Waršawa (dpa/SN). Woprawdźe sylny muž Pólskeje Jarosław Kaczyński je připowědźił, zo chcył knježerstwo kraja po lětnich prózdninach wobšěrnje přetworić. Ministerski prezident Mateusz Morawiecki ma přiwšěm w zastojnstwje wostać, zdźěli předsyda knježerstwoweje strony Prawo a sprawnosć (PiS) powěsćerni PAP w rozhłosowym přinošku.

Po měnjenju wobkedźbowarjow reaguje 71lětny tak na njewočakowany słaby wuslědk kandidata PiS při prezidentskich wólbach wčera tydźenja. Mějićel zastojnstwa Andrzej Duda móžeše swoju funkciju jeno přewšo snadnje přećiwo swojemu wužadarjej Rafałej Trzaskowskemu zakitować. Tajki wuslědk maja mnozy za jasne znamjo njespokojnosće wolerjow z politiku knježerstwa.

Nadrobnosće abo mjena njeje Kaczyński žane mjenował. Wón pak připowědźi, zo nochcył jenož w knježerstwje ale tež w knježerstwowej stronje PiS změny přesadźić. Nimo toho ma plan „repolonizacije“ medijow, zo bychu knježerstwu přichilenišo rozprawjeli.

Wo pomocnym pakeće k přewinjenju koronakrizy dale jednaja

Brüssel (dpa/SN). Po jasnych wuspěchach, schwalić pomocny paket Europskeje unije k wožiwjenju hospodarstwa po koronakrizy, su wurjadny wjeršk EU dźensa rano hišće raz podlěšili. Rěčnik Rady EU Charles Michel je wobdźělnikam dalši namjet předpołožił. Tón je na to wusměrjeny podźěl popłatkow, kotrež wot korony wosebje potrjechenym krajam jako dar přewostaja, na 390 miliardow eurow pomjeńšić. Po prěnim planowanju měješe to 500 miliardow eurow być. Kompromis pak njeje hišće dowujednany. Jednanja běchu w rańšich hodźinach přetorhnyli a na 14 hodź. přepołožili. Tak traje pjatk zahajeny wjeršk 27 statnych a knježerstwowych šefow hižo nětko dwaj dnjej dlěje hač planowane. Zwjazkowa kanclerka Angela Merkel (CDU) bě zhromadnje ze statnymi a knježerstwowymi šefami cyłu nóc za kompromisom pytała.

Skupina tak mjenowanych „zlutniwych“ krajow – Awstriskeje, Šwedskeje, Danskeje, Nižozemskeje a Finskeje – bě so spočatnje tomu spjećowała, pjenjezy jako dar wupłaćić, chcyjo je jenož jako kredity přewostajić, kotrež maja so wróćić.

Z paduchom stał je so swědomity młody wučer w japanskim Tokiju, zo by rano dypkownje w šuli był. Do toho bě sej wón po swjedźenju z přećelemi w ćahu wusnył a hakle w susodnej prowincy wotućił. Dokelž bě mjeztym posledni ćah domoj wotjěł a puć pěši předołhi, hrabny sej wón cuze koleso. W 2 hodź. pak policistam napadny, kotřiž jeho sobu na stražu wzachu. Hač je młody wučer přiwšěm hišće dypkownje do šule přišoł, njeje znate.

Hoberske roje lětacych mrowjow je britiska wjedrarnja Met Office na radarowym wobrazu zwěsćiła. Štož wupadaše při prěnim napohledźe kaž dešćikowe mróčele nad juhowuchodom Jendźelskeje, běchu mrowje. Na ćopłych, włóžnych a měrnych dnjach w lěću móža so wone z masami rozmnožić. Minjene lěta su tež zas a zaso tenisowe turněry w Wimbledonje domapytali.