74lětnej dowolili, z powostankami mandźelskeho do Kawkaza dale jěć.
Kühnert zastojnstwo spušći
Berlin (dpa/SN). Zwjazkowy předsyda młodźinskeje organizacije Juso Kevin Kühnert chce swoje zastojnstwo dočasnje spušćić a klětu za zwjazkowy sejm kandidować. 31lětny na zwjazkowym kongresu kónc nowembra wotstupi, rěčnica SPD potwjerdźi. Kühnert, kiž je zdobom městopředsyda SPD, chcył klětu nazymu w Berlinskim Tempelhofje-Schönebergu za wólby zwjazkoweho sejma nastupić.
Kral Španisku tajnje wopušćił
Madrid (dpa/SN). Bywši španiski kral Juan Carlos je kraj tajnje wopušćił. Po informacijach medijow je 82lětny nan krala Felipy VI. hižo minjeny kónc tydźenja wupućował. Španiska justica přećiwo Carlosej korupcije dla přepytuje. W skandalu dźe wo płaćenje wobtykanskich pjenjez při twarje železniskeje spěšnočary w Sawdi-Arabskej přez španiski konsorcij lěta 2008. Tehdy bě Juan Carlos wot Sawdičanow pječa sto milionow dolarow dóstał. Jako kral bě wón hač do 2014 před přesćěhanjom škitany.
Witaja cofnjenje wojakow USA
Italski ministerski prezident Giuseppe Conte je so wčera na ...
Lambrecht za demonstracije
GEW: Start šule „wulke riziko“
Sakska: Dowolnicy na test!
Prěnje centrumy na lětanišćomaj w Drježdźanach a Lipsku/Halle
Drježdźany (dpa/SN). Sakska poruča wšitkim nawrótnikam z wukrajneho dowola, na koronawirus so testować dać. Na lětanišćomaj w Drježdźanach a Lipsku/Halle su wčera testowe centrumy oficialnje dźěłać započeli. Hižo minjeny kónc tydźenja mějachu pućowacy składnosć, so na móžnu infekciju přepruwować dać. Při tym bě wšojedne, hač přińdźechu z rizikoweje kónčiny abo nic. W Lipsku bě wuslědk za třiwosobowu swójbu pozitiwny, zdźěli Klaus Heckemann, šef předsydstwa zjednoćenstwa kasowych lěkarjow w Sakskej, na nowinarskej konferency na Drježdźanskim lětanišću. W Drježdźanach bě so wot pjatka do njedźele 500 pućowacych testować dało, w Lipsku wšědnje něhdźe 300.
